ស្ទើរមិនគួរឲ្យជឿស្ងាត់ៗលោកសុវណ្ណ រិទ្ធី ហៅលោកតាវ៉ិចទ័រ ដែលជាផលិតករល្បីឈ្មោះក្នុងក្រុមCBS ពិសេសគឺទូរទស្សន៍ CTN និង MyTV បែរជាចាប់អារម្មណ៍លើជំនួញផ្នែកកសិកម្មខុសប្លែកពីផលិតករកម្មវិធីទូរទស្សន៍ភាគច្រើន ដែលផ្ដោតជាសំខាន់លើការបង្កើតក្រុមហ៊ុនរៀបចំខនសឺត ឬបើកហាងធំដុំជាដើមដើម្បីលំនឹងនៃប្រាក់ចំណូល។ លោកត្រូវគេដឹងថាចូលចិត្តដាំដុះដំណាំគ្មានជាតិគីមី ប៉ុន្តែក៏មានមុខរបរចិញ្ចឹមត្រីជាទ្រង់ទ្រាយធំនៅពីក្រោយ ដែលជួយអោយលោកទទួលបានចំណូលយ៉ាងក្រាស់ជារៀងរាល់ឆ្នាំផងដែរ។
លោកតារាវ៉ិចទ័របានទទួលស្គាល់ថា ក្នុងនាមជាអ្នកផលិតកម្មវិធីលោកមានចំណូលចិត្តតែរឿងមុខរបរកសិកម្មមួយមុខប៉ុណ្ណោះ ដោយសារតែលោកយល់ថានោះជាមុខរបរដែលជួយអោយលោករស់ស្រួល ហើយមិនភ័យក្រោយពេលបោះទុន។លោកបានសម្រេចចិត្តបើកជំនួញចិញ្ចឹមត្រីដំបូងបំផុតកាលពី២ឆ្នាំមុននៅក្នុងភូមិសំរោង ឃុំសំរោងក្រោម ស្រុកបន្ទាយមាសខេត្តកំពត ដែលជាស្រុកកំណើតរបស់ខ្លួន ដោយក្នុងពេលនេះមុខរបរចិញ្ចឹមត្រីរបស់លោកមានចំនួន២ស្រះ ហើយក្នុងមួយស្រះមានត្រីចំនួន២ម៉ឺនក្បាលសម្រាប់ស្រង់លក់ក្នុងមួយរដូវៗ។
លោកតាវ៉ិចទ័របញ្ជាក់ថា លោករមែងប្រើពេលស្វែងយល់ពីរៀបដាំដុះបន្លែ និងចិញ្ចឹមត្រីពីជាដើមតាមបច្ចេកវិទ្យានៅអ៊ីនធឺណិត និងហ្វឹកហាត់បន្ថែមពីអ្នកចេះដឹងខ្លះៗ តែបើអោយសិក្សានៅក្នុងសាលាណាមួយបានជាក់លាក់គឺមិនមាននោះទេ។ លោកថាអាជីវកម្មមួយនេះហុចផលផ្លែផ្កាអោយលោកយ៉ាងច្រើន ដោយក្នុងមួយរដូវលោកអាចប្រមូលបានរង្វង់ច្រើនជាង៥ពាន់ដុល្លាររៀងរាល់រដូវ ហើយមិនភ័យរឿងអត់អ្នកទិញនោះទេ ដោយសារតែត្រីដែលលោកបានចិញ្ចឹមគឺប្រើបច្ចេកទេសត្រឹមត្រូវ មិនប្រើជាតិគីមី ហើយអោយតែដល់រដូវមានម៉ូយមកថ្លឹងអស់ៗ។ លោកថាមុខរបរមួយនេះ ចំណាយកម្លាំងមើលថែតែបន្តិច តែមិនភ័យរឿងអត់ទីផ្សារ និងឡុងចុងខាងដើមឡើយ ទើបលោកក្រៅពីពង្រីកការចិញ្ចឹមត្រីអោយបានច្រើនស្រះក្នុងពេលខាងមុខហើយ ក៏នឹងបើកការចិញ្ចឹមមាន់ជាទ្រង់ទ្រាយធំទៀត។
ផលិករផលិតកម្មវិធីទូរទស្សន៍រូបនេះបានឲ្យដឹងដែរថា ក្រៅពីចិញ្ចឹមត្រីលោកក៏មានគម្រោងបោះទុនចិញ្ចឹមមាន់ក្នុងពេលឆាប់ៗ បន្ទាប់ពីបានសិក្សាឃើញថាមុខជំនួញមួយនេះ ក៏ល្អមិនខុសពីត្រី អោយតែមានវិធីថែទាំច្បាស់លាស់ការពារកុំអោយឆ្លងជំងឺ។ អ៊ីចឹងហើយទើបលោកបញ្ជាក់ថាឧស្សាហ៍ឡើងចុះទៅខេត្តកំពត បើទោះជាលោកមានផ្ទះមានសម្បែងនៅភ្នំពេញ និងមានការការងារជាប្រចាំនៅCTNទៅហើយ។ លោកតែងប្រើពេលទំនេរនៅដំណាំ និងត្រីនៅស្រុក ដោយលោកបានចាត់ទុកថាក្រៅពីលក់បានលុយច្រើនៗហើយ ក៏មិនខុសពីការលំហែកាយផងដែរ។ ជាក់ស្ដែងសូម្បីតែថ្ងៃកំណើតរបស់លោកគម្រប់វ័យ៤៧ឆ្នាំក៏លោកបង្ហាញខ្លួននៅស្រុកកំណើត មិនខ្វល់រឿងកាត់នំជប់លៀងនៅភ្នំពេញនោះដែរ ដោយសារតែលោកត្រូវទៅមើលថែមុខជំនួញចិញ្ចឹមត្រីផង និងគិតគូរពីគម្រោងបើកកសិដ្ឋានចិញ្ចឹមមាន់ជាទ្រង់ទ្រាយធំ។ យ៉ាងណាមិញលោកថានៅតែមានពេលគ្រប់គ្រាន់ដើម្បីផលិតកម្មវិធីថ្មីៗដោយក្នុងពេលខាងមុខក្រៅពីពង្រឹងកម្មវិធីមានស្រាប់អោយកាន់តែទាក់ទាញបន្ថែមទៀត ក៏នឹងបង្កើតកម្មវិធីថ្មី ដើម្បីបំពេញសេចក្ដីត្រូវការរបស់មហាជនផងដែរ។
លោកតាវ៉ិចទ័រ បន្ថែមថាលោកមានមហិច្ឆតាលើការពង្រីកមុខជំនួញពាក់ព័ន្ធនឹងវិស័យកសិកម្មច្រើនឡើង បន្ទាប់ពីបើកចិញ្ចឹមត្រីហើយទទួលបានប្រាក់ចំណូលក្រាស់ទៅៗរាល់ពេលប្រមូលផល។ ក្នុងនោះលោកក៏បណ្ដុះ និងចែកចាយជំនាញដែលខ្លួនមានជូនដល់អ្នកដែលចង់ស្វែងយល់ពីការចិញ្ចឹមត្រីដូចលោកផងដែរ សម្រាប់អ្នកជិតខាងណាដែលចង់អោយលោកចង់បង្ហាត់បង្រៀន ដោយលោកយល់ថាមិនមានអ្វីត្រូវលាក់តំរិះនោះឡើយ។ លោកថាខ្លួនលោកចាស់ហើយ គឺមិនអាចរំពឹងលើការងារសិល្បៈបានជាយូរអង្វែងកើតទេទើបលោកដាច់ខាតត្រូវតែរៀបផែនការបើកមុខជំនួញលើវិស័យកសិកម្មជាពិសេសគឺការដាំដំណាំ ចិញ្ចឹមត្រី និងចិញ្ចឹមមាន់ ទុកជាបង្អែកនៅពេលចាស់ទៅ៕
