ជនសង្ស័យ២នាក់ ធ្វើសកម្មភាពឆក់ទូរស័ព្ទដៃពីនារីម្នាក់ បានសម្រេច តែត្រូវនគរបាលឃាត់ខ្លួនបានម្នាក់

ភ្នំពេញ៖ ជនសង្ស័យ២នាក់ ទើបរៀនឆក់លើកទី១ បានធ្វើសកម្មភាពឆក់ទូរស័ព្ទ iPhone 6plus ពីនារីម្នាក់ ដែលដាក់ក្នុងហោប៉ាវខោ បានសម្រេច តែត្រូវនារីរងគ្រោះ ជិះម៉ូតូដេញតាម រហូតទាល់តែជនសង្ស័យភ័យជិះម៉ូតូទៅបុកឡាន ដួលតែម្ដង នៅក្បែរវិមានឯករាជ្យ។ ហេតុការណ៍នេះបានធ្វើសកម្មភាពឆក់កាលពីវេលាម៉ោង១២និង៥០នាទី ថ្ងៃទី២០ ខែមិថុនា ឆ្នាំ២០១៧ នៅចំណុចមុខសាលាដូនពេញ ផ្លូវ៥១ ក្នុងសង្កាត់ផ្សារថ្មី៣ ខណ្ឌដូនពេញ ហើយជនរងគ្រោះជិះដេញចាប់បាននៅចំណុចវិមានឯករាជ្យ ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។

ជនសង្ស័យទី១ មានឈ្មោះ ពេជ្រ ភារុណ ភេទប្រុស អាយុ១៩ឆ្នាំ ស្នាក់នៅភូមិដើមមៀន សង្កាត់ដើមមៀន ក្រុងតាខ្មៅ អ្នកធ្វើសកម្មភាពឆក់។ ចំណែកម្នាក់ទៀតឈ្មោះ អាយួន អ្នកបើកម៉ូតូ រត់បាត់។ ចំណែកជនរងគ្រោះ ឈ្មោះ លឹម ចាន់ធីតា ហៅស្រីនាង អាយុ២១ឆ្នាំ ស្នាក់នៅភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុ នារីរងគ្រោះជិះម៉ូតូម៉ាកស្កុបពី ពណ៌ស ពាក់ស្លាកលេខភ្នំពេញ ១FO-៧៧៨៥ ធ្វើដំណើរតាមបណ្ដោយផ្លូវលេខ៥១ ក្នុងទិសដៅពីជើងទៅត្បូង ខណៈមកដល់ចំណុចមុខសាលាដូនពេញ ផ្លូវ៥១ ក្នុងសង្កាត់ផ្សារថ្មី៣ ខណ្ឌដូនពេញ ស្រាប់តែមានជនសង្ស័យ២នាក់ ជិះម៉ូតូ១គ្រេឿង ម៉ាកនិច ពណ៌សលាយខ្មៅ ពាក់ស្លាកលេខកំពង់ចាម ១Q-៥៤១៣ ធ្វើដំណើរស្របទិសគ្នា មកពីក្រោយបានធ្វើសកម្មភាពលូកឆក់ទូរស័ព្ទដៃម៉ាក់ iPhone 6plus ពីហោប៉ាវខោនារីគ្រោះ ពេលនោះនារីរងគ្រោះបានជិះដេញតាមពីក្រោយស្រែកចោរៗ រហូតដល់ចំណុចវិមានឯករាជ្យ ជនសង្ស័យភ័យបានជិះជ្រុលទៅបុកឡានគេដួល ហើយកម្លាំងនគរបាលព្រហ្មទណ្ឌខណ្ឌដូនពេញ ជួយអន្តរាគមន៍ភ្លាមៗតែម្ដង ចាប់បានម្នាក់ដែលធ្វើសកម្មភាពឆក់ ចំណែកម្នាក់ទៀតអ្នកបើកម៉ូតូរត់គេចខ្លួនបាត់។

បច្ចុប្បន្នជនសង្ស័យរួមវត្ថុតាងត្រូវបានកម្លាំងនគរបាលព្រហ្មទណ្ឌខណ្ឌដូនពេញ នាំមកឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីចាត់ការតាមផ្លូវច្បាប់៕