ភ្នំពេញ៖ មេល្បែងស្ទូចប្រេងកូឡាម្នាក់ ត្រូវបានសមត្ថកិច្ចខណ្ឌឫស្សីកែវ ចុះបង្ក្រាបជាក់ស្តែងនៅតាមបណ្តោយផ្លូវរថភ្លើង កាលពីវេលាម៉ោង១និង០០នាទីរសៀល ថ្ងៃទី២០ ខែមិថុនា ឆ្នាំ២០១៧ នៅចំណុចផ្ទះគ្មានលេខ តាមបណ្តោយផ្លូវរថភ្លើង ក្រុមទី១០ ភូមិចុងខ្សាច់ សង្កាត់ទួលសង្កែ១ ខណ្ឌឫស្សីកែវ ។
ជនសង្ស័យដែលត្រូវឃាត់ខ្លួន មានឈ្មោះ កៅ និស្ស័យ ភេទប្រុស អាយុ ៣៧ឆ្នាំ មុខរបរនៅផ្ទះ (មេល្បែងសុីសង) ស្នាក់នៅផ្ទះកើតហេតុខាងលើ។
សមត្ថកិច្ចបានប្រាប់ឲ្យដឹងថា នៅក្នុងប្រតិបត្តិការខាងលើនេះ គឺមានការសម្របសម្រួលពី លោកវង្ស ប៉ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ ហើយកម្លាំងសមត្ថកិច្ចយើងបានបើកការស្រាវជ្រាវ រហូតឈានដល់ការចុះបង្ក្រាបទីតាំងលេងល្បែងសុីសងខុសច្បាប់ (ស្ទូចប្រេងកូឡា) ដោយនៅក្នុងកិច្ចប្រតិបត្តិការនេះ គឺសមត្ថកិច្ចឃាត់ខ្លួនបានជនសង្ស័យម្នាក់ព្រមទាំងដកហូតគំរប់ប្រេងកូឡា ចំនួន២៤ មានចាប់ពីលេខ១ដល់លេខ២៤ មានពណ៌ក្រហម និងពណ៌ខៀវ, កំរាលមានលេខ១ ដល់លេខ១២ ថុងជ័រចំនួន១, កៅអីជ័រចំនួន៣ និងទឹកប្រាក់មួយចំនួន។ ក្រោយមកសមត្ថកិច្ចយើងបានឃាត់ខ្លួនយកមកប៉ុស្តិ៍នគរបាលរដ្ឋបាលទួលសង្កែ ដើម្បីធ្វើការសាកសួរ។
បច្ចុប្បន្នជនសង្ស័យខាងលើ រួមនឹងវត្ថុតាងត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅកាន់តុលាការចាត់ការបន្តតាមផ្លូវច្បាប់៕