ភ្នំពេញ ៖ ស្ត្រីម្នាក់រួមទាំងកូនប្រុសស្រីចំនួន២នាក់ បានបើករថយន្តចេញពីផ្ទះ គោលបំណងទៅញាំអាហារនៅម្តុំផ្សារអ៊ីអន គ្រាន់តែចុះពីរថយន្ត ស្រាប់តែជនសង្ស័យ២នាក់ បានធ្វើសកម្មភាព ឆក់យកកាបូបស្ពាយបានសម្រេច ហេតុការណ៍នេះកើតឡើងនៅវេលាម៉ោង៨និង៣០នាទីយប់ ថ្ងៃទី២៥ ខែមិថុនា ឆ្នាំ២០១៧ ជិតនិងផ្សារទំនើបអ៊ីអន ផ្លូវបេតុង អត់លេខ សង្កាត់ទន្លេបាសាក់ ខណ្ឌចំការមន ។
ជនរងគ្រោះសុំមិនបញ្ចេញឈ្មោះនោះទេ គ្រាន់តែដឹងថា របស់ដែលបាត់បង់ក្នុងកាបូបស្ពាយ មានខ្សែក ផ្លាកទីនមួយខ្សែ ទូរស័ព្ទសេរីទំនើបមួយគ្រឿង លិខិតឆ្លងដែន២សន្លឹក ព្រមទាំងលុយមួយចំនួន ព្រមទាំងឯកសារផ្សេងៗទៀត ។
តាមសម្ដីស្ត្រីជាម្តាយបានឲ្យដឹងថា មុនពេលកើតហេតុ ពួកគាត់មានគ្នាបីនាក់ កូនប្រុសម្នាក់និងស្រីម្នាក់ បានបើករថយន្តមួយគ្រឿង ចេញពីផ្ទះនៅម្តុំទួលសង្កែ ខណ្ឌឫស្សីកែវ គោលបំណងមកញាំអាហារនៅហាងមួយកន្លែងជិតផ្សារទំនើបអ៊ីអន ដែលស្ថិតនៅសង្កាត់ទន្លេបាសាក់ ខណ្ឌចំការមន ដោយបានធ្វើដំណើរតាមផ្លូវបេតុង ក្រោយផ្សារទំនើបអ៊ីអន ក្នុងទិសដៅពីជើងទៅត្បូង ខណៈមកដល់ចំណុចកើតហេតុ មុខហាងកូនស្រីរបស់គាត់ បានស្ពាយកាបូបចុះពីរថយន្ត ក៍ស្រាប់តែមានជនសង្ស័យចំនួន២នាក់ បានជិះម៉ូតូម៉ាកស៊ុយសុគីនិក មួយគ្រឿង មិនចាំស្លាកលេខ បានជិះមកជិត រួចក៍បានធ្វើសកម្មភាពឆក់ការបូបស្ពាយពីកូនស្រីរបស់គាត់បានសម្រេច រួចបានបន្ថែមល្បឿនរត់គេចខ្លួនបាត់ស្រមោល ។ ជនរងគ្រោះបានបន្តទៀតថា ក្នុងហេតុការណ៍នេះបងប្អូនប្រជាពលរដ្ឋជាច្រើនបានឃើញសកម្មភាពរបស់ជនសង្ស័យទាំងនោះ តែពួកគាត់ទាំងនោះមិនហ៊ានដេញតាមនោះទេ ។
ក្រោយពេលកើតហេតុ ឃើញសមត្ថកិច្ចមូលដ្ឋានបានចុះរួចហើយបាននាំជនរងគ្រោះយកទៅសាកសួរ និងដាក់ពាក់បណ្តឹងនៅប៉ុស្តិ៍នគរបាលទន្លេបាសាក់ ៕
