ភ្នំពេញ ៖ ស្ត្រីវ័យក្មេងម្នាក់ជាគ្រូបង្រៀន ជិះម៉ូតូចេញពីផ្ទះទៅបង្រៀនក្មួយលោកអភិបាលខណ្ឌដូនពេញ ត្រូវក្រុមជនសង្ស័យឆក់កាបូបបានសម្រេច ហើយរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីវេលាម៉ោង២និង៣០នាទីរសៀល ថ្ងៃទី២៥ ខែមិថុនា ឆ្នាំ២០១៧ តាមបណ្តោយផ្លូវព្រះស៊ីសុវត្ថិ នៅចំណុចជិតរង្វង់មូលកួចកាណុង ស្ថិតនៅក្នុងសង្កាត់ស្រះចក ខណ្ឌដូនពេញ ។
ជនរងគ្រោះមានឈ្មោះហៃ វុចថេង ភេទស្រី អាយុ២៧ឆ្នាំ មុខរបរជាគ្រូបង្រៀនក្មួយលោកអភិបាលខណ្ឌដូនពេញ ស្នាក់នៅក្រោយមន្ទីរពេទ្យលោកសង្ឃ សង្កាត់ទឹកល្អក់២ ខណ្ឌទួលគោក។
តាមប្រភពព័ត៌មានពីជនរងគ្រោះ បានឲ្យដឹងថា មុនពេលកើតហេតុ គាត់ជិះម៉ូតូម៉ាកហុងដាស្តុបពី ពណ៌ខ្មៅ សេរី២០១២ ពាក់ស្លាកលេខភ្នំពេញ 1BB-4071 ចេញពីផ្ទះនៅក្រោយមន្ទីរពេទ្យព្រះកុសុមៈ ហៅពេទ្យលោកសង្ឃ គោលបំណងទៅបង្រៀនក្មួយលោកអភិបាលខណ្ឌដូនពេញ នៅទួលសង្កែ លុះពេលធ្វើដំណើរកាត់តាមផ្លូវព្រះមុនីវង្ស មកដល់ចំណុចរង្វង់មូលកួចក្រណុង ក៏ស្រាប់តែលេចមុខជនសង្ស័យ៥នាក់ ជិះម៉ូតូ២គ្រឿង ម៉ាកហុងដាឌ្រីម ពណ៌ខ្មៅ សេរី២០១៧ មិនចាំស្លាកលេខ ជិះគ្នា២នាក់ និងមួយគ្រឿងទៀត ម៉ាកស៊ុយសុគីនិច ពណ៌ស មិនចាំស្លាកលេខ ជិះគ្នា៣នាក់ បានធ្វើសកម្មភាពឆក់កាបូបស្ត្រីរងគ្រោះបានសម្រេច ហើយជិះរត់គេចខ្លួនបាត់ស្រមោល តាមផ្លូវព្រះស៊ីសុវត្ថិ ភ្លាមៗនោះ ជនរងគ្រោះរួមនឹងប្រជាពលរដ្ឋជួយដេញតាមពីក្រោយដែរ ប៉ុន្តែដេញអត់ទាន់។
នៅក្នុងកាបូបរបស់ជនរងគ្រោះ មានទូរស័ព្ទដៃម៉ាក iPhone 7 plus អត្តសញ្ញាណបណ្ណមួយសន្លឹក លិខិតឆ្លងដែនមួយសន្លឹក ប្រាក់ជិត10$។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលស្រះចក ដើម្បីឲ្យសមត្ថកិច្ចតាមរកជនសង្ស័យមកផ្តទ្ទាទោសទៅតាមផ្លូវច្បាប់ ៕
