កាលពីព្រឹកថ្ងៃទី០៦ ខែមិថុនា ឆ្នាំ២០១៧ តារាកំប្លែងនាយក្រូច បានរៀបចំធ្វើពិធីភ្ជាប់ពាក្យឲ្យកូនស្រីច្បងរបស់លោក នៅគេហដ្ឋានស្ថិតក្នុងភូមិត្រាចកុះ ឃុំមហាឫស្សី ស្រុកគងពិសី ខេត្តកំពង់ស្ពឺ។
តារាកំប្លែងក្នុងក្រុមនាយពែកមី នៅCTN នាយក្រូច បានឲ្យសារព័ត៌មានដឹងថា ”កូនរបស់លោកមានឈ្មោះ បឿន សុបុនបញ្ញា វ័យ១៨ឆ្នាំ ចំណែកអនាគតកូនប្រសា មានឈ្មោះ ពេញ ដារិទ្ធិ អាយុ២១ឆ្នាំ ជាកូនអ្នកភូមិជិតគ្នា។
នាយក្រូច បានបន្តថា កូនៗបានស្រលាញ់គ្នាជាង៥ឆ្នាំហើយ ដោយមានការណែនាំពីចាស់ទុំសងខាង គួបផ្សំកូនៗពេញចិត្តគ្នាផង អំឡុងពេលគ្រួសារទាំងសងខាងរាប់អានគ្នាច្រើនដំណមកហើយ។ ក្នុងថ្ងៃភ្ជាប់ពាក្យកូនស្រីច្បងនេះ នាយក្រូច មិនបានអញ្ជើញអ្នកសិល្បៈចូលរួមច្រើននោះទេ ពោលគឺអញ្ជើញមិត្តជិតស្និទ្ធ និងញាតិសងខាងប៉ុណ្ណោះ។ នាយក្រូច ក៏បានប្រាប់ថា ក្រោយពីរៀបការរួច នាយនឹងនិងចែកមុខរបរវង់ភ្លេង ឲ្យកូនស្រីមើលការខុសត្រូវ ចំពោះកូនប្រសា នាយចង់ឲ្យចូលម្រើការងារមន្ត្រីរាជការ។
លោកបន្តថា ដោយសារតែទាំងកូនបង្កើតនិងអនាគតកូនប្រសារ សុទ្ធតែនៅរៀនមហាវិទ្យាល័យ ដូចនេះគម្រោងរៀបការ នៅមិនទាន់គិតនៅឡើយទេ គ្រាន់តែភ្ជាប់ពាក្យឲ្យចាស់ទុំដឹងឮសិនប៉ុណ្ណោះ។ ចំពោះថ្លៃបណ្ណាការគ្រួសារខាងស្រីមិនបានបង្គាប់នោះដែរ គឺមានតែការជួយគ្នាទៅវិញទៅមកប៉ុណ្ណោះ។
សូមបញ្ជាក់ដែរថា នាយក្រូច មានកូនតែ២នាក់ (ប្រុស១ស្រី១) បន្ទាប់ពីលោកបានរៀបការបានជិត២០ឆ្នាំមកហើយ៕
