ភ្នំពេញ : បុរសម្នាក់មិនដឹកមកពីផឹកស្រវឹងពីណាទាំងថ្ងៃ ជិះម៉ូតូម៉ាកហ្វីណូ ពណ៍ស ពាក់ស្លាក លេខភ្នំពេញ ១GB-៤៧២២ មកឈប់ដេកនៅចិញ្ចើមផ្លូវ សង្ស័យទៅមុខលេងរួច កាលវេលាម៉ោង៣និង០០នាទីរសៀល ថ្ងៃទី២៨ ខែមិថុនា ឆ្នាំ២០១៧ នៅចំណុចផ្ទះលេខ៨៩ ផ្លូវ១៤៣ ក្រុម៣៣ ភូមិ៤ សង្កាត់អូឡាំពិក ខណ្ឌចំការមន ។
ប្រភពព័ត៍មានពីសមត្ថកិច្ចនគរបាលសង្កាត់អូឡាំពិក មានបុរសមានអាយុ ប្រហែល៣០ឆ្នាំម្នាក់ ជិះម៉ូតូម៉ាកហ្វីណូ ១គ្រឿង មិនដឹងជាស្រវឹងផឹកសីុនៅទីណា មកដល់ចំណុចខាងលើស្រាប់តែដាក់ជន្ទល់ម៉ូតូ ឈប់ដេកលង់លក់តែម្ដង ក្រោយមកក៏សមត្ថកិច្ចល្បាតក្នុងមូលដ្ឋានក៏បានប្រទះឃើញ ក៏សួរនាំ និងប្រជាពលរដ្ឋខំយកទឹកក្រូច ឬទឹកក្រូចឆ្មា ឲ្យផឹក ដើម្បីស្វាងស្រាប់តែបុរសស្រវឹងនោះមិនព្រមផឹកទេ ដឹងតែពីដេក ហើយសួរនាំផ្ទះសំបែងនៅទីណា បុរសនោះឆ្លើយថា ផ្ទះនៅចំការដូង ខណ្ឌដង្កោ រាជធានីភ្នំពេញ ក្រោយពីសួរនាំរួច ក៏បុរសនោះដេកលក់ទៀត ។
សមត្ថកិច្ចបន្តថា ដោយមានប្រជាពលរដ្ឋចោមរោមមើលច្រើន និងចៀសវាងអ្នកដំណើរឈប់បណ្ដាលឲ្យកកស្ទះចរាចរណ៍ ហើយក៏ដាស់ឲ្យបុរសនោះភ្ញាក់ ដើម្បីនាំយកមកប៉ុស្តិ៍ និងមិនឲ្យបន្តដំណើរ ខ្លាចឈប់កន្លែងស្ងាត់ មានជនសង្ស័យឆ្លៀតអាកាសលួចយកម៉ូតូ និងទ្រព្យសម្បត្តិ ដែលនៅជាប់នឹងខ្លួន តែបុរសនោះភ្ញាក់ដឹងខ្លួន មិនស្ដាប់តាមសមត្ថកិច្ចទេ និងជិះម៉ូតូបន្តដំណើរទៅមុខទៀតបាន ហើយប្រាប់សមត្ថកិច្ចមិនបាច់ពឹងសមត្ថកិច្ច នាំតែរំខាន អីលូវរាងស្វាងខ្លះអាចបើកបរបាន រួចក៏ជិះចេញពីកន្លែងកើតហេតុបាត់ទៅ ហើយអ្នកឈរក៏បានមើលរំសាយដើរចេញអស់វិញ ៕
