ភ្នំពេញ ៖ ស្រ្តីម្នាក់ក្នុងចំណោមមិត្តភក្តិ២នាក់ទៀត ដែលអះអាងថា ខ្លួនជាតារា Facebook ចេញពីផឹកស៊ី បើករថយន្តបើករថយន្តតូយ៉ូតាព្រូស ជ្រុលទៅបុកគូទរថយន្តឡិចស៊ីស បណ្តាលឲ្យខូចខាតរថយន្តទាំងសងខាង តែមិនបង្កឲ្យរងរបួសទេ ដែលហេតុការណ៍កើតឡើងកាលពីវេលាម៉ោង១១យប់ ថ្ងៃទី២៩ ខែមិថុនា ឆ្នាំ២០១៧ តាមបណ្តោយផ្លូវសុរាម្រិត នៅចំណុចរង្វង់មូលសម្តេចសង្ឃជួន ណាត ស្ថិតនៅក្នុងសង្កាត់ចតុមុខ ខណ្ឌដូនពេញ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿង ម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ2AK-7109 ជិះក្នុងរថយន្តមានស្ត្រីស្រស់ស្អាត៣នាក់ ក្នុងនោះស្រ្តីជាអ្នកបើករថយន្តគេស្គាល់ថាជាតារាល្បីនៅក្នុងសង្គម Facebook ដែលមានឈ្មោះថា PeyPey Ly បើកបរក្នុងស្ថានភាពស្រវឹងស្រា បើកតាមបណ្តោយផ្លូវសុរាម្រិតក្នុងទិសដៅពីត្បូងទៅ ជើងខណៈពេលមកដល់ចំណុចកើតហេតុខាងលើ បានជ្រុលទៅបុកពីក្រោយរថយន្តមួយគ្រឿងទៀត បើកស្របទិសគ្នា ម៉ាក Lexus RX300 ពណ៌ខ្មៅ ពាក់ស្លាកលេខភ្នំពេញ2K-8231 បណ្តាឲ្យរថយន្តតូយ៉ូតាព្រូស រងការខូចខាតក្រពិតកាងមុខផ្នែកខាងស្តាំចំណែកឯរថយន្ត Lexus RX300 ខូចខាតស្តុបខាងឆ្វេងបន្តិចបន្តួច។ បន្ទាប់ពីកើតហេតុអ្នកយកព័ត៌មានរបស់ទូរទស្សន៍ហង្សមាស បានចុះ ទៅផ្តិតយករូបភាពគ្រោះថ្នាក់ចរាចរណ៍ ស្រាប់តែ PeyPey Ly រួមនឹងជាមួយមិត្តភក្តិ បានមកហាមមិនឲ្យថតទេ ហើយបានក្របួចអាវអ្នកយកពត៌មានទូរទស្សន៍ហង្សមាស ហើយ PeyPey Ly បាននិយាយថា អ្នកសារព័ត៌មានស្គាល់នាងជាអ្នកណាអត់? គឺគាត់ជា PeyPey Ly តែអ្នកយកព័ត៌មានមិនចង់ប្រកែកអីនោះទេព្រោះស្រ្តីជាអ្នកបើករថយន្តធុំក្លិនស្រាហួង ក៏បានដើរចេញហើយទៅថតយករូបភាពជាបន្តទៀត។
បើតាមសំដីរបស់ម្ចាស់រថយន្តតូយ៉ូតាព្រូស ដែលជាមិត្តភក្តិររបស់កញ្ញា PeyPey Ly ដែលជា អ្នកបើករថយន្តបានប្រាប់ថា មុនពេលដែលកើតហេតុ គាត់ជាមួយនឹងមិត្តភក្តិ២នាក់ទៀតបានទៅលេងនៅផ្សារកុងតឺន័រ ហើយពួកគេក៏បានផឹកស្រាបន្តិច លុះពេលដែលចេញមកវិញកញ្ញា PeyPey Ly សុំរថយន្តរបស់គាត់បើក ដំបូងគាត់មិនចង់ឲ្យបើកនោះទេ ព្រោះខ្លាចមានគ្រោះថ្នាក់ចរាចរណ៍ តែខ្លាចថាគាត់ចិត្តអាក្រក់ ទើបគាត់ព្រមឲ្យបើក លុះមកដល់ចំណុចកើតហេតុ ក៏ជ្រុលទៅបុកគូទរថយន្តLexus RX300 តែម្តងទៅ។
នគរបាលប៉ុស្តិ៍ចតុមុខ ក៏បានចុះទៅសួរនាំ ត្រូវកញ្ញា PeyPey Ly ដេញសមត្ថកិច្ចមិនឲ្យដោះស្រាយទេ គឺដោះស្រាយដោយខ្លួនឯងមិនចាំបាច់សមត្ថកិច្ចមកជួយដោះស្រាយនោះទេ។
ក្រោយពេលកើតហេតុ រថយន្ត Lexus RX300 ទាមទារសំណងចំនួន100$ ប៉ុន្តែខាងកញ្ញា PeyPey Ly គាត់មិនព្រម ណាមួយខាងម្ចាស់រថយន្ត Lexus RX300 គាត់មិនចង់ឲ្យគេឃើញមុខក្នុងកញ្ចក់ទូរទស្សន៍ ក៏បានបើករថយន្តចេញទៅបាត់ ដោយមិនចង់បានសំណងនោះទេ៕
