រឿងថៃ ថតថ្មី “មន្តអាគម” ភាគច្រើនមានលាយឡំដោយអបិយជំនឿ មន្តអាគមអូមអាម តែក៏មានឆាកស្នេហាព្រឺព្រួចខ្លះ រវាងតួឯកប្រុស ចេមស៍ម៉ា និងតួឯកស្រី ម៉ារគី ដែរ។
ឆាកស្នេហានោះគឺ ត្រង់វគ្គវិលទៅរកអតីតកាលវ័យសិក្សារបស់កំលោះ សុងក្លុត (ចេមស៍) និងយុវតី អឿន កាន្ត (ម៉ារគី)។ ពេលនោះ សុងក្លុត បានទៅលេងផ្ទះចម្ការ លោកតារបស់ អឿ កាន្ត។ សុងក្លុត ខំប្រឹងចងមុង ហើយមានមោទនភាពជាខ្លាំង ដែលអាចចងមុងបានសម្រេច ខណៈដែល អឿ កាន្ត លួចអស់សំណើច ព្រោះមុងដែល សុងក្លុត ចង គ្រាន់តែប៉ះបន្តិច ក៏របូតធ្លាក់អស់។ ពេលនោះ សុងក្លុត ក៏បន្លប់ក្តីអៀនខ្មាស ដោយទាញ អឿ កាន្ត ចូលមកក្នុងមុងទាំងអស់គ្នា។ អ្នកទាំងពីរប្រឡែងគ្នាលេង ហើយ សុងក្លុត ក៏ឆ្លៀតថើបថ្ពាល់ អឿ កាន្ត មួយខ្សឺតធំតែម្តង។
ឆាកផ្អែមល្ហែមនេះ ចេមស៍ម៉ា ស្រស់សង្ហាជាមួយវ៉ែនតា-ស ខណៈដែល ម៉ារគី ទម្លាក់សក់វែង ជាអនាគតវេជ្ជបណ្ឌិត។ ចេមស៍ ព្យាយាមរៀនចងមុង ដែលខ្លួនមិនធ្លាប់ធ្វើ មុននឹងលើកដៃសំពះ សុំអនុញ្ញាតថើបថ្ពាល់ ម៉ារគី នៅក្នុងឆាក។ លុះពេលថតពិត ចេមស៍ ក៏ប្រកែកតវ៉ា ដោយត្រូវ ម៉ារគី បង្អាប់ ហើយទាញ ម៉ារគី ចូលមកផ្អឹបនឹងខ្លួនគេ រួចឱនចូលទៅរកថើបនាង។ តែពេលនោះជីងចក់ ស្រែកយំ ធ្វើឱ្យដាច់ចង្វាក់។ ម៉ារគី អៀន ចេមស៍ ឡើងមុខក្រហម ហើយឆ្លៀតឱកាសនោះ ចេមស៍ ក៏សើយមុងចេញទៅថើប ម៉ារគី មួយខ្សឺតធំ។
ពេលថតចប់ អ្នកដែលមុខក្រហមគួរតែជា ម៉ារគី ដែលត្រូវ ចេមស៍ ញាំញីផ្ទាល់។ ផ្ទុយទៅវិញ បែរជា ចេមស៍ ឯណោះទេដែលខ្មាសឡើងមុខក្រហម។ មិនដឹងថា ចាញ់សម្រស់ស្រីស្អាត ម៉ារគី ឬយ៉ាងម៉េច បានជាមានអាការរបៀបនេះ រហូតដល់ ម៉ារគី ចំអន់លេងថា “វាជាការសម្តែង មនុស្សរបស់បង (សង្សារ) ប្រាកដជាយល់”។ ហើយក្រុមថតក៏ផ្ទុះសំណើចគឹលតែម្តង៕