ទាក់ទងទៅនឹងករណីគ្រោះថ្នាក់ចរាចរណ៍ កាលពីយប់ម៉ោង១១ ថ្ងៃទី២៩ ខែមិថុនា នៅរសៀលថ្ងៃទី៣០ ខែមិថុនានេះ កញ្ញា PeyPey Ly បានចេញមុខ Live Video រយៈពេល៤៥នាទីនិង៣៥វិនាទី ដើម្បីបកស្រាយពីដំណើររឿងគ្រោះថ្នាក់ចរាចរណ៍ខាងលើ។
កញ្ញា PeyPey Ly បានបកស្រាយថា ករណីគ្រោះថ្នាក់ចរាចរណ៍រវាងរថយន្តតូយ៉ូតាព្រូស និងរថយន្ត Lexus RX-300 កាលពីយប់ថ្ងៃទី២៩ ខែមិថុនា ឆ្នាំ២០១៧ គឺគ្រាន់តែជារឿងចរាចរណ៍ប៉ះទង្គិចគ្នាបន្តិចបន្តួចប៉ុណ្ណោះ ហើយនាងទទួលស្គាល់ថា នាងពិតជាបានផឹកស្រាបន្តិចបន្តួចមែន ដោយផឹកអស់២កែវតូចល្មម ហើយទោះជាប្រាប់ថា នាងមិនស្រវឹង ក៏គ្មានអ្នកជឿដែរ ហេតុនេះនាងសុំធ្វើការសុំទោសជាសាធារណៈដល់មហាជនទូទៅពិសេសម្ចាស់ រថយន្ត Lexus RX-300 ផងដែរ និងសុំកុំឱ្យយកគំរូតាមនាងដែលស្រវឹងបើកបរ។
កញ្ញា PeyPey Ly បានបន្ថែមថា ចំពោះការដើរលេងយប់នេះ មិនមែនជាទម្លាប់របស់នាងនិងមិត្តភក្តិនោះទេ ព្រោះម្នាក់ៗសុទ្ធតែរវល់ធ្វើការងារ និងរកស៊ីរៀងៗខ្លួន លុះមានពេលបានជួបគ្នា ក៏នាំគ្នាទៅហូបចុក និងពិសាគ្រឿងស្រវឹងបន្តិចបន្តួចទៅ លុះពេលចេញមកវិញ ក៏ជួបនឹងគ្រោះថ្នាក់ជាយថាហេតុ តែមិនធ្ងន់នោះទេ គ្រាន់តែធ្វើឱ្យបែកស្តុបរថយន្ត Lexus RX-300 បន្តិចប៉ុណ្ណោះ។ ហើយក្រោយកើតហេតុ នាងនិងភាគីរថយន្ត Lexus RX-300 បានដោះស្រាយគ្នាដោយសន្តិវិធី ដោយខាងនាងបានសុំសងសំណងទៅភាគីរថយន្ត Lexus RX-300 ប៉ុន្តែត្រូវបានបុរសជាអ្នកបើកបរមិនព្រមទទួល លុះក្រោយពីពួកនាងទទូចសង ទើបខាងរថយន្ត Lexus RX-300 និយាយថា ឱ្យគាត់ប៉ុន្មានក៏បាន ក្រោយមក គាត់ក៏ប្រាប់ថា ឱ្យគាត់២៥ដុល្លារបានហើយ តែពួកនាងបានផ្តល់សំណងជូនគាត់ចំនួន៣០ដុល្លារ រួចក៏បែកផ្លូវគ្នាទៅផ្ទះរៀងៗខ្លួនតែម្តង ពោលគឺគ្មានការទាមទារសំណង១០០ដុល្លារ អីនោះទេ។
យ៉ាងណា កញ្ញា ភយេភយេ ឡយ បានអំពាវនាវដល់ប្រជាពលរដ្ឋទាំងអស់ ចូលរួមគោរពច្បាប់ចរាចរណ៍ និងកុំយកគំរូតាមនាងដែលបើកបរ ក្នុងស្ថានភាពស្រវឹង។
គួរបញ្ជាក់ផងដែរថា ករណីស្រីស្អាតហ្វេសប៊ុក PeyPey Ly បើករថយន្តបង្កគ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង១១យប់ ថ្ងៃទី២៩ ខែមិថុនា ឆ្នាំ២០១៧ តាមបណ្តោយផ្លូវព្រះសុរាម្រិត នៅចំណុចរង្វង់មូលសម្តេចសង្ឃ ជួន ណាត ស្ថិតក្នុងសង្កាត់ចតុមុខខណ្ឌដូនពេញ។
រថយន្តដែលជួបគ្រោះថ្នាក់ចរាចរណ៍ទាំង២គ្រឿង ១គ្រឿង ម៉ាកតូយ៉ូតាព្រូស (Toyota Prius) ពណ៌ទឹកប្រាក់ ពាក់ស្លាកលេខភ្នំពេញ 2AK-7109 បើកបរដោយតារាហ្វេសប៊ុក PeyPey Ly។ ចំណែករថយន្តមួយគ្រឿងទៀត ម៉ាក Lexus RX-300 ពណ៌ខ្មៅ ពាក់ស្លាកលេខ ភ្នំពេញ 2K-8231 បើកបរដោយបុរសម្នាក់មិនស្គាល់អត្តសញ្ញាណ៕