ក្រោយពេលចែកផ្លូវជាមួយលោកឆាគ្រីត បាន៦ខែ នាង វុនសេន វិរិធិផា បានក្លាយជាអ្នកមេម៉ាយក្តៅស្រួយ និងត្រូវបានចោមរោមដោយប្រុសៗត្រៀបត្រា តែនាងក៏តែងតែព្រលយពាក្យថា បេះដូងនាងនៅទំនេរជាដរាបមក។ តែម្តងនេះ វុនសេន កំពុងតែវិលត្រឡប់មកមានជីវិតស្រស់បស់ឡើងវិញ ដោយសារតែឥទ្ធិពល នៃសេចក្តីស្នេហាជាមួយនឹងបុរសថ្មីជាសេដ្ឋីពាន់លាន…។
ប្រភពព័ត៌មានមួយបានទម្លាយឱ្យអ្នកសារព័ត៌មានដឹងថា ថ្មីៗនេះ វុនសេន បានឡើងយន្តហោះទៅកម្សាន្តនៅប្រទេសបារាំង ដោយមានបុរសកូនកាត់ចិន ដ៏ស្រស់សង្ហាម្នាក់ទៅជាមួយ ដូចស្រមោលអន្ទោលតាមប្រាណ។ បុរសនោះមិនខុសពីអង្គរក្សបេះដូង ចាំដើរជួយយួរថង់អីវ៉ាន់ ដែល វុនសេន ទិញ ហើយថែមទាំងជូនកាដូអនុស្សាវរីយ៍ដល់រូបនាង ជាកាបូប យីហោ Hermes តម្លៃរាប់សែនបាតទៀតផង។ អ្នកកំលោះដៃទូលាយនោះ ក៏បាននាំនាងទៅមើលការប្រគំតន្ត្រី Bruno Mars ផងដែរ។
សូម្បីតែរូបស្អាតសិចស៊ីដែល វុនសេន ថតនៅប្រទេសបារាំង ក៏មានបុរសម្នាក់នេះ ស្ថិតនៅពីក្រោយ (ជួយថតឱ្យ) ហើយអ្នកទាំងពីរក៏បានបណ្តើរគ្នាទៅលេងនៅសិង្ហបុរី និងទទួលទានអាហារនៅហាងល្បីជាមួយគ្នាទៀតផង។
បុរសរូបសង្ហាដែលអាចគ្រងបេះដូងអ្នកមេម៉ាយក្តៅស្រួយ វុនសេន គឺកំលោះកូនកាត់ចិន លោកណៃ ប្រៈណៃ ទាយាទនៃត្រកូល ប្រៈប្រៈផា និងជាប្អូនប្រុសរបស់អភិជន ផក ដែលជាអ្នកធុរកិច្ចលំដាប់សេដ្ឋីពាន់លាន ម្ចាស់នៃ ក្លឹបហាត់ប្រាណ Base Bangkok។ អភិជនណៃ ម្នាក់នេះ ក៏ជាអ្នកជួយដល់ធុរកិច្ចក្រុមគ្រួសារក្នុងអាណាចក្រ Siam Motor Groups និងសណ្ឋាគារផងដែរ។ ក្នុងដំណើរទៅលំហែនៅប្រទេសបារាំងនោះ អ្នកឃើញហេតុការណ៍ បានបរិយាយថា វុនសេន បង្អួតភាពសិចស៊ីខ្លាំងណាស់នៅលើឆ្នេរខ្សាច់ទីក្រុងនីស ហាក់ចង់កម្តៅបេះដូងអ្នកកំលោះណៃ ឱ្យក្តៅរោលរាល។
មន្តស្នេហ៍ដ៏រោលរាលរបស់ វុនសេន វិរិធិផា ប្រហែលជាមិនពិបាកចងចិត្តសេដ្ឋីពាន់លានទេមើលទៅ។ ឯករណី ដែលថា បុរសអភិជននេះនឹងចូលខ្លួនមកជំនួសលោក ឆាគ្រីត យ៉ែមណាន ជួយបំពេញកង្វះខាតបេះដូងវុនសេន ឬយ៉ាងណា សូមប្រិយមិត្តរង់ចាំតាមដានតទៅទៀតចុះ…៕
