ក្នុងពិធីខួបកំណើតគម្រប់អាយុ១៥ឆ្នាំ នៅហាង”សប្បាយKTV” ម្ដុំរង្វង់មូលផ្សារដើមថ្កូវនៅរាត្រីថ្ងៃទី៨ ខែធ្នូ យប់មិញនេះតារាចម្រៀងកញ្ញាសោភា ទេពី ទទួលបានកាដូរថយន្តម៉ាកTundra 2010 តម្លៃជាង៤ម៉ឺនដុល្លារ ពីលោកផ្កាយ២ ដែលជាឪពុកបង្កើតរបស់នាងគួរឲ្យភ្ញាក់ផ្អើល។
ខណៈដែលអាជីពចម្រៀងកំពុងតែស្ទុះឡើងមានឱកាសចេញច្រៀងតាមកម្មវិធីប្រគំតន្ត្រីជាច្រើននោះយប់មិញនេះកញ្ញាសោភា ទេពី បានធ្វើខួបយ៉ាងកាលីបមួយនៅ”សប្បាយKTV”ដែលជាហាងបងស្រីរបស់នាងហើយភ្ញៀវ ដែលអញ្ជើញចូលរួមមិនតម្រូវឲ្យចងដៃទៀតផង។ប៉ុន្តែអ្វីដែលគួរឲ្យភ្ញាក់ផ្អើលទៀតនោះនាងត្រូវបាន ឪពុកដែលមានឋានៈផ្កាយ២បានឲ្យកាដូរថយន្តទំនើបម៉ាកTundra តម្លៃជាង៤ម៉ឺនដុល្លារ គួរឲ្យភ្ញាក់ផ្អើលគឺឪពុករបស់នាងបានប្រគល់សោឡាននៅក្រោយពេលកាត់នំខេក។ភ្ញៀវកិត្តិយសក៏ដូចជាមិត្តភក្ដិក្នុងសិល្បៈដែលបានចូលរួមបានសម្ដែងការត្រេកអរហើយនាងក៏រំភើបចិត្តបំផុតដែរនៅពេលដែលឪពុករបស់នាងឲ្យកាដូដែលនាងពេញចិត្តបំផុតនិងនឹកស្មានមិនដល់។
តារាស្រស់ក្មេងកញ្ញាសោភា ទេពី បានថ្លែងឲ្យដឹងថា នាងក៏មិននឹកស្មានថាប៉ារបស់នាងធ្វើឲ្យនាងភ្ញាក់ផ្អើល បែបនេះដែលជាលើកទី១ហើយដែលនាងទទួលបានកាដូលើកទឹកចិត្តដែលមានតម្លៃថ្លៃបែបនេះគឺនាងពិតជារំភើបចិត្តយ៉ាងក្រៃលែងហើយនាងក៏ចង់បញ្ជាក់ថានាងស្រលាញ់ប៉ាស្រលាញ់ម៉ាក់និងក្រុមគ្រួសារទាំងមូល។នាងថាមិនចង់ធ្វើខួបជាទ្រង់ទ្រាយធំជាងនេះទេគឺគ្រាន់តែចង់ជួបជុំគ្រួសារនិងមិត្តភក្ដិដែលជិតស្និតបង្កើនការរាប់អានឲ្យកាន់តែស្និតស្នាលតែប៉ុណ្ណោះ។
សោភា ទេពី បានប្រឡូកសិល្បៈតាមរយៈការរាំរបាំ តាំងពីអាយុ៩ឆ្នាំ ហើយនាពេលចុងក្រោយនេះនាងទាញបានភាព លេចធ្លោតាមរយៈអាជីពចម្រៀងដែលមានឱកាសចេញច្រៀងតាមកម្មវិធីប្រគំតន្ត្រីតូចធំជាច្រើនខណៈដែលអ្នកគ្រប់គ្រង់កម្មវិធីប្រគំតន្ត្រីបានលើកសរសើរពីទឹកដមសំឡេងរបស់នាងមិនដាច់ពីមាត់។ប៉ុន្តែទន្ទឹមនឹងនោះនាងបានបង្ហើបពីក្តីស្រមៃថា នាងចង់ឈោងចាប់អាជីព សម្ដែងមួយទៀត គឺនាងនឹងចាប់ទាំងអាជីពសម្ដែងនិងផ្នែកចម្រៀងហើយក៏មិនបោះបង់ផ្នែករបាំផងដែរ៕
