ភ្នំពេញ៖ ប្រទះឃើញសពអណ្តែតទឹកបឹងកំប្លោក ទាំងដៃចងស្លាបដេកទៅក្រោយ ត្រូវប្រជាពលរដ្ឋអះអាងថា សពជាជនសង្ស័យគាស់បន្ទប់ជួល ត្រូវបានប្រជាពលរដ្ឋវាយ ហើយជន សង្ស័យរត់គេចទៅចូលក្នុងទឹកបឹង បណ្តាលឲ្យលង់ស្លាប់ បង្កឲ្យមានការភ្ញាក់ផ្អើល កាលពីវេលាម៉ោង១០ព្រឹក ថ្ងៃទី១០ ខែកក្កដា នៅក្នុងទឹកបឹងកំប្លោក ភូមិដំណាក់ធំ៣ សង្កាត់ ស្ទឹងមានជ័យ ខណ្ឌមានជ័យ។
សពមានឈ្មោះបាល់ ណារ៉ូ ភេទប្រុស អាយុ១៦ឆ្នាំ ស្នាក់នៅផ្ទះជួលម្តុំកន្លែងកើតហេតុខាងលើ មានស្រុកកំណើតនៅភូមិត្រពាំងក្រូច ឃុំព្រៃកប្បាស ស្រុកព្រៃកប្បាស ខេត្ត
តាកែវ។
ប្រភពព័ត៌មានបានឲ្យដឹងថា បន្ទាប់ពីក្រុមគ្រួសារជនរងគ្រោះខាងលើបាត់មិនឃើញត្រឡប់ទៅផ្ទះវិញ ក៏បានដើររកតាំងពីថ្ងៃទី៨ ខែកក្កដា តែរកមិនឃើញ គ្រាន់តែដឹងថា មានប្រជាពលរដ្ឋនាំគ្នាដេញវាយរត់ទៅពួននៅចំណុចកើតហេតុ ក៏បានទៅរកម្តងមកហើយ តែរកមិនឃើញ ទើបតែនៅព្រឹកថ្ងៃទី១០ ខែកក្កដា ទៅរកម្តងទៀត បានប្រទះឃើញសព អណ្តែតទឹកទាំងដៃចងស្លាបសេកជាប់ទៅក្រោយ ក៏បានរាយការណ៍ទៅសមត្ថកិច្ចមូលដ្ឋានចុះទៅពិនិត្យ ។
បើតាមប្រជាពលរដ្ឋរស់នៅក្នុងភូមិកើតហេតុ បានឲ្យដឹងថា កាលពីវេលាម៉ោង៤រសៀល ថ្ងៃទី០៨ ខែកក្កដា ជនរងគ្រោះខាងលើនេះបានធ្វើសកម្មភាពគាស់បន្ទប់ជួលរបស់ប្រជាពលរដ្ឋបានសម្រេច ហើយរត់មិនរួច ក៏ស្រែកផ្អើលនាំគ្នាព័ន្ធចាប់បានចងស្លាបសេក វាយទ្រមខ្លួន ប៉ុន្តែជនសង្ស័យព្យាយាមរត់គេចលោតចុះទឹកបឹងមានស្មៅច្រើន គេចខ្លួនបាត់រកមិនឃើញ ប្រជាពលរដ្ឋក៏នាំគ្នាឈប់តាមរកបន្តទៀតរហូតដល់វេលាម៉ោង១០ព្រឹក ថ្ងៃទី១០ ខែកក្កដា ត្រូវបានបងប្រុសបង្កើតដើររកនៅកន្លែងកើតហេតុបានប្រទះឃើញសាកសពក្នុងទឹកកប់កំប្លោក ទើបផ្អើលដល់សមត្ថកិច្ច ។
ដោយឡែក នគរបាលប៉ុស្តិ៍ស្ទឹងមានជ័យ បានឲ្យដឹងថា ករណីខាងលើនេះមិនទាន់ដឹងថាជាករណីឃាតកម្ម ឬក៏ប្រជាពលរដ្ឋនាំគ្នាវាយដូចការអះអាងរបស់ប្រជាពលរដ្ឋនៅឡើយទេ ព្រោះកាលពីថ្ងៃទី៨ ខែកក្កដា ប្រជាពលរដ្ឋអះអាងថាមានចោរគាស់ផ្ទះនោះ មិនមានប្រជាពលរដ្ឋរាយការណ៍ ឬប្តឹងសមត្ថកិច្ចទេ។ ជុំវិញករណីខាងលើនេះ សមត្ថកិច្ចកំពុងតែធ្វើការស្រាវជ្រាវបន្តទៀត ។ សពសមត្ថកិច្ចបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីនៅវត្តសំបួរមាស ៕
