ភ្នំពេញ ៖ ជនសង្ស័យម្នាក់ឃើញទូរស័ព្ទដាក់នៅលើតុក្នុងផ្ទះពេទ្យធ្មេញ ឆ្លៀតឱកាសឆក់យកបាន ហើយព្យាយាមរត់គេច ម្ចាស់ឃើញទាន់ស្រែកផ្អើលពលរដ្ឋក្បែរខាង ដេញចាប់ស្វាគមន៍វាយសំពងប៉ោងមាត់ រួចប្រគល់ឲ្យប៉ូលីស កាលពីវេលាម៉ោង៥ល្ងាច ថ្ងៃទី១៦ ខែកក្កដា ឆ្នាំ២០១៧ ស្ថិតនៅមុខផ្ទះពេទ្យធ្មេញ ផ្សារឯករាជ្យ១ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យឈ្មោះ មាច មិនា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះជួលភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតភូមិផ្សារឆ្នាំង សង្កាត់ផ្សារឆ្នាំង ខេត្តកំពង់ឆ្នាំង ។ ចំណែកជនរងគ្រោះជាម្ចាស់ទូរស័ព្ទ ជាម្ចាស់ផ្ទះពេទ្យធ្មេញ មិនបានមកដាក់ពាក្យបណ្តឹងឡើយ ក្រោយពីយកបានទូរស័ព្ទវិញ ទុកឲ្យប៉ូលីសចាត់ការទៅតាមនីតិវិធី ។ ដោយឡែក ទូរស័ព្ទដែលជនសង្ស័យប៉ុនប៉ងលួច ម៉ាក iPhone 6 Plus ត្រូវបានម្ចាស់យកវិញហើយ ។
តាមប្រភពបានឲ្យដឹងថា មុនកើតហេតុ ជនសង្ស័យចូលទៅផ្ទះពេទ្យធ្មេញ ឃើញទូរស័ព្ទម្ចាស់ផ្ទះទុកចោលលើតុ ក៏ឆក់យកបាន ហើយរត់គេចខ្លួន ត្រូវបានម្ចាស់ឃើញទាន់ស្រែកចោរ ផ្អើលពលរដ្ឋដេញចាប់បានភ្លាមៗ សំពងយ៉ាងចាស់ដៃ រួចប្រគល់ឲ្យប៉ូលីស ។
តាមការរៀបរាប់ជនសង្ស័យបានឲ្យដឹងថា មុនកើតហេតុ ខ្លួនទៅផ្ទះពេទ្យធ្មេញ ក្នុងគោលបំណងឲ្យគ្រូពេទ្យប៉ះធ្មេញ ដោយអង្គុយរងចាំយូរ ហើយក្រឡេកឃើញទូរស័ព្ទម្ចាស់ផ្ទះទុកលើតុចោល មានចិត្តស្រឡាញ់ចង់បាន ក៏ឆ្លៀតឱកាសឆក់យកបាន ហើយព្យាយាមរត់គេចត្រូវបានម្ចាស់ដេញតាមស្រែក ផ្អើលប្រជាពលរដ្ឋចាប់ខ្លួនប្រគល់ឲ្យប៉ូលីស ។
ជនសង្ស័យក្រោយពីឃាត់ខ្លួនបាននាំទៅសាកសួរនៅប៉ុស្តិ៍ចោមចៅ ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានខណ្ឌ ចាត់ការបន្តទៅតាមនីតិវិធី ៕