ភ្នំពេញ៖ បុរសវ័យជាង៣០ឆ្នាំ ស្រវឹងស្រាតូចចិត្តអត់មានលុយទិញស្រាស២លីត្រផឹកថែមទៀតបានសម្រេចទៅលោតទឹកស្ពានជ្រោយចង្វារ សម្លាប់ខ្លួនមិនបានសម្រេច ត្រូវសមត្ថកិច្ចឃាត់ទាន់ បង្កឲ្យមានការកកស្ទះចរាចរណ៍កាលពីវេលាម៉ោង៧និង៣០នាទីព្រឹក ថ្ងៃទី១៦ ខែ
កក្កដា ឆ្នាំ២០១៧ នៅលើស្ពានជ្រោយចង្វារ ស្ថិតនៅក្នុងសង្កាត់ស្រះចក ខណ្ឌដូនពេញ។
តាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថា មុនពេលកើតហេតុគាត់បានឃើញបុរសម្នាក់វ័យជាង៣០ឆ្នាំ ក្នុងស្ថានភាពស្រវឹងស្ រាដើរពីរង្វង់មូលគួចកាណុង មកដល់លើស្ពានជ្រោយចង្វា របានផ្លោះបង្កាន់ដៃស្ពានចុះទៅអង្គុយនៅលើរ៉ូប៊ីណេទុយោទឹក បម្រុងនឹងលោតទឹកសម្លាប់ ធ្វើឲ្យអ្នកធ្វើដំណើរឆ្លងកាត់លើស្ពានជ្រោយចង្វារ នាំគ្នាឈប់ចោមរោមគ្រប់គ្នា បង្កឲ្យកកស្ទះចរាចរណ៍ ។
ប្រភពព័ត៌មានបានឲ្យដឹងទៀតថា បន្ទាប់ពីឃើញបុរសខាងលើអង្គុយប៉ុនប៉ងលោតទឹកសម្លាប់ខ្លួនបែបនេះ កម្លាំងនគរបាលខណ្ឌដូនពេញ សហការជាមួយនគរបាលខណ្ឌជ្រោយចង្វារ បាននិយាយលួងលោមកុំឲ្យលោតទឹកសម្លាប់ខ្លួន មានរឿងអីដោះស្រាយមិនចេញ បានជាទៅលោតទឹកសម្លាប់ខ្លួន ក៏ត្រូវបុរសរូបនោះប្រាប់ថា ដោយសារតែគេអត់មានលុយទិញស្រាផឹក ទើបគេសម្រេចចិត្តទៅលោតទឹកសម្លាប់ខ្លួន ។ បើសិនជាចង់ឲ្យគេឡើងទៅលើវិញ ត្រូវទិញស្រាស២លីត្រ យកមកគេ ទើបគេព្រមឡើង ពេលនោះសមត្ថកិច្ចបានទិញស្រាស២លីត្រ ច្រកថង់យកមកបង្ហាញ និងនិយាយលួង ទើបចាប់បុរសខាងលើទាញយកមកលើស្ពានវិញបាន ។
បន្ទាប់ពីឃាត់បុរសដែលប៉ុនប៉ងលោតទឹកសម្លាប់ខ្លួនដោយសារតែអត់មានលុយសម្រាប់ទិញស្រាស២លីត្រផឹក បាននាំខ្លួនយកទៅសួរនាំ ធ្វើការអប់រំ និងកិច្ចសន្យានៅប៉ុស្តិ៍នគរបាលស្រះចក រួចហើយឲ្យត្រឡប់ទៅផ្ទះវិញ ៕
