ភ្នំពេញ ៖ ជាងជួសជុលម៉ូតូម្នាក់រងរបួសធ្ងន់បាក់ឆ្អឹងជំនី ត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅសង្រ្គោះនៅមន្ទីរពេទ្យកាល់ម៉ែត្រភ្លាមៗ ខណៈដែលជនរងគ្រោះកំពុងអង្គុយជួសជុលឲ្យភ្ញៀវ ស្រាប់តែមានរថយន្តហ្វ័តរបស់ក្រុមហ៊ុនដឹកអ្នកដំណើរមួយគ្រឿង បើកបោះពួយល្បឿនលឿន សង្ស័យអ្នកបើកបរងោកមួយភាំង ទើបរេចង្កូតជ្រុលបុកចូលតូបជួសជុលម៉ូតូ កាលពីវេលាម៉ោង១០និង៥០នាទីព្រឹក ថ្ងៃទី១៦ ខែកក្កដា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៣ ភូមិព្រៃព្រីងត្បូង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះ ឃុន ខុម ភេទប្រុស អាយុ៥៥ឆ្នាំ មុខរប ជាងជួសជុលម៉ូតូ មានទីលំនៅ កន្លែងកើតហេតុ រងរបួសធ្ងន់ធ្ងរបាក់ឆ្អឹងជំនី ។ ចំណែករថយន្តបង្ក ម៉ាកហ្វ័ត ពណ៌ខ្មៅ ពាក់ស្លាកលេខ ភ្នំពេញ 2Z-3506 ជារថយន្តក្រុមដឹកអ្នកដំណើរ VIP អ្នកបើកបរមិនស្គាល់ឈ្មោះ ។
តាមប្រភពនៅកន្លែងបានឲ្យដឹងថា មុនកើតហេតុ រថយន្តបង្កបើកបរតាមផ្លូវជាតិលេខ៣ ពីត្បូងទៅជើង ដល់ចំណុចខាងលើ សង្ស័យអ្នកបើកបរងោកមួយភាំង ទើបរេចង្កូតទាញជ្រុលបុកចូលតូបជួសជុលម៉ូតូ បណ្តាលឲ្យជាងកំពុងអង្គុយជួសជុលឲ្យភ្ញៀវរងរបួសធ្ងន់ ម៉ូតូ និងសម្ភារៈផ្សេងទៀតរងការខូចខាត ។
ក្រោយកើតហេតុ ជនរងគ្រោះត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យកាល់ម៉ែត ចំណែកអ្នកបើកបររថយន្តបង្កវិញក្រោយកើតហេតុ មិនបានរត់គេចខ្លួនទៅណាដែរ ជួយមើលជនរងគ្រោះ និងសុំសម្របសម្រួលជាមួយភាគីរងគ្រោះ ធានាចេញថ្លៃព្យាបាលទាំងស្រុង និងចេញសងរាល់ការខូចខាតសម្ភារៈទាំងអស់ ដើម្បីបញ្ចប់រឿង មិនឲ្យសមត្ថកិច្ចខ្វល់ឡើយ ៕
