ភ្នំពេញ៖ បុរសម្នាក់តូចចិត្តស្រឡាញ់ប៉ះប្រពន្ធគេហើយជាស្រីបោកប្រាស់ទៀត បានសម្រេចលាម្តាយពីស្រុកកំណើតមកធ្វើការសំណង់បានមួយថ្ងៃ រត់ទៅលោតទឹកលើស្ពានជ្រោយចង្វារ មិនបានសម្រេច យប់ឡើងទៅអារកសម្លាប់ខ្លួន នៅតែមិនបានសម្រេចទៀត ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី១៨ ខែ
កក្កដា ឆ្នាំ២០១៧ នៅចំណុចបន្ទប់ជួលផ្ទះឡ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
បុរសដែលលោតទឹកសម្លាប់ខ្លួនមិនបានសម្រេច ហើយរត់ទៅអារកសម្លាប់ខ្លួន មានឈ្មោះ បាន វុទ្ធី អាយុ២៨ឆ្នាំ មុខរបរកម្មករសំណង់ ស្នាក់នៅម្តុំកាណាឌីយ៉ា ផ្លូវវេងស្រេង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិប្រឡាយ ឃុំបឹងខ្យាង ស្រុក
កណ្តាលស្ទឹង ខេត្តកណ្តាល។
តាមប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុមានប្រជាពលរដ្ឋបាន មករាយការណ៍នៅប៉ុសិ៍្ត២៤ម៉ោងថា មានបុរសម្នាក់អារកសម្លាប់ខ្លួននៅបន្ទប់ជួលផ្ទះឡ ពេលសមត្ថកិច្ចចុះទៅដល់ឃើញបុរសខាងលើកំពុងតែកាន់កាំបិតចិតបន្លែមុខ២ អារកជិតដាច់បំពង់កទៅហើយ ក៏បានដកយកកាំបិតមកទុក ហើយបានទាក់ទងហៅរថយន្ត សង្គ្រោះមកដឹកយកទៅព្យាបាលនៅគ្លីនិកបែកចាន ប៉ុន្តែមុននឹងរថយន្តសង្គ្រោះមកដល់ សមត្ថកិច្ចបានសួរនាំថា ហេតុអីបានជាសម្រេចចិត្តអារកសម្លាប់ខ្លួន? ត្រូវបុរសដែលជាអ្នក អារកបាននិយាយទាំងសម្លេងខ្សាវៗថា ពិបាកចិត្តរឿងគ្រួសារបស់គាត់ជំពាក់លុយគេច្រើនពេក ទើបដាច់ចិត្តអារកសម្លាប់ខ្លួន ។
បន្ទាប់ពីកើតហេតុអ្នកឃើញហេតុការណ៍បានទាក់ទងទៅសាច់ញាតិមកដល់ បានទៅតាម រកបុរសអារកនៅមន្ទីរពេទ្យព្រះកុសុមៈ ព្រោះអត់ដឹងថារថយន្តសង្គ្រោះដឹកយកទៅព្យាបាលនៅគ្លីនិកបែកចាន ។ បើតាមសម្តីសាច់ញាតិបានប្រាប់អ្នកយកព័ត៌មាននៅមន្ទីរពេទ្យព្រះកុសុមៈបានឲ្យដឹងថា បុរសដែលអារកសម្លាប់ខ្លួននេះកន្លងមកធ្លាប់ធ្វើជាសន្តិសុខក្រុមហ៊ុនឯកជននៅភ្នំពេញ ។ លុះក្រោយមកបានទៅចំការឲ្យគេនៅខេត្តស្ទឹងត្រែង ទើបនឹងវិលត្រឡប់មកភ្នំពេញវិញ នៅថ្ងៃទី១៥ ខែកក្កដា កន្លងមកនេះ ដោយស្នាក់នៅជាមួយបងប្អូននៅផ្ទះជួលក្បែរកន្លែងកើតហេតុ ។
សាច់ញាតិបានបន្តទៀតថា បុរសខាងលើមានជំងឺខូចចិត្តដោយសារតែស្រលាញ់ស្រីម្នាក់ នាងកុហកថានៅក្រមុំ ហើយត្រូវបោកយកលុយចាយវាយអស់ប្រាក់ជាច្រើន ទម្រាំតែសាច់ញាតិដឹងបានប្រាប់ថា នាងមានប្តីរួចហើយ បើមិនជឿទេតាមដាននឹងហើយ ពេលរូបគេតាមដានដឹងថាមនុស្សស្រីដែលគេស្រឡាញ់មានប្តីរួចហើយ មានការខូចចិត្តយ៉ាងខ្លាំង ក៏បានមកធ្វើការសំណង់នៅភ្នំពេញ មិនទាន់បានមួយថ្ងៃផង ដោយធ្វើនៅម្តុំសារមន្ទីរទួលស្លែង ក្នុងខណ្ឌចំការមន ។ នៅវេលាម៉ោង៤ល្ងាច បានសុំមេការសំណង់ចុះពីលើការដ្ឋានទៅទិញកាហ្វេហូប ស្រាប់តែទៅបាត់រហូត ។
បើតាមប្រភពព័ត៌មានបានឲ្យដឹងថា នៅវេលាម៉ោង៥និង៣០នាទីល្ងាច ថ្ងៃទី១៨ ខែកក្កដា បុរសខាងលើនេះបានជិះម៉ូតូឌុបទៅលោតទឹកនៅស្ពានជ្រោយចង្វារចាស់ ខណៈពេលលោតចូលដល់ក្នុងទឹកបុរសនោះចេះហែលទឹកបានហែលទៅត្រើយខាងកើត ឡើងមកច្រាំងវិញ ។ លុះដល់ម៉ោងកើតហេតុខាងលើ ស្រាប់តែឃើញបុរសរូបនេះដដែលទៅអារកសម្លាប់ខ្លួន បណ្តាលឲ្យរយះបំពង់កជិតដាច់ ត្រូវប្រជាពលរដ្ឋនិងសមត្ថកិច្ចជួយអន្តរាគមន៍ទាន់ពេលវេលា ដឹកបញ្ជូនទៅសង្គ្រោះនៅគ្លីនិកបែកចាន ៕