ភ្នំពេញ ៖ ស្រ្តីម្នាក់ក្នុងស្ថានភាពរបួសធ្ងន់ធ្ងរ ក្រោយពីជួបគ្រោះថ្នាក់ចរាចរណ៍ ខ្វាយខ្វល់គ្មានលុយមួយរៀលសម្រាប់ព្យាបាលរបួស ព្រោះគ្រួសារក្នុងជីវភាពក្រតោកយ៉ាកលំបាក ដើររើសអេតចាយ ចិញ្ចឹមគ្រួសារមិនគ្រប់ ឆ្លៀតទទទួលយកពោតស្ងោរគេដើរលក់តាមកង់ ក៏ជួបគ្រោះថ្នាក់ចរាចរណ៍ ម៉ូតូបើកបុកពីក្រោយដួល ហើយមានម៉ូតូមួយគ្រឿងទៀតបើកបុកបន្ថែម ខណៈដែលកំពុងដេកដួល ម៉ូតូទាំង២គ្រឿងបើករត់គេចបាត់អស់ ទោះជាស្រែកស្នើសុំឲ្យអ្នកជួយតាមឃាត់ម៉ូតូបង្កមិនបានផង កាលពីវេលាម៉ោង៧និង៤០នាទីព្រឹក ថ្ងៃទី២២ ខែកក្កដា ឆ្នាំ២០១៧ ស្ថិតនៅតាមផ្លូវ៣០ម៉ែត្រ ច្រកចូលបុរីសន្តិភាព២ ភូមិត្រាំដោក សង្កាត់ពងទឹក ខណ្ឌដង្កោ ។
ស្រ្តីរងគ្រោះ ឈ្មោះ ស៊ុន រិន អាយុ៤៣ឆ្នាំ មុខរបរដើររើសអេតចាយ និងឆ្លៀតទទួលយកពោតគេដើរលក់ គ្រាន់បានកម្រៃបន្ថែម មានប្តីឈ្មោះ ពន់ ពុធ អាយុ៤៦ មុខរបរដើររើសអេតចាយ មានកូនចំនួន៦នាក់ ប្រុស១នាក់ ស្រី៥នាក់ តូចៗឲ្យរញ៉ង់ រស់នៅក្នុងបន្ទុកគ្រួសារ ស្នាក់នៅផ្ទះជួល ភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ មានស្រុកកំណើតភូមិអង្គជា ឃុំស្មោងខាងត្បូង ស្រុកកំចាយមារ ខេត្តព្រៃវែង ។
តាមការយំរៀបរាប់ពីស្រ្តីរងគ្រោះ បានស្តែងឲ្យដឹងថា គាត់មានជីវភាពក្រីក្រលំបាកតោកយ៉ាក ជាមួយប្តីប្រពន្ធកូនតូចៗ៦នាក់ ក្នុងរបរដើររើសអេតចាយ និងសុីឈ្នួលធ្វើនេះធ្វើនោះឲ្យគេ ដោយសារជួបបញ្ហាខ្វះខាតចិញ្ចឹមផ្គង់ផ្គង់គ្រួសារ ក៏បានឆ្លៀតពេលទំនេរទទួលពោតស្ងោរពីអ្នកភូមិ ដើរលក់តាមកង់ គ្រាន់បានកម្រៃចំណូលបន្ថែម តែជាគ្រោះអកុសល គ្រាដែលអត់មាននលុយមួយរៀលហើយ ខណៈដែលកំពុងធាក់កង់ដើរលក់ពោត ត្រូវបានម៉ូតូមួយគ្រឿង បើកមកបុកពីក្រោយដួល ហើយមានម៉ូតូក្មេងស្រីម្នាក់ទៀត បើកមកបុកកិនបន្ថែម បណ្តាលឲ្យរងរបួស ក្រោយកើតហេតុ ម៉ូតូបង្កទាំងពីរគ្រឿង លើកម៉ូតូបើករត់គេចបាត់អស់ ។
តាមពលរដ្ឋឃើញហេតុការណ៍បានឲ្យដឹងថា មុនកើតហេតុ ស្រ្តីរងគ្រោះធាក់កង់ដើរលក់ពោត ចេញពីបុរីសន្តិភាព២ កាត់តាមផ្លូវបេតុង ពីត្បូងទៅជើងសំដៅឡើងផ្លូវ៣០ម៉ែត្រ ស្រាប់តែមានម៉ូតូមួយគ្រឿងបើកដោយបុរសម្នាក់ បើកបុកពីក្រោយដួលហើយ ត្រូវបានម៉ូតូក្មេងស្រីសិស្សសាលា មួយគ្រឿងទៀតបើកបុកកិនបន្ថែម បណ្តាលឲ្យរងរបួសធ្ងន់ ក្រោយកើតហេតុ ម៉ូតូបង្កទាំង២គ្រឿង នាំគ្នាលើកបើករត់គេចបាត់អស់ បន្សល់ទុកតែជនរងគ្រោះនៅកន្លែងកើតហេតុ ។
ស្រ្តីរងគ្រោះក្រោយកើតហេតុត្រូវបានបងប្អូនប្រជាពលរដ្ឋហៅរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យព្រះកុសុមៈ ចំណែកកង់និងផ្លែពោតកំពប់រាយ ត្រូវបានពលរដ្ឋរាយការណ៍ប្រាប់នគរបាលមកយកទៅរក្សាទុកនៅប៉ុស្តិ៍ប៉ូលីស ៕
