ភ្នំពេញ ៖ រថយន្តតូយ៉ូតាព្រុសមួយគ្រឿង បានបើកបោះពួយក្នុងល្បឿនលឿន ជ្រុលចង្កូតទៅបុកក្បាលនាគពុះចែកផ្លូវ បណ្ដាលឲ្យបាក់អស់ចំនួន២កង់ តែមិនសំណាងល្អមិនគ្រោះថ្នាក់ដល់អ្នកបើកបរនិងអ្នករួមដំណើរ ហេតុការណ៍នេះកើតឡើងនៅវេលាម៉ោង៩និង៤០នាទីយប់ ថ្ងៃទី២៨ខែកក្កដា ឆ្នាំ២០១៧ នៅក្បែរវិទ្យាស្ថានវ៉ាន់ដាគណនេយ្យ តាមផ្លូវម៉ៅសេទុង សង្កាត់ទួលស្វាយព្រៃ១ ខណ្ឌចំការមន។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាកតូយ៉ូតាព្រុស ពណ៌ខ្មៅ ពាក់ស្លាកលេខភ្នំពេញ 2R-8060 ជិះគ្នា៤នាក់ ប្រុស៣នាក់និងស្រីម្នាក់ មិនដឹងថាចេញពីកម្មវិធីជួបជុំគ្នានៅកន្លែងណានោះទេ បានធ្វើដំណើរតាមផ្លូវម៉ៅសេទុងក្នុងទិសដៅពីត្បូងទៅជើង ក្នុងល្បឿនលឿន ខណៈមកដល់ចំណុចកើតហេតុ ដោយសារតែអ្នកបើកបរស្រវឹងផងនោះ បានរេចង្កូតជ្រុលទៅបុកក្បាលនាគពុះចែកផ្លូវ បណ្ដាលឲ្យបាក់និងវៀចអស់ចំនួន២កង់ និងធ្វើឲ្យរថយន្តក្រពិតថ្ពាល់មុខចំហៀងខាងស្ដាំ និងបាក់រ៉ូទីលខាងស្តាំ ធ្វើឲ្យរថយន្តរេចង្កូតឡើងលើចិញ្ចើមផ្លូវ តែសំណាងល្អមិនមានគ្រោះថ្នាក់ដល់អ្នកជិះក្នុងរថយន្ត និងអ្នកធ្វើដំណើរដទៃទៀត។
ប្រភពដដែលបានបន្តទៀតថា បន្ទាប់ពីបង្កហេតុរួច គេឃើញអ្នកបើករថយន្តនិងអ្នករួមដំណើរបាននាំគ្នាចុះពីលើ រួចហើយបានគ្នាគេចខ្លួនបាត់អស់ ដោយបន្សល់ទុករថយន្តនៅកន្លែងកើតហេតុ។
ក្រោយពេលកើតហេតុរថយន្តបង្កត្រូវបានសមត្ថកិច្ចជំនាញមកស្ទូចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនទៅដោះស្រាយ៕
