ភ្នំពេញ ៖ កម្មការិនីកាត់ដេរអាយុទើប១៥ឆ្នាំម្នាក់ ចាញ់បោកប្រុសព្រានលួងលោមនាំចូលផ្ទះសំណាក់មួយយប់ ចាប់បង្ខំរួមរ័កបានសម្រេច៣ដង ហើយគេចខ្លួនបាត់បន្សល់ទុកម៉ូតូមួយគ្រឿង ត្រូវសាច់ញាតិជិះយកទៅដាក់ពាក្យបណ្តឹងនៅប៉ុស្តិ៍នគរបាលចោមចៅ កាលពីវេលាម៉ោង៩យប់ ថ្ងៃទី២៨ ខែកក្កដា ឆ្នាំ២០១៧ ស្ថិតនៅខាងក្រោយផ្សារកាណាស៊ីធី ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។
នារីចាញ់ល្បិចប្រុសស្នេហ៍មានឈ្មោះ ហ ស ព អាយុ១៥ឆ្នាំ មុខរបរកម្មកររោងចក្រ ស្នាក់នៅផ្ទះជួលជាមួយម្តាយមីងក្នុងសង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅស្រុកបរិបូរណ៍ ខេត្តកំពង់ឆ្នាំង ។ ចំណែកប្រុសស្នេហ៍គ្រាន់តែស្គាល់ឈ្មោះ វី អាយុជាង២០ឆ្នាំ មុខរបរ កម្មកររោងចក្រជាមួយគ្នា ស្នាក់នៅផ្ទះជួលក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ក្រោយពីដឹងសភាពមិនស្រួល ក្រុមគ្រួសារក្មេងស្រីតាមទាន់ដឹងរឿងហើយ បើមិនជាប់ខ្នោះក៏ច្រវ៉ាក់ មានតែម្យ៉ាងរត់គេចខ្លួនបាតជើងសព្រាត បន្សល់ទុកតែម៉ូតូមួយគ្រឿង ម៉ាក zoomer ពណ៌សលាយខ្មៅ ពាក់ស្លាកលេខភ្នំពេញ 1CS-6414។
តាមសម្តីក្មេងស្រីរងគ្រោះបានឲ្យដឹងថា រូបនាងទើបនឹងចូលធ្វើការរោងចក្របានជិត១ខែ ហើយបានស្គាល់គ្នាជាមួយជនសង្ស័យខាងលើ រាប់អានជិតដិតទើបតែ៥ទៅ៦ថ្ងៃចុងក្រោយនេះហើយជនសង្ស័យបានសារភាពសុំស្រឡាញ់នៅល្ងាចថ្ងៃទី២៧ ខែកក្កដា ឆ្នាំ២០១៧ ។ បន្ទាប់ពីសារភាពស្នេហាហើយ យុវជនបានណាត់រូបនាងទៅដើរលេងនៅវេលាម៉ោង៥ល្ងាចថ្ងៃដដែល ដោយទៅដើរជាមួយមិត្តភក្តិផ្សេងទៀត សរុបគ្នា៦នាក់ ប្រុស៣នាក់ ស្រី៣នាក់ ជិះម៉ូតូ៣គ្រឿង ទៅហូបអាហារនៅមុខសណ្ឋាគារណាហ្គាវើលដ៍ សង្កាត់ទន្លេបាសាក់ រហូតដល់វេលាម៉ោង៩និង៣០នាទីយប់ ទើបនាំគ្នាវិលត្រឡប់មកផ្ទះជួលរៀងៗខ្លួនវិញ ។ ដោយឡែកតែរូបនាងត្រូវបានជនសង្ស័យឈ្មោះ វី មិនបានឌុបទៅផ្ទះជួលទេ បែរជាឌុបទៅផ្ទះសំណាក់៣ដុល្លារ ស្ថិតនៅមុខផ្សារត្រពាំងថ្លឹង តាមផ្លូវវេងស្រេង ហើយនិយាយល្បួងលួងលោមឲ្យនាងចូលបន្ទប់ផ្ទះសំណាក់ ទោះជានាងបដិសេធ នៅតែយុវជនរូបនេះបង្ខំឲ្យចូល ដោយសន្យាថាពាក្យ «មិនអីទេអូន បងទទួលខុសត្រូវ » គួបផ្សំនឹងយប់កាន់តែជ្រៅផងនោះ បាក់ជឿទុកចិត្ត ត្បិតប្រុសបងបង្ខំហើយបណ្តោយខ្លួនតាមយថាកម្ម ខាងប្រុសបានប៉ងថា៥មិនបានសម្រេចត្រឹម៣ដង ហើយព្រឹកឡើងបានឌុបជូនទៅធ្វើការពេលព្រឹកថ្ងៃទី២៨ ខែកក្កដា សុខចិត្តសម្ងំក្នុងរោងចក្រ រហូតដល់ល្ងាច ឌុបជូនទៅផ្ទះជួលខាងក្រោយផ្សារកាណាស៊ីធីបន្តទៀត ក្នុងបំណងប៉ងចង់ម្តងទៀត តែសាច់ញាតិខាងនាងបាត់នាងមួយយប់ បានសួរដេញដោលក៏បានលួងលោមឲ្យជនសង្ស័យចូលខ្លួនទៅដោះស្រាយនៅប៉ុស្តិនគរបាល ត្រូវជនរូបនោះដឹងខ្លួនមុន ក៏បានរត់គេចខ្លួនបន្សល់ទុកម៉ូតូមួយគ្រឿង ត្រូវសាច់ញាតិជនរងគ្រោះជិះយកទៅប្តឹងនៅប៉ុស្តិ៍នគរបាលចោមចៅ។
តាមសម្តីក្រុមគ្រួសារក្មេងស្រីរងគ្រោះវិញ បានឲ្យដឹងថា ក្រោយពីក្មេងស្រីរងគ្រោះ បាត់មួយយប់មួយថ្ងៃ ឪពុកម្តាយភិតភ័យរត់ទៅប្តឹងនគរបាលប៉ុស្តិ៍ចោមចៅ កាលពីព្រឹកថ្ងៃទី២៨ ខែកក្កដា ម្តងរួចជាស្រេចហើយ បន្តតាមស្វែងរក ទីបំផុត ក្មេងស្រីរងគ្រោះ ដើរជាប់អន្ទាក់ប្រុសព្រានដឹងកន្លែងលាក់ខ្លួន ទៅតាមរកឃើញ ខាងប្រុសរត់គេចបាត់ បន្សល់ទុកតែម៉ូតូ Zoomer មួយគ្រឿង មានតែអូសយកទៅប្តឹងប៉ូលីសប៉ុស្តិ៍ចោមចៅ ឲ្យជួយអន្តរាគមន៍ស្រាវជ្រាវ ដើម្បីចាត់ការទៅតាមនីតិវិធី ៕
