ភ្នំពេញ៖ ស្ត្រីរកស៊ីផ្លូវភេទម្នាក់ត្រូវបានបុរសជាអ្នករត់រ៉ឺម៉កម៉ូតូ នាំទៅដេកផ្ទះសំណាក់ ក្នុងតម្លៃ២ម៉ឺនរៀល ដឹកដល់ពាក់កណ្តាលផ្លូវ នាងមិនព្រមទៅជាមួយ ដកដាវកាប់ពីរដាវ រងរបួសធ្ងន់ត្រង់ដៃទាំងសងខាង បង្កឱ្យមានការណ៍ភ្ញាក់ផ្អើលកាលពីវេលាម៉ោង៣និង៤០នាទីទៀបភ្លឺថ្ងៃទី២០ ខែសីហា ឆ្នាំ២០១៧ ស្ថិតតាមបណ្តោយផ្លូវ២៧៣ ត្រង់ចំណុចមុខក្រុមហ៊ុនសន្តិសុខហ្គារូដា ភូមិទួលគោក សង្កាត់ទួលសង្កែ ខណ្ឌឫស្សីកែវ។
ស្ត្រីរងគ្រោះមានឈ្មោះ សុខ រតនា អាយុ៣០ឆ្នាំ មុខរកស៊ីផ្លូវភេទនៅម្តុំវត្តភ្នំ ស្នាក់នៅបន្ទប់ជួលផ្លូវរថភ្លើង ភូមិកើតហេតុ របួសដៃឆ្វេងមួយដាវ ដេរជាង១០ថ្នេរ និងរងរបួសដៃស្តាំមួយដាវ អត់មុតប៉ោងជាំខ្មៅ។ ចំណែកឯបុរសដែលជាជនបង្កមានអាយុជាង៤០ឆ្នាំ មិនត្រូវបានគេស្គាល់ឈ្មោះនោះទេ។
ស្ត្រីរងគ្រោះបានឱ្យដឹងថា នៅមុនពេលកើតហេតុនាងបានអង្គុយចាំហៅម៉ូយនៅម្តុំវត្តភ្នំ
ខណៈកំពុងអង្គុយ ស្រាប់តែមានបុរសខាងលើជិះរ៉ឺម៉កម៉ូតូម្នាក់ឯង មកជិតរូបនាង ហើយបានសួរថា ទៅដេកជាមួយរូបគេយកប៉ុន្មានរៀល? រូបនាងឆ្លើយតបថា៣ម៉ឺនរៀល តែជនបង្កបានតថ្លៃឲ្យ២ម៉ឺនរៀលទៅ បន្ទាប់មកស្ត្រីរងគ្រោះក៏បានព្រមក្នុងតម្លៃ២ម៉ឺនរៀល រួចហើយបានឡើងជិះលើរឺុម៉កម៉ូតូមកដល់ចំណុចកើតហេតុ នាងបានប្រាប់ជនបង្កថា ឈប់ត្រង់ហ្នឹងហើយរកដេកផ្ទះសំណាក់នៅម្តុំហ្នឹងហើយ នៅជិតផ្ទះនាង តែបុរសខាងលើមិនព្រមឈប់ ដោយនិយាយប្រាប់នាងថា ទៅដេកនៅផ្ទះសំណាក់នៅម្តុំអង់តែនវិញ ភ្លាមៗនោះ នាងបានលូកទាញកអាវបុរសបង្កឱ្យឈប់ ធ្វើឱ្យបុរសនោះខឹងច្រឡោតយ៉ាងខ្លាំង ក៏បានឈប់រ៉ឺម៉កម៉ូតូអែបខាងហើយជេរប្រមាថទៅលើរូបនាង រួចបានស្ទុះទៅទាញដាវដែលគេសៀតទុកនៅក្នុងដំបូលរឺុម៉កទៅកាប់ក្បាលនាងចំនួនពីរដាវ តែនាងយកដៃទាំងពីររង បណ្តាលឱ្យរងរបួសរយះដៃឆ្វេងនិងដៃស្តាំធ្ងន់ ត្រូវបានគេហៅរថយន្តសង្គ្រោះដឹកទៅព្យាបាលនៅគ្លីនិកឯកជន ក្រោយកើតហេតុបុរសបង្កបើករឺុម៉កម៉ូតូរត់គេចខ្លួនបាត់ស្រមោល ៕
