ភ្នំពេញ៖ នៅថ្ងៃទី០៤ ខែកញ្ញ ឆ្នាំ២០១៧នេះ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាប់ចោទម្នាក់ វ័យ១៦ឆ្នាំ ដាក់ពន្ធនាគារ២ឆ្នាំ៦ខែ ពីបទរួមភេទជាមួយអនីតិជនអាយុក្រោម១៥ឆ្នាំ តាមមាត្រា៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ និងបង្គាប់ឱ្យអាណាព្យាបាលជនជាប់ចោទសងសំណងដល់ដើមបណ្តឹងចំនួន៤លានរៀល។
ជនជាប់ចោទឈ្មោះ ធឿន រ៉ាវីត អាយុ១៦ឆ្នាំ ត្រូវបានសមត្ថកិច្ចប៉ុស្តិ៍ស្ទឹងមានជ័យ ឃាត់ខ្លួនកាលពីថ្ងៃទី១០ ខែមេសា ឆ្នាំ២០១៧ យោងតាមពាក្យបណ្ដឹងរបស់អាណាព្យាបាលខាងស្រីវ័យ១៤ឆ្នាំ ពីបទរួមភេទជាមួយអនីតិជនអាយុក្រោម១៥ឆ្នាំ ។ ក្នុងពាក្យបណ្តឹងបានបញ្ជាក់ថា កាលពីថ្ងៃទី០៤ ខែមីនា ឆ្នាំ២០១៧ ជនសង្ស័យបានជិះម៉ូតូមកឌុបជនរងគ្រោះពីផ្ទះក្នុងភូមិទ្រា៤ សង្កាត់ស្ទឹងមានជ័យ នាំទៅផ្ទះសំណាក់ដើម្បីរួមភេទ ក្នុងសង្កាត់ជ្រោយចង្វារ ខណ្ឌជ្រោយចង្វារ បានសម្រេចម្ដង ។
លុះដល់ថ្ងៃទី១០ ខែមេសា ឆ្នាំ២០១៧ ជនសង្ស័យបានទូរស័ព្ទមកបបួលជនរងគ្រោះម្ដងទៀត ក៏ត្រូវឪពុកម្ដាយមានការសង្ស័យ និងបានហៅកូនស្រីមកសួរជីកឫសជីកគល់ ទើបធ្លាយរឿង។ឪពុកម្តាយខាងស្រីក៏បានប្រើល្បិចទូរស័ព្ទណាត់ជនសង្ស័យឲ្យមកជួបនៅផ្ទះរបស់ខ្លួន ហើយបានឃាត់ខ្លួនប្រគល់ជូនសមត្ថកិច្ចប៉ុស្តិ៍ស្ទឹងមានជ័យ តែម្ដង។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានស្រឡាញ់គ្នា ហើយបានព្រមព្រៀងរួមភេទជាមួយជនរងគ្រោះ ដោយគ្មានការបង្ខិតបង្ខំឡើយ៕