ភ្នំពេញ ៖ ជនសង្ស័យជាកូនប្រសាដែលចាប់រំលោភម៉ែក្មេក ច្របាច់កសម្លាប់ឪក្មេក និងរឹតកសម្លាប់កូនស្រីបង្កើតនោះ ទីបំផុតនៅព្រឹកថ្ងៃទី០៥ ខែកញ្ញា ឆ្នាំ២០១៧ តុលាការបានសម្រេចចោទប្រកាន់«ឃាតកម្មគិតទុកជាមុន» ប្រឈមជាប់គុក១ជីវិត។
លោក ងិន ពេជ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ជនសង្ស័យឈ្មោះ អង សំណាង ដែលចាប់រំលោភសម្លាប់ម៉ែក្មេក ច្របាច់កសម្លាប់ឪក្មេក និងរឹតកសម្លាប់កូនស្រីបង្កើត ពីបទ «ឃាតកម្មគិតទុកជាមុន» តាមមាត្រា២០០ នៃក្រមព្រហ្មទណ្ឌ ដែលប្រឈមមុខនឹងការជាប់ពន្ធនាគារមួយជីវិត ។
បើតាមការបញ្ជាក់របស់សមត្ថកិច្ចព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ឲ្យដឹងថា បច្ចុប្បន្នជនត្រូវចោទនឹងត្រូវបញ្ជូនទៅឃុំខ្លួនបណ្ដោះអាសន្ន បន្ទាប់ពីចៅក្រមស៊ើបសួរចេញដីកាតតាមនីតិវិធី ។
គួរបញ្ជាក់ថា ជនសង្ស័យឈ្មោះ អង សំណាង ហៅខ្មៅ អាយុ២៥ឆ្នាំ អាយុ២៥ឆ្នាំ មុខរបរមិនពិតប្រាកដ មានស្រុកកំណើតភូមិទួលអាទិន ឃុំអង្គពពេល ស្រុកគងពិសី ខេត្តកំពង់ស្ពឺ មានប្រពន្ធឈ្មោះ សាខុន អាយុ២២ឆ្នាំ មុខរបរ កម្មកររោងចក្រ មានលំនៅក្នុងភូមិទន្លៀង ឃុំរមាំងថ្កោល ស្រុកស្វាយទាប ខេត្តស្វាយរៀង ។
ជាឃាតករដៃឆៅដែលបានរឹតកសម្លាប់កូនស្រីបង្កើត ឈ្មោះ ពេជ ចរិយា ភេទស្រី អាយុ២ឆ្នាំ និងច្របាច់កសម្លាប់ឪពុកក្មេកឈ្មោះពេជ ជឿ អាយុ៥៧ឆ្នាំ ក្រោយពេលចាប់រំលោភម៉ែក្មេក មិនបានសម្រេច ត្រូវប្រពន្ធប្តឹងលែង ។
លោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ថ្លែងក្នុងសន្និសីទសារព័ត៌មាន នៅព្រឹកថ្ងៃទី០៤ ខែកញ្ញា ឆ្នាំ២០១៧ ថា កាលពីថ្ងៃទី២៩ ខែសីហា ឆ្នាំ២០១៧ ជនសង្ស័យបានពឹងឱ្យម្តាយក្មេកជួយកោសខ្យល់ នៅលើគ្រែក្រោមផ្ទះ ស្រាប់តែពេលកំពុងតែកោសខ្យល់នោះ ជនសង្ស័យកើតអារម្មណ៍ចង់រួមភេទ ក៏បានយកដៃស្ទាបគូទម្តាយក្មេក ធ្វើឲ្យម្តាយក្មេកភ្ញាក់ ស្រែកឆោឡោ ក៏ត្រូវជនសង្ស័យច្របាច់កម្តាយក្មេកកុំឲ្យស្រែក ។ លុះបែកការដឹងដល់ប្រពន្ធជនសង្ស័យ ទើបនៅព្រឹកឡើងថ្ងៃទី៣០ ខែសីហា ឆ្នាំ២០១៧ ប្រពន្ធរបស់ជនសង្ស័យ បាននាំម្តាយទៅសាលាឃុំរមាំងថ្កើល ដើម្បីប្តឹងសុំលែងលះប្តី ហើយដំបូងជនសង្ស័យមិនព្រមលែងលះទេ តែដោយគ្មានជម្រើសទើបជនសង្ស័យយល់ព្រមផ្តិតមេដៃលែងលះ ដោយជនសង្ស័យបានទាមទារយកកូនស្រីមកចិញ្ចឹម ហើយប្រពន្ធបានយល់ព្រម ។ ក្រោយមក ជនសង្ស័យបាននាំកូនស្រីមកស្នាក់នៅជាមួយប្អូនស្រីបង្កើត នៅបន្ទប់ជួលលេខ១០៨ ផ្លូវបេតុង ក្រុម២ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
សមត្ថកិច្ចបានបន្តថា នៅថ្ងៃទី០១ ខែកញ្ញា ឆ្នាំ២០១៧ ជនសង្ស័យបានធ្វើដំណើរទៅខេត្តស្វាយរៀង ដើម្បីសុំប្រពន្ធរួមរស់នៅជាមួយគ្នាវិញ តែប្រពន្ធនិងម្តាយក្មេក ព្រមទាំងបងប្អូនខាងប្រពន្ធមិនយល់ព្រម ហើយបានដេញជនសង្ស័យចេញពីផ្ទះទើប ជនសង្ស័យបានធ្វើដំណើរពីខេត្តស្វាយរៀង ត្រឡប់មកភ្នំពេញវិញ ។ លុះដល់ព្រឹកថ្ងៃទី០២ ខែកញ្ញា ឆ្នាំ២០១៧ ជនសង្ស័យបានយកខ្សែភ្លើងចងរឹតកកូនស្រីរបស់ខ្លួនដែលកំពុងអង្គុយមើលទូរទស្សន៍ បណ្តាលឱ្យកូនស្រីខ្លួនដាច់ខ្យល់ស្លាប់តែម្តង ។ ប៉ុន្តែមុនពេលរឹតកសម្លាប់កូនស្រី ជនសង្ស័យបានសរសេរលិខិតបណ្តាំមួយសន្លឹក មានខ្លឹមសារថា « សូមម៉ែយកក្រដាសនេះឲ្យអូនសាខុន បងលាហើយ បងសម្លាប់ខ្លួនពីរនាក់ឪកូន ដោយសារអូនស្អប់បង បងលាទាំងអាល័យ តែបងសូមប្រាប់អូនថា ទោះបីជាបងស្លាប់ ក៏បងនៅតែស្រឡាញ់អូន »។
ក្រោយពីជនសង្ស័យធ្វើសកម្មភាពសម្លាប់កូនស្រីរបស់ខ្លួនរួចមក ជនសង្ស័យបានយកខ្សែភ្លើងនោះមកចងកសម្លាប់ខ្លួនឯង តែដោយសារតែតឹងកពិបាកខ្លាំងពេក ទើបជនសង្ស័យរើបម្រះបណ្តាលឱ្យដាច់ខ្សែធ្លាក់មកដី ហើយក៏លែងចង់សម្លាប់ខ្លួនទៀត ក៏នឹកចង់សងសឹកគ្រួសារម្តាយក្មេកវិញ ទើបជនសង្ស័យបានធ្វើដំណើរជិះរថយន្តឈ្នួលទៅកាន់ខេត្តស្វាយរៀង ចូលទៅមន្ទីរពេទ្យបង្អែកខេត្តស្វាយរៀង ជួបឪពុកក្មេកដែលកំពុងតែសម្រាកព្យាបាលជំងឺ។ ពេលទៅដល់ ជនសង្ស័យ បាននិយាយប្រាប់រឿងដែលខ្លួន និងម្តាយក្មេកឈ្លោះគ្នាឱ្យឪពុកក្មេកបានដឹង ឪពុកក្មេកបានហាមថាកុំនិយាយនាំឱ្យខ្មាសគេ និងបានឱ្យជនសង្ស័យជួយជូនគាត់ទៅបន្ទប់ទឹកបត់ជើង ។ ពេលនោះ ឃើញមានឱកាសល្អ ជនសង្ស័យបានធ្វើសកម្មភាពច្របាច់កឪពុកក្មេក រួចចាប់ជ្រមុជក្បាលចូលទៅក្នុងទឹកបង្គន់ រហូតដល់ដាច់ខ្យល់ស្លាប់តែម្តង ។
ប្រភពដដែលបានបន្តថា ក្រោយពេលធ្វើសកម្មភាពច្របាច់កសម្លាប់ឪពុកក្មេករួច ជនសង្ស័យបានគេចខ្លួនទៅស្រុកកំណើត ខេត្តកំពង់ស្ពឺ។ លុះដល់ព្រឹកថ្ងៃទី០៣ ខែកញ្ញា ឆ្នាំ២០១៧ ក៏ត្រូវបានសមត្ថកិច្ចឃាត់ខ្លួនតែម្តង។
ជនសង្ស័យសារភាពថា ខ្លួនពិតជាបានធ្វើសកម្មភាពចាប់រំលោភម៉ែក្មេក សម្លាប់កូនស្រីបង្កើត និងឪពុកក្មេករបស់ខ្លួនប្រាកដមែន ។
ទោះជាយ៉ាងណា ឈាមស្រែក ស្បែកហៅ ពេលនេះឃាតករដ៏សាហាវឃោរឃៅនេះ ត្រូវបានចាប់ខ្លួន និងត្រូវបានតុលាការសម្រេចចោទប្រកាន់ ពីបទ«ឃាតកម្មគិតទុកជាមុន» ជាទោសដែលប្រឈមជាប់គុក១ជីវិត៕