ភ្នំពេញ ៖ បុរសជនជាតិអង់គ្លេសម្នាក់ វ័យជាង៣០ឆ្នាំ ទើបមកពីជក់កញ្ឆា រហូតវង្វេងវង្វាន់ស្មារតីដើរស្រាតខោអាវអស់រលីងនៅសល់តែខ្លួនននលគោក ត្រូវសមត្ថកិច្ចដេញចាប់ស្លៀកខោអាវឲ្យ ដើម្បីកុំឲ្យអាក្រក់មើលពេក ហេតុការណ៍នេះបង្កឲ្យភ្ញាក់ផ្អើលកាលពីវេលាម៉ោង១០យប់ថ្ងៃទី០៥ ខែកញ្ញា ឆ្នាំ២០១៧ នៅចំណុចផ្លូវ១៥៦ កែងផ្លូវ២៦១ ស្ថិតនៅក្នុងសង្កាត់ទឹកល្អក់២ ខណ្ឌទួលគោក។
បុរសដើរស្រាតមានឈ្មោះ ចន ភេទប្រុស អាយុជាង៣០ឆ្នាំ ជាជនជាតិអង់គ្លេស ស្នាក់នៅមិនពិតប្រាកដ។
តាមប្រភពព័ត៌មានពីសាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសជនជាតិអង់គ្លេសម្នាក់ មិនដឹងថាដើរមកពីណានោះទេ សង្ស័យបែកថ្នាំបានដើរស្រាតអត់មានពាក់ខោអាវ ហើយរត់ពេញផ្លូវ ដើរចូលក្នុងហាងផឹកស៊ី និងដើរចូលផ្ទះប្រជាពលរដ្ឋ បង្កឲ្យមានការភ្ញាក់ផ្អើលដល់សមត្ថកិច្ចចុះមកអន្តរាគមន៍ បែរជាត្រូវជនជាតិអង់គ្លេសយកដំបងដេញវ៉ៃសមត្ថកិច្ច និងដេញវ៉ៃប្រជាពលរដ្ឋទៀត ទម្រាំសមត្ថកិច្ចដេញចាប់បានយកខោអាវពាក់ឲ្យ រួចឃាត់យកទៅប៉ុស្តិ៍នគរបាលទឹកល្អក់ទី២ ។
ក្រោយពេលទៅដល់ប៉ុស្តិ៍សមត្ថកិច្ចបានសួរនាំទៅជនជាតិអង់គ្លេសនោះ បានសារភាពថា ខ្លួនទើបតែជក់កញ្ឆា ហើយមិនមានលុយទេ ព្រមទាំងបាត់លិខិតឆ្លងដែន មិនដឹងថាទៅណានោះទេ គ្រាន់តែដឹងថាជនជាតិអង់គ្លេសនេះដើរមកពីម្តុំផ្សារដីហុយតែប៉ុណ្ណោះ ។ បន្ទាប់ពីសួរនាំរួចសមត្ថកិច្ចឲ្យស្រាកមួយយប់នៅប៉ុស្តិ៍ រង់ចាំព្រឹកស្អែកទៀតប្រគល់ទៅឲ្យខាងស្ថានទូត៕
