ភ្នំពេញ ៖ បុរស២នាក់និងនារីម្នាក់ ទើបនឹងជិះម៉ូតូមកពីដើរលេងត្រឡប់ទៅផ្ទះវិញ ត្រូវជនសង្ស័យជិះម៉ូតូទៅអែបជិត រួចធាក់ម៉ូតូផ្តួលប្លន់យកម៉ូតូទៅបាត់ កាលពីវេលាម៉ោង១២និង៤០នាទីរំលងអាធ្រាត ឈានចូលថ្ងៃទី៧ ខែមិថុនា ឆ្នាំ២០១៧ នៅបណ្តោយផ្លូវជាតិលេខ៣ ស្ថិតក្នុងភូមិពងទឹក សង្កាត់ពងទឹក ខណ្ឌដង្កោ។
ជនរងគ្រោះជាម្ចាស់ម៉ូតូមានឈ្មោះ អឿ ផុន ភេទប្រុស អាយុ២១ឆ្នាំ មុខរបរជាងសំណង់រស់នៅភូមិអង្គ សង្កាត់ប្រទះឡាង ខណ្ឌដង្កោ និងមិត្តភក្តិមានឈ្មោះស្រស់ រតនា ហៅខ្នាអាយុ២១ឆ្នាំ មុខរបរនៅផ្ទះភូមិជាមួយគ្នា ។ ម៉ូតូដែលជនសង្ស័យប្លន់យកទៅបាត់ ម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ មិនចាំស្លាកលេខ។
ជនរងគ្រោះបានឲ្យដឹងថា មុនពេលកើតហេតុជនរងគ្រោះបានដឹកមិត្តភក្តិប្រុសម្នាក់ ដើរលេងនិងបានទៅយកមិត្តភក្តិស្រីនៅសង្កាត់ចោមចៅ ខណ្ឌពោធិ៍សែនជ័យ ទៅជាមួយដែរ ។ លុះពេលដើរលេងរួចហើយ ជនរងគ្រោះបានជូនមិត្តស្រីទៅផ្ទះវិញ ខណៈពេលជិះទៅដល់ពាក់កណ្តាលផ្លូវ ក៏បានជួបជនសង្ស័យមានគ្នា៤នាក់ ជិះម៉ូតូ២គ្រឿង ទៅជិតរួចហើយបានធាក់ផ្តួលម៉ូតូរួចហើយជនសង្ស័យស្ទុះទៅលើកម៉ូតូជិះចេញទៅបាត់ ។
បន្ទាប់ពីកើតហេតុសមត្ថកិច្ចទៅមើលដល់កន្លែងហេតុ មានប្រជាពលរដ្ធចេញមកប្រាប់ថា នៅពេលកើតហេតុជនរងគ្រោះបានស្រែកហៅឲ្យគេជួយដែរ តែមិនមាននរណាហ៊ានជួយទេ។
ក្រោយពេលកើតសមត្ថកិច្ចមូលដ្ឋានបានចុះមកដល់ភ្លាមៗ ហើយនាំជនរងគ្រោះមកដាក់ពាក្យបណ្តឹងនៅប៉ុស្តិ៍ពងទឹក ដើម្បីឲ្យសមត្ថកិច្ចស្រាវជ្រាវរកចាប់ជនសង្ស័យយកមកផ្តន្ទាតាមផ្លូវច្បាប់៕