ពិធីការិនីតូចច្រឡឺងគួរឲ្យក្នាញ់របស់ទូរទស្សន៍បាយ័ន ណា សាឌី បានលេចមុខក្នុងកម្មវិធីសប្បុរសធម៌ដែលជាការៀបចំដោយក្រុមហ៊ុន Lion Corporation រួមជាមួយក្រុមហ៊ុន TSNR Distribution Co.Ltd ដែលជាក្រុមហ៊ុនចែកចាយផលិយផល Kodomo និងជាការបង្ហាញជូនយុវកុមារ៩រូប ពីកម្មវិធី “Kodomo Junior Singing Contest Season9” ដើម្បីចែកចាយភាពរីករាយជូនប្អូនៗនៅអង្គការលើកស្ទួយប្រជាពលរដ្ឋ ដែលមានទីតាំងនៅភូមិដំណាក់ធំទី១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
កម្មវិធីសប្បុរសធម៌ដែលធ្វើកាលពីព្រឹកថ្ងៃទី២៨ ខែកញ្ញា នេះ ក្រោមប្រធានបទ ”3L Charity (Life, love , laugh) #2 By Kodomo“ នៅអង្គការលើកស្ទួយប្រជាពលរដ្ឋ (PLO) ដែលជាអង្គការក្រៅរដ្ឋាភិបាល ផ្ដល់ការសិក្សាអប់រំ និងបណ្ដុះបណ្ដាលវិជ្ជាជីវៈដល់ក្មេងស្រីកុមារកំព្រា និងកុមារដែលរស់នៅតាមដងផ្លូវនៃប្រទេសកម្ពុជា។
ក្រៅពីមានស្រីស្អាតសាច់សខ្ចី ណា សាឌី នោះ កម្មវិធីសប្បុរសធម៌ 3L ក៏មានការចូលរួមពី Miss Grand Cambodia 2017 ដោយមានស្រីស្រស់៣រូបដែរ ដូចជា កញ្ញាខ្លឹម ស្រីគា, កញ្ញាញាត សុភា និងកញ្ញាមុន្នី ម៉ូនីតា ដែលពួកគេបានបង្ហាញពីបំណងក្នុងការនាំមកនូវគុណភាព ប្រសើរនៃជីវិតជូនទៅសង្គម ផ្ដល់នូវសេចក្ដីស្រលាញ់ជូនគ្នាទៅវិញទៅមក ពីព្រោះសេចក្ដីស្រលាញ់ស្ថិតនៅជុំវិញយើងទាំងអស់គ្នា ហើយនាំមកនូវភាពសប្បាយរីករាយជូនយើងទាំងអស់គ្នា។ដោយឡែកក្រុមហ៊ុន Kodomo បានធ្វើការបរិច្ចាគថវិកាជូនទៅដល់អង្គការលើកស្ទួយប្រជាពលរដ្ឋ (PLO) ហើយថវិកាដែលបរិច្ចាគត្រូវបានរាប់ពីការលក់ផលិតផល kodomo នៅផ្សារទំនើប Lucky និងផ្សារទំនើប Giant ចាប់ពីថ្ងៃទី២១ ខែកក្កដា ដល់ថ្ងៃទី៣០ ខែសីហា ឆ្នាំ២០១៧។
កញ្ញាណា សាឌី ហៅក្រៅ ”ក្វាន់” ជាអតីត Freshie Girl ឆ្នាំ២០១៥ មានអាយុ២១ឆ្នាំ កម្ពស់១,៦៨ម៉ែត្រ ទម្ងន់៥០គ.ក្រ ជាពិធីការិនីរបស់ទូរទស្សន៍បាយ័ន ក្នុងកម្មវិធី ”ភាពយន្ដរាត្រី” និងកម្មវិធី ”ពិភពរីរាយ”។ សាឌី ពេលនេះជានិស្សិតឆ្នាំទី២ នៅសកលវិទ្យាល័យបញ្ញាសាស្រ្ដ ផ្នែក Business English និងរៀនជាភាសាអង់គ្លេសនៅសាលា ACE ផងដែរ។
ណា សាឌី ប្រាប់ថា នាងនឹងទៅចូលរួមកម្មវិធីសប្បុរសធម៌ 3L ជាបន្ដទៀត នៅពេលដែលមានការរៀបចំពីក្រុមហ៊ុន BKA និងឧបត្ថម្ភដោយ Kodomo នោះ។ តែសាឌី ថា កន្លងមកនាងមិនសូវបានចូលរួមកម្មវិធីសប្បុរសធម៌ផ្សេងៗទៀត ដោយសារតែនាងរវល់ច្រើនជាមួយការងារសិល្បៈ និងការសិក្សា។ ចំណែកក្រុមស្រីស្អាត Miss Grand Cambodia ២០១៧ ទាំង៣រូបនោះ ក៏មានការតាំងចិត្តដូចសាឌី ដែរថា ពួកគេពេញចិត្តចូលរួមកម្មវិធីសប្បុរសធម៌ 3L ហើយនឹងបន្ដយុទ្ធនាការនេះតទៅទៀត ដើម្បីជួយប្អូនៗកុមារនៅតាមអង្គការផ្សេងៗទៀត។
ណា សាឌី ស្ថិតក្នុងចំណោមតារាវ័យក្មេងដែលមានប្រុសចោមស្នេហ៍ច្រើន តែកន្លងមកតារារូបនេះបានព្យាយាមលាក់គូស្នេហ៍ជិតដែលមិនហ៊ានបណ្ដើរឲ្យគេស្គាល់ឡើយ ហើយថែមទាំងថាអត់ទាន់មានម្ចាស់ចិត្តទៀតផង ស្របពេលដែលមានការលើកឡើងថា ស្រីស្អាតដូចរូបនេះប្រាកដជាប្រុសអ្នកមានៗមិនតិចឡើយគេងស្រម៉ៃចង់ថ្នាក់ថ្នមមិនតិចនាក់ឡើយ៕
