អ្នកនាងសួន ភក្ដី ហៅ Vj អាណូ ដែលវិលត្រឡប់មកអុកឡុកក្នុងអាជីពចាស់វិញ ហើយតែងខ្លួនយ៉ាងស្អាត ចូលរួមកម្មវិធីមង្គលការអ្នកនាងចន ច័ន្ទតារារស្មី ដែលជាប្អូនចន ច័ន្ទលក្ខិណា កាលពីថ្ងៃទី០៩ ខែមករា ឆ្នាំ២០១៨ នៅមជ្ឈមណ្ឌលកោះពេជ្រ នោះ ស្រាប់តែដើរចេញមកវិញ ប្រកែកញ៉ាញតែម្ដង នៅពេលដែលអ្នកកាសែតឈ្លេចសួររឿងទំនាក់ទំនងស្និទ្ធស្នាល ពិសេសជាមួយប្រុសក្មេង ហេង នរកក្កដា ព្រោះតែគេឃើញអ្នកទាំង២ បង្ហាញសកម្មភាពដូចជាគូស្នេហ៍នោះ។
Vj អាណូ និយាយរហ័សសឹងតែស្ដាប់មិនទាន់ថា “នាងពិតជាគ្មានអ្វីពិសេសជាមួយប្រុសក្មេង នរកសក្កដា នោះឡើយ គឺគ្រាន់តែរាប់អានគ្នាជាបងប្អូនប៉ុណ្ណោះ មិនអាចជាស្នេហាបានឡើយ។
អាណូ និយាយដោយច្បាស់ៗថា ”មានទាក់ទងគ្នាពិសេសអីណា! ងាប់ហើយ កុំច្រឡំអី អ្នកដឹងបានដឹងចា៎ ស្រលាញ់គ្នាអីលោកអើយ គេច្រឡំទេ។ ខ្ញុំនិងកក្កដា អាយុខុសគ្នាច្រើន ខ្ញុំទៅស្រលាញ់គេក្មេងម៉េច?”។
Vj អាណូ ក្លាយទៅជាថៅកែហាងលក់បាយសាច់ជ្រូកចៀន ដែលតារាសិល្បៈជាច្រើនកុម្មង់ញាំពេលថតកុន ទើបធ្វើឲ្យអតីតពិធីការិនីប៉ុស្ដិ៍លេខ៣រូបនេះ បានពង្រីកសាខាដល់ខេត្តសៀមរាប និងបន្ថែមអាជីវកម្មថ្មី គឺបើកហាងលក់រថយន្ដបង់រំលស់ ដោយបោះទុនអស់១០ម៉ឺនដុល្លារទៀតផង។ ប៉ុន្ដែការវិលត្រឡប់ចូលសិល្បៈសារជាថ្មីរបស់ VJ អាណូ ក្រោយបាត់មុខ៩ឆ្នាំ នោះ ពេលនេះមិនទទួលបានជោគជ័យឡើយ ព្រោះថាមានតារាស្រីស្អាតៗរះមកច្រើនពេក ធ្វើឲ្យអាណូ ដែលមានវ័យចង់ជ្រេនោះ ពិបាកល្បីដូចកាលពីឆ្នាំ២០០៩ ឡើយ ហើយពេលនេះថៅកែស្រីលក់ឡានរូបនេះ ជិះរថយន្ដត្រឹម Highlander តម្លៃជាង២ម៉ឺនដុល្លារប៉ុណ្ណោះ។
ប្រភពបានឲ្យដឹងថា ការដែលអាណូ ប្រកែកញ៉ាញថា មិនមានស្នេហ៍ជាមួយនរៈកក្កដា នោះ ព្រោះតែពេលនេះនាងមានគូស្នេហ៍ថ្មីទៀតហើយ និងខ្លាចម្ចាស់ចិត្តប្រចណ្ឌ បានជាប្រញ៉ាប់ចេញមកបដិសេធយ៉ាងទាន់ហន់បែបនេះ។ ប៉ុន្តែយ៉ាងណា នៅពេលដែលត្រូវសួរជជីករឿងគូរស្នេហ៍ថ្មីនោះ អាណូ មិនដែលហ៊ានលាតត្រដាងការពិតឡើយ ដោយនាងថា គ្រាន់តែដឹងថា គេមិនមែនជាបុរសមានប្រពន្ធកូនទៅបានហើយ គឺនៅលីវ ហើយស្អាតសង្ហាទៀតផង។
Vj អាណូ ដែលបាត់ខ្លួនដោយអាថ៌កំបាំងកាលពីឆ្នាំ២០០៩ ដោយល្បីថា មានស្នេហាលួចលាក់ជាមួយមន្ដ្រីធំម្នាក់ រហូតដល់មានកូន២នាក់នោះ ពេលនេះគឺនៅតែអាថ៌កំបាំងស្នេហ៍ដដែល បន្ទាប់ពីមានព័ត៌មានថា គូស្នេហ៍លាក់មុខរបស់នាងងាកទៅស្នេហាតារាចម្រៀងវ័យក្មេងម្នាក់ដែលពូកែលេងក្បាច់រាំនោះ។
តារាសិល្បៈដែលជិតស្និទ្ធអាណូ បានឲ្យដឹងថា អតីតពីធីការិនីល្បីឈ្មោះរូបនេះមិនទុកបេះដូងឲ្យនៅទំនេរឡើយ ពេលនេះនាងមានម្ចាស់ចិត្តថ្មីទៀតហើយ គ្រាន់តែអាណូ មិនដែលលាតត្រដាងទេ គឺចូលចិត្តលាក់បាំងរហូត ទើបធ្វើឲ្យមុននេះមានមន្ដី្រធំម្នាក់តាមស្នេហ៍ស្អិតពេក អាណូ លេង១ក្បាច់ ដោយបង្ហោះរូបមានកូនក្នុងផ្ទៃ ទើបធ្វើលោកធំនោះប្រញាប់ដកខ្លួនថយ ៕
