តូតា បោះទុនកន្លះលានដុល្លារ ពិសោធស្នេហ៍ ខណៈគូស្នេហ៍ហៅម្តាយតូតា “ម៉ាក់” ពេញៗមាត់

ទំនាក់ទំនងស្នេហ៍រវាងកញ្ញាម៉ាក សែនសូនីតា ហៅតូតា ជាមួយលោកប៉ុល វិបូ ហៅនីត ថៅកែផលិតកម្មអង្គរភិចឈ័រ បានសាយភាយពេញពិភពសិល្បៈទៅហើយ ខណៈដែលអ្នកទាំងពីរកំពុងតែពួតដៃគ្នាបើកមុខជំនួញ ហាង “ផែសមុទ្រ” ដែលគ្រោងពង្រីករហូតដល់១២សាខា នៅរាជធានីភ្នំពេញ ដែលត្រៀមការចំណាយទុនរួមគ្នា ជាងកន្លះលានដុល្លារឯណោះ ស្របពេលដែលជាពេលវេលាដែលពួកគេពិសោធចិត្តគ្នាមុនពេលដឹកដៃគ្នាចូលរោងការ…។

សម្ព័ន្ធស្នេហ៍រវាងតូតា ជាមួយលោកនីត កាន់តែបើកចំហ ដោយក្រៅពីបណ្តើរគ្នាឱ្យត្រសងស្ទើរគ្រប់ជំហាន ប្រៀបដូចជាប្តីប្រពន្ធថ្មោងថ្មីទៅហើយនោះ មួយរយៈចុងក្រោយនេះ ពួកគេបានចេញមុខរកស៊ីរួមគ្នាបើកហាង “ផែសមុទ្រ” ដែលបានពង្រីកសាខាជាបន្តបន្ទាប់ ខណៈដែលលោកនីត បានហៅម្តាយតូតា ថា “ម៉ាក់ៗ” ពេញៗមាត់ទៅហើយនោះ។

បន្ទាប់ពីហាង “ផែសមុទ្រ” សាខាទី1 នៅខាងក្រោយសណ្ឋាគារឡឺប្រេស៊ីដង់ បើកដំណើរការរលូនមិនទាន់បានប៉ុន្មានផង ថ្មីៗនេះ តូតា និងលោកនីត បានបើកសម្ពោធហាង “ផែសមុទ្រ” សាខាទី2 នៅក្រុងតាខ្មៅ បន្ថែមមួយទៀត ហើយតាមគម្រោង សាខាទី3 នឹងត្រូវបើកដំណើរការនៅម្តុំទួលទំពូង ខណៈដែលត្រូវពង្រីកឱ្យបាន12ទីតាំង នៅរាជធានីភ្នំពេញ។

តូតា បានថ្លែងឱ្យដឹងថ្មីៗនេះថា “ក្រៅពីអាជីពសិល្បៈ បច្ចុប្បន្ននេះ នាងកំពុងតែប្រឹងពង្រីកមុខជំនួញរកស៊ីជាមួយលោកនីត ថៅកែផលិតកម្មអង្គរភីចឈ័រ ដែលត្រៀមបើកហាងផែសមុទ្រ ឱ្យបាន12ទីតាំងតែម្តង”។

តូតា បន្តថា “ហាងនីមួយៗគ្រោងចំណាយ មិនក្រោម4ម៉ឺនដុល្លារនោះទេ។ ដូច្នេះនាងនិងលោកនីត បានត្រៀមការចំណាយមិនតិចជាងកន្លះលានដុល្លារនោះទេ លើមុខជំនួញលក់អាហារសមុទ្រនេះ។ ក្រោយបើកដំណើរការក្នុងរយៈពេលខ្លី ឃើញថា មានសន្ទុះល្អប្រសើរ ដែលមានភ្ញៀវកុម្មង់យកទៅញ៉ាំនៅគេហដ្ឋាន និងមកញ៉ាំនៅហាងដោយផ្ទាល់ ពេញៗតែម្តង ខណៈដែលហាងរបស់នាងមានសេវាកម្មល្អ  អាហារសមុទ្រស្រស់ៗគ្រប់ប្រភេទ ដែលយកមកពីខេត្តព្រះសីហនុ និងកំពត។

ខណៈដែលតូតា រួមទាំងក្រុមគ្រួសារ បានបោះទុនធំរកស៊ីចូលហ៊ុនជាមួយលោកនីត យ៉ាងពេញទំហឹងនោះ នាំឱ្យមជ្ឈដ្ឋានជាច្រើន រួមទាំងអ្នកនៅក្នុងចង្កោមសិល្បៈផង មានការសង្ស័យថា ទំនងជាតូតា អាចនឹងដឹកដៃលោកនីត ចូលរោងការឆាប់ៗទៀតផង ស្របពេលដែលអ្នកទាំងពីរបានបង្ហាញពីសកម្មភាពស្នេហ៍យ៉ាងស្អិតល្មួត។

តូតា បានបង្ហើបឱ្យដឹងថា បច្ចុប្បន្ននេះ នាងនិងលោកនីត ជាដៃគូរកស៊ីរួមគ្នា ហើយអាចនិយាយបានថា កំពុងពិសោធចិត្តគ្នាផងដែរ ប៉ុន្តែឱ្យគិតដល់គម្រោងរៀបការយ៉ាងណានោះ គឺមិនទាន់ទេ។ នាងថា អ្វីដែលសំខាន់ពេលនេះ ត្រូវគិតពីការពង្រីកមុខរបររកស៊ីឱ្យដំណើរការល្អប្រសើរសិន ខណៈដែលគម្រោងត្រូវបើក 12ទីតាំង តែពេលនេះ ទើបបើកបានតែ2ទីតាំងប៉ុណ្ណោះ។ ម៉្យាងក៏មានគម្រោងបើកមុខជំនួញក្រៅពីហាង “ផែសមុទ្រ” ផងដែរ ដូច្នេះមិនទាន់គិតដល់គម្រោងរៀបការ បង្កើតក្រុមគ្រួសារនោះទេ។ ជាពិសេស នាងត្រូវការពេលវេលាជាច្រើនទៀត ដើម្បីមើលចិត្តលោកនីត។

តូតា លើកឡើងថា ការបោះទុនជាងកន្លះលានដុល្លារ បើកលក់អាហារសមុទ្រនេះ នាងចាត់ទុកថា ជាពេលវេលាមួយដែលនាងត្រូវពិសោធចិត្តលោកនីត ឱ្យបានច្បាស់ផងដែរ ខណៈដែលនាងមិនទាន់អាចសន្និដ្ឋានបានថា រវាងនាងជាមួយលោកនីត នឹងក្លាយជាដៃគូជីវិតពិត ឬយ៉ាងណានោះទេ។

តូតា ជាស្រីស្អាតល្បីឈ្មោះ ហើយក្រៅពីអាជីព សិល្បៈ នាងចូលចិត្តមកប្រឡូកនៅក្នុងមុខជំនួញរកស៊ី ខណៈដែលលោកនីត ក៏ពូកែខាងរកស៊ីផងនោះ មានការលើកឡើងថា នៅពេលហាង “ផែសមុទ្រ” ដំណើរការទាំង12ទីតាំង ក្នុងមួយខែៗ ពួកគេអាចនឹងទាញបានប្រភពចំណូលខ្ទង់ម៉ឺនដុល្លារ ព្រមទាំងគ្រោងរកស៊ីមុខជំនួញផ្សេងទៀតនោះ តូតា នឹងមានទ្រព្យមិនចាញ់ជំទាវៗមួយចំនួននោះទេ។

តូតា អះអាងថា បើទោះបីថ្ងៃខាងមុខ នាងជោគជ័យលើមុខជំនួញរកស៊ី ហើយមានទ្រព្យស្តុកស្តម្ភ ក៏នាងមិនចង់បានតំណែងជាលោកជំទាវអ្វីដែរ ពោលគឺនាងសុំត្រឹមជាមនុស្សសាមញ្ញ មានសិទ្ធិសេរីភាពគ្រប់គ្រាន់ ចង់ទៅណាមកណា ដោយមិនចាំបាច់មានអង្គរក្សតាមហែហមទៅបានហើយ។

តូតា មានជំនឿចិត្តថា មុខរបរបើកហាង “ផែសមុទ្រ” របស់នាងនឹងទទួលបានជោគជ័យ ត្បិតអីមុនពេលសម្រេចចិត្តបើកនៅសាខាណាមួយ នាងនិងលោកនីត បានសិក្សាពីទីតាំងនោះយ៉ាងច្បាស់លាស់ គឺសុទ្ធតែជាទីតាំងដែលអំណោយផល ខណៈដែលការរចនាហាងក៏មានភាពទាក់ទាញ។ ជាពិសេស មានសេវាកម្មល្អ និងមានអាហារ សមុទ្រស្រស់ៗគ្រប់ប្រភេទ តម្រូវចិត្តអតិថិជន។

នៅក្នុងសង្គមសិល្បៈ នរណាៗក៏ដឹងថា តូតា ជាតារាដែលមានមន្តស្នេហ៍ទាក់ទាញផងដែរ ដែលមានបុរសៗចម្រុះឋានៈជាច្រើនតាមថ្ពក់ស្នេហ៍នាង ពោលគឺ មានទាំងមន្ត្រីធំ អ្នកជំនួញ និងឧកញ៉ាផង ក៏ចង់បាននាងមកថ្នាក់ថ្នមដែរ។ ប៉ុន្តែ ទីបំផុត តូតា បានសម្រេចចិត្តពិសោធស្នេហ៍ជាមួយលោកនីត និងបានរកស៊ីរួមគ្នាហើយ មិនយូរមិនឆាប់ ពួកគេនឹងដឹកដៃគ្នាចូលរោងការ កក្រើកពិភពសិល្បៈជាពុំខាន។

តាមប្រភពថា មានបុរសៗជាច្រើនដែលខកចិត្តស្តាយស្នេហ៍តូតា នៅពេលដឹងថា នាងបានចងសម្ព័ន្ធស្នេហ៍ជាមួយលោកនីត ជាពិសេស ប្រុសក្មេងទឹម នីដា ដែលជាប្អូនប្រុសទឹម រដ្ឋា ធ្លាប់សាងស្នេហ៍ជាច្រើនឆ្នាំនោះ បានខកចិត្តស្ទើរកកឈាមពេញបេះដូងទៅហើយ។

យ៉ាងណាក៏ដោយ ខណៈដែលតូតា កំពុងបោះទុនធំជាងកន្លះលានដុល្លារ រកស៊ី និងកំពុងពិសោធស្នេហ៍ជាមួយលោកនីត ផងនោះ មិត្តភក្តិនៅក្នុងចង្កោមសិល្បៈជាច្រើន ចង់ឃើញអ្នកទាំងពីរដឹកដៃគ្នាចូលរោងការឆាប់ៗ ដើម្បីកសាងសុភមង្គលរួមគ្នា ខណៈដែលតូតា ជាស្រីស្អាតល្បីឈ្មោះ ហើយលោកនីត ក៏ជាអ្នកមានចំណេះដឹងជ្រៅជ្រះ និងចូលចិត្តប្រឡូកនៅក្នុងមុខរបររកស៊ីដូចគ្នា៕