អតីត FreshieGirl ឆ្នាំ២០១៥ នាងណា សាឌី ដែលជាពិធីករិនីនៅប៉ុស្ដិ៍ បាយ័ន នោះ បានផ្អាកអាជីពសម្ដែងរយៈពេលជាង១ឆ្នាំ ដោយផ្ដោតតែលើការពង្រឹងការងារនៅប៉ុស្ដិ៍ទូរទស្សន៍តែមួយមុខ និងការសិក្សានៅមហាវិទ្យាល័យទើបធ្វើឲ្យនាងសាឌី បាត់មុខតាមភាពយន្ដអស់១អន្លើរ។ ប៉ុន្ដែ ថ្មីៗនេះ ណា សាឌី បានលេចមុខជាថ្មី ក្នុង MV បទ “មនុស្សស្រីធម្មតាម្នាក់មិនសមបងខូចចិត្ត” របស់ផលិតកម្មថោន ដែលច្រៀងដោយនាងអេនីហ្សាម នោះ ទទួលបានការចាប់អារម្មណ៍ច្រើនពីអ្នកទស្សនា ព្រោះតែពិធីការិនីតូចច្រឡឹងរូបនេះ សម្ដែងឈុតបង្ហូរទឹកភ្នែកយ៉ាងស័ក្តិសម។ ប្រភពព័ត៌មានបានឲ្យដឹងថា ចាប់ពីឆ្នាំ២០១៨ នេះតទៅ តារាតូចច្រឡឹងរូបនេះនឹងចាប់ផ្ដើមទទួលការថតសម្ដែងភាពយន្ដសារជាថ្មីឡើងវិញហើយទាំងការថត MV និងភាពយន្ដព្រោះថាពេលនេះសាឌី ចង់ចាប់អាជីពសិល្បះឲ្យបានគ្រប់ផ្នែកទាំងអស់។
ក្នុងជំនួបតាមទូរស័ព្ទ កាលពីថ្ងៃទី០១ ខែមករា នាងណា សាឌី ថ្លែងថា បាត់បង់ការសម្ដែងរឿងច្រើនគួរសម រយៈពេលដែលនាងមិនទទួលការថតភាពយន្ដមួយរយៈនេះ តែឥឡូវពិតជាត្រូវត្រឡប់មកវិញមែន។ សាឌី ហៅក្វាន់វាចាថា “ខ្ញុំស្ដាយដែរ ! ដែលចោលច្រើនរឿង មុនហ្នឹងព្រោះមានគេទាក់ទងដែរ តែខ្ញុំមិនទទួល ដោយសារយើងចង់ពង្រឹងការងារជាពិធីការិនីឲ្យបានល្អនិងម៉្យាងទៀត ខ្ញុំជាប់ការសិក្សារនៅសាកលវិទ្យាល័យបញ្ញាសាស្រ្ដផង ទើបពិបាករកពេលថតរឿង។ ប៉ុន្ដែ នៅឆ្នាំ២០១៨ នេះ ខ្ញុំទទួលការថតរឿងវិញហើយ តែអាចជារឿងដុំដាក់តាមរោងប៉ុណ្ណោះ បើថារឿងភាគវិញ ប្រហែលជាខ្ញុំមិនអាចថតបានទេ ព្រោះការថតរឿងភាគត្រូវការពេលវេលាច្រើន។ ថ្មីៗនេះខ្ញុំសប្បាយចិត្តដែរ ព្រោះអីការថត MV នៅថោនបទបងអេនីហ្សាម នោះ ឃើញគេចូលទៅមើលច្រើន អ៊ីចឹងខ្ញុំនៅតែបន្ដការសម្ដែងអ៊ីចឹងទាំងការថត Mv និងរឿងដុំ”។
កញ្ញាណា សាឌី ជានិស្សិតនៅសកលវិទ្យាល័យបញ្ញាសាស្រ្ដឆ្នាំទី២ផ្នែក Business និងរៀនភាសាអង់គ្លេសនៅសាលា ACE ផងដែរ ដែលមើលទៅស្រីស្អាតរូបនេះប្រហែលជាប្រឡូកសិល្បៈ មិនមែនជាអាជីពឡើយ ព្រោះគ្រួសារនាងជាអ្នកជំនួញដែលមានជីវភាពធូរធារផងដែរ។ ប្រភពព័ត៌មានបានឲ្យដឹងថា តារាវ័យក្មេងលេងស្ទីលយុវវ័យនេះមានប្រុសជាច្រើនតាមស្នេហ៍ ហេតុនេះហើយ បេះដូងស្រីក្មេងរូបនេះ ប្រហែលជាមិនទុកឲ្យនៅទំនេរឡើយ គ្រាន់តែកន្លងមកណា សាឌី មិនដែលហ៊ានបណ្ដើរគូស្នេហ៍ជាចំហរឲ្យអ្នកណាបានឃើញឡើយ គឺព្យាយាមលាក់ជិតឈឹង។
តារាកូនកាត់ថៃរូបនេះ និយាយលាយឡំសំណើចថា “អាជីពសិល្បៈខ្ញុំស្រលាញ់ ហើយខ្ញុំពេញចិត្តការងារខ្ញុំនៅទូរទស្សន៍បាយ័ន។ ខ្ញុំគ្មានគម្រោងទៅប៉ុស្ដិ៍ណាផ្សេងទេ នៅបាយ័នល្អ ខ្ញុំកាន់កម្មវិធី២ គឺ “ពិភពរីករាយ” និង “ភាពយន្ដខ្មែរ”។ ចំពោះអ្នកដែលស្រលាញ់ គឺចេះតែមានជាធម្មតាហើយ តែខ្ញុំនៅវ័យហ្នឹងដូចជាមិនទាន់ចង់គិតទេ។ តាមពិតមិនមែនថា យើងត្រូវការអ្នកដែលពិសេសអីទេ គឺគូអនាគតយើងគ្រាន់តែចង់បានអ្នកដែលយល់ចិត្ត តែពេលហ្នឹងដូចជាមិនទាន់ចង់គិតទេ។ ខ្ញុំនិយាយត្រង់ទៅ គឺអត់ទាន់មានសង្សារតែម្ដង គ្រាន់តែថាមានអ្នកខ្លះគេមិនជឿអត់ដឹងជាធ្វើម៉េចដែរ។ ខ្ញុំចង់ផ្ដោតលើការងារសិល្បៈ និងការសិក្សាឲ្យបានច្រើន ហើយថ្មីៗនេះខ្ញុំបានថតស្ពតភេសជ្ជៈជាទឹកក្រូចមួយដែលជាស្ពតធំដែរ គឺនឹងចេញនាពេលឆាប់ៗនេះហើយ”។
ណា សាឌី មានអាយុ២១ឆ្នាំ កម្ពស់១,៦៨ម៉ែត្រ ទម្ងន់៥០គ.ក្រ តារារូបនេះមានត្រេមុខស្រដៀងនិងតារាថៃដែរហើយគេចាំមើលថា តើពេលណាទៅ ទើបស្រីក្មេងរូបនេះព្រមលាតត្រដាងរឿងគូស្នេហ៍ឈប់លាក់សង្សារទៅទៀត?៕
