ចំណងស្នេហ៍ខុសវ័យរវាងតារាសម្តែងស្រីស្អាត ម៉ាក សែនសូនីតា និងលោកថៅកែផលិតកម្ម Angkor Picture លោកប៉ុល វិបូរ ហៅនីត កាន់តែបើកជាចំហហើយនៅពេលនេះ ដែលពួកគេទៅណាក៏បណ្តើរគ្នាដូចជាប្តីប្រពន្ធអ៊ីចឹង ទើបធ្វើឱ្យមិត្តភក្តិអ្នកសិល្បៈរួមអាជីព ជំរុញឱ្យពួកគេរៀបការជាមួយគ្នា។ ប៉ុន្តែ ភាពផ្អែមល្ហែមស្នេហ៍របស់តូតា និងលោកនីត ធ្វើឱ្យប្អូនប្រុសទឹម រដ្ឋា លោកទឹម នីដា បានបង្ហូរទឹកភ្នែកជារៀងរាល់រាត្រី ព្រោះមានព័ត៌មានថា លោកថៅកែហាមផ្តាច់មិនឱ្យស្រីស្អាតជួបប្រុសក្មេងទៀតឡើយ…។
ដោយមិនខុសពីលើកមុនៗទេ ក្នុងការបង្ហាញខ្លួនកាលពីពេលថ្មីៗនេះ ក្នុងកម្មវិធីមង្គលការរបស់ប្អូនស្រីអ្នកនាងចន ច័ន្ទលក្ខិណា នោះ ស្រីស្អាតម៉ាក សែនសូនីតា បានកៀកកើយលោកថៅកែប៉ុល វិបូរ ដូចគូស្នេហ៍ ទើបរៀបអាពាហ៍ពិពាហ៍ហើយថ្មីៗ នាំឱ្យភ្ញៀវ និងអ្នកសិល្បៈជាច្រើនបានចោលភ្នែកក្រឡេកមើលគូស្នេហ៍ ដែលពីមុនធ្លាប់តែអះអាងថា រាប់អានគ្នាដូចជាមេនិងកូនចៅ តែពេលនេះ បែរជាប្រឡេះមិនចង់ចេញនេះ។
ដោយឡែកតារាសិល្បៈដែលស្និទ្ធស្នាលម៉ាក សែនសូនីតា បាននាំគ្នាជំរុញឱ្យស្រីស្រស់រូបនេះ ប្រញាប់ដឹកដៃគ្នាចូលរោងការជាមួយលោកថៅកែឱ្យបានឆាប់ៗទៅ ព្រោះពួកគេទន្ទឹងរង់ចាំទៅញ៉ាំការ ធ្វើឱ្យតូតា អៀនប្រៀនជាខ្លាំង ខណៈដែលលោកវិបូរ ញញឹមបិទមាត់មិនជិតឡើយ។
ម៉ាក សែនសូនីតា ធ្លាប់អះអាងនៅថ្ងៃសម្ពោធហាង “ផែសមុទ្រ” របស់នាងថា រឿងរៀបការជាមួយលោកប៉ូល វិបូរ នោះ មិនទាន់កំណត់ជាក់លាក់ឡើយ តែនាងមានគម្រោងក្នុងចិត្តថា ពេលចូលរោងការ គឺសម្លៀកបំពាក់ឈុតកូនក្រមុំរបស់នាង ត្រូវតែមានហាងសម្អាងការ3 ចូលរួម ហើយនាងមិនលាក់លៀមឡើយ គឺអនុញ្ញាតឱ្យអ្នកសារព័ត៌មានថត Live តាមចិត្តទៀតផង។
គ្រាន់តែតូតា និយាយបែបនេះ លោកថៅកែនីត បានដើរមកប្រាប់ថា “អូនឯងនិយាយអ៊ីចឹង មិនអ្នកកាសែតដឹងមុនអស់ហើយអី? កុំនិយាយប្រាប់អ្នកកាសែតទាំងអស់អ៊ីចឹងណា៎ អូនសម្លាញ់! ប្រយ័ត្នគេចុះផ្អើលអស់ហើយ”។
ម៉ាក សែនសូនីតា បានបង្ហាញចំណងស្នេហ៍ជាចំហជាមួយលោកប៉ុល វិបូរ ហៅនីត អតីតអគ្គនាយករងប៉ុស្តិ៍ CTN តាំងពីអ្នកទាំង2 បានចូលហ៊ុនរកស៊ីជាមួយគ្នា ដោយបើកហាង “ផែសមុទ្រ” ដែលបានដំណើរការបាន2ទីតាំងរួចទៅហើយ និងតាមគម្រោងគូស្នេហ៍ខុសវ័យនេះ គ្រោងពង្រីកឱ្យបាន12សាខា ដែលមាននៅគ្រប់ខណ្ឌ ក្នុងរាជធានីភ្នំពេញ ទៀតផង ដោយបោះទុនមិនក្រោម50ម៉ឺនដុល្លារឡើយ។
ប្រភពដែលជិតស្និទ្ធម៉ាក សែនសូនីតា បានឱ្យដឹងថា ពេលនេះ តូតា និងលោកថៅកែនីត បានរួមរស់ក្រោមដំបូលផ្ទះតែមួយដូចក្រុមគ្រួសារតែមួយ ហើយលោកវិបូរ ថែមទាំងហៅម្តាយតូតា ថា “ម៉ាក់ៗ” ពេញៗមាត់ទៀតផង ខណៈដែលក្រុមគ្រួសារទាំងសងខាងមិនបានប្រឆាំងចំណងស្នេហ៍នេះឡើយ ព្រោះថា លោកវិបូរ បានលែងលះជាមួយភរិយាដើមដាច់ស្រេចអស់ទៅហើយដែរ ទើបសូនីតា ហ៊ានបង្ហាញស្នេហ៍នេះជាចំហ។
គួរកត់សម្គាល់ដែរថា នៅពេលដែលចំណងស្នេហ៍ម៉ាក សែនសូនីតា និងលោកប៉ុល វិបូរ កាន់តែផ្អែមល្ហែម និងស្អិតល្មួតខ្លាំងពី1ថ្ងៃទៅ1ថ្ងៃនេះ រហូតដល់អ្នកសិល្បៈរួមអាជីពបានហៅតូតា ថា ជាប្រពន្ធលោកវិបូរ នោះ ក៏មានព័ត៌មានលេចឮថា អតីតសង្សារក្មេងតូតា គឺប្អូនប្រុសទឹម រដ្ឋា លោកទឹម នីដា បានរងការឈឺចាប់ និងស្តាយស្នេហ៍ស្រីស្អាតរូបនេះជាខ្លាំង រហូតដល់គេងពេលរាត្រី សម្រក់ទឹកនេត្រាតែម្នាក់ឯងទៀតផង។
ព័ត៌មានបានឱ្យដឹងថា តូតា ត្រូវលោកថៅកែហួងហែងខ្លាំង ដោយមិនមានការអនុញ្ញាតឱ្យទៅជួបប្រុសក្មេងដូចមុនឡើយ សូម្បីតែពួកគេទៅចូលរួមកម្មវិធីអ្នកសិល្បៈ ជួបគ្នាដោយចៃដន្យក្តី ក៏មិនហ៊ាននិយាយរកគ្នាឡើយ។ ទោះជាយ៉ាងណា លោកនីតា នៅតែស្នេហាតូតា ដដែល ទោះបីជាមិនអាចប្រជែងយកឈ្នះលោកថៅកែក៏ដោយ តែប្រុសក្មេងរូបនេះចង់តែដណ្តើមស្រីស្អាតយកពីកណ្តាប់ដៃលោកថៅកែឱ្យបានវិញ។ ប៉ុន្តែតូតា ធ្លាប់អះអាងថា នាងពេញចិត្តលោកនីដា ត្រង់ចេះតស៊ូប្រឹងប្រែងធ្វើការងារ តែនាងមិនប្រាកដថា ជ្រើសប្រុសក្មេងរូបនេះធ្វើជាប្តីឡើយ ព្រោះថា ពេលនេះនាងមានជ្រើសស្នេហ៍ច្រើនណាស់។
ម៉ាក សែនសូនីតា ដែលទាត់ចោលសំណើស្នេហ៍ជាច្រើនពីប្រុសៗអ្នកមានអំណាច ដោយមិនអើពើនឹងតំណែងជំទាវនោះ បានឱ្យដឹងដែរថា នាងយកតំណែងនោះមកដោយគ្មានន័យធ្វើអី ព្រោះភាគច្រើនប្រុសៗទាំងនោះ មានប្រពន្ធនិងកូនអស់ទៅហើយ អ៊ីចឹងនាងសុខចិត្តរស់នៅជាមួយបុរសណាដែលស្រលាញ់នាងពិត និងគ្មានការជាប់ជំពាក់ជាមួយស្រីណាផ្សេង។
ប៉ុន្តែ ការថ្លែងបែបនេះរបស់តូតា ហាក់មិនធ្វើឱ្យគេអស់ចិត្តឡើយ ព្រោះថា ពេលនេះនាងហ៊ឺហាដល់កំពូល ដោយជិះរថយន្តទំនើប Lexus LX450d ស៊េរីឆ្នាំ2017 តម្លៃ17ម៉ឺនដុល្លារ ដែលត្រូវបានគេខ្សឹបខ្សៀវថា មិនមែនជាកាដូរបស់លោកវិបូរ ឡើយ តែអាចជាគូស្នេហ៍ផ្សេងទៀត ស្របពេលដែលតូតា នៅតែអះអាងថា លុយដែលទិញឡានទាំងនោះ គឺចេញពីកម្លាំងញើសឈាមរបស់នាងសុទ្ធសាធ។
ក្រៅពីម៉ាក សែនសូនីតា ដែលប៉ះស្នេហ៍ជាមួយលោកថៅកែផលិតកម្មនោះ គឺនៅមានតារាស្រីស្អាតល្បីៗមួយចំនួនទៀត ធ្លាប់លេចឮថា មានលោកថៅកែផលិតកម្មផ្សេងៗទៀត តាមស្នេហ៍ដែរ ក្នុងនោះមាន សុខ សោម៉ាវត្តី, គង់ វង្សយ៉ាទី, បេនី យ៉ាំង, លី ឡាវីន, សាឡាត់ ស្រីឡាង, អ៊ុំ វ៉ាន់ដា, ឌុច លីដា, មាស សម្ផស្ស, តេង លក្ខិណា, ពេជ្រ សូលីកា ជាដើម តែពួកគេធ្លាប់ច្រានចោល និងពេលនេះមានគូស្នេហ៍ថ្មីរៀងៗខ្លួនអស់ទៅហើយ៕