តារាសម្តែង និងជាពិធីការិនីប៉ុស្តិ៍លេខ៥ នាងព្រះកាយ ច័ន្ទ ដែលពេលនេះមានរថយន្ត ទំនើប២គ្រឿង គឺ Ford និង Highlander នោះ នៅមិនទាន់គ្រប់គ្រាន់ឡើយ នាងចង់ជិះ ឡាន Range Rover 020 ដែលមានតម្លៃស្មើវីឡា១នោះឱ្យបាន ដើម្បីសម្រេចក្តីស្រមៃតាំងពីយូរមកហើយ។
តើបុរសណាទៅដែលហ៊ានបោះទុនជាង២០ម៉ឺនដុល្លារ ដើម្បីផ្តល់កាដូរថយន្តទំនើបនោះ ស្ទូចបេះដូងព្រះកាយ ច័ន្ទ បាន?
កាលពីចូលសិល្បៈដំបូង នាងព្រះកាយ ច័ន្ទ ជិះរថយន្តព្រីស្តូល តម្លៃជាង៣ពាន់ដុល្លារ ហើយ នាងថា នឹងមិនលេងម៉ូដរថយន្តឡើយ ម៉្យាងទៀត នាងចូលចិត្តឡានតូចៗ ព្រោះស្រួលធ្វើដំណើរ ដោយមិនបារម្ភកកស្ទះចរាចរណ៍។ ប៉ុន្តែក្រោយពីត្រូវរង្វាន់រថយន្តទំនើប Ford ពីក្រុមហ៊ុនស្រាបៀរ Ganzberg តម្លៃជាង៤ម៉ឺនដុល្លារមក និងទិញបានរថយន្ត Highlander ១គ្រឿងទៀតតម្លៃជាង២ម៉ឺនដុល្លារនោះ បែរជាតារាស្វែលរូបនេះថា នាងមានក្តីស្រមៃចង់ជិះរថយន្តទំនើបម៉ាក Range Rover ស៊េរីថ្មីបំផុត ដែលមានតម្លៃជាង២០ម៉ឺនដុល្លារឯណោះ។
ក្នុងជំនួបផ្ទាល់កាលពីពេលថ្មីៗនេះ ព្រះកាយ ច័ន្ទ និយាយថា នាងស្រលាញ់រថយន្ត Range Rover ខ្លាំង ហើយមិនយូរទេយ៉ាងហោចណាស់ ត្រឹម២ឆ្នាំទៀត គឺនាងត្រូវតែសម្រេចបំណងនេះ ឱ្យបានជាមិនខាន។ តារារាងស្វែលថ្លែងថា “ខ្ញុំស្រលាញ់ឡាន Range Rover ហ្នឹង ហើយបើទិញ គឺត្រូវតែទិញអាស៊េរីថ្មីបំផុតហើយ។ មិនយូរទេ គឺអាច២ឆ្នាំទៀត ខ្ញុំនឹងទិញវាបានហើយ ព្រោះពេលនេះយើងកំពុងតែសន្សំលុយជាបណ្តើរៗហើយ”។
ការប៉ងជិះរថយន្ត Range Rover ស៊េរីថ្មីបំផុត រយៈពេល២ឆ្នាំខាងមុខនេះ គឺមានន័យថា នាងព្រះកាយ ច័ន្ទ នឹងជិះ Range Rover ស៊េរីឆ្នាំ២០២០ ឱ្យផ្អើលមេឃ ហើយច្បាស់ណាស់ថា វាមានតម្លៃជាង២០ម៉ឺនដុល្លារឯណោះ។ យ៉ាងណា អ្នកសិល្បៈមួយចំនួនបានបង្ហើបឱ្យដឹងថា បើពឹងលើអាជីពសិល្បៈទាំងស្រុងនោះ ប្រាក់ជាង២០ម៉ឺនដុល្លារ គឺប្រាកដជាមិនអាចទៅរួចឡើយ បើត្រឹមតែជាតារាសម្តែងនោះ ហេតុនេះហើយ អ្នកខ្លះថា នាងព្រះកាយ ច័ន្ទ នឹងអាចមានជំនួយពីគូស្នេហ៍ជាមិនខាន ទើបអាចសម្រេចក្តីស្រមៃនេះបានដូចបំណងទៅរួច។
ប៉ុន្តែទាំងព្រះកាយ ច័ន្ទ និងឪពុកនាង លោកចែម ចាន់ដារា ដែលតាមការពារកូនស្រីគ្រប់ ជំហាននោះ កន្លងមកមកបានអះអាងច្បាស់ៗថា មិនត្រូវការបុរសណាយកទឹកប្រាក់មកជាថ្នូរ នឹងស្នេហានោះឡើយ ហើយនាងព្រះកាយ ច័ន្ទ ខ្លាចបំផុត គឺការប៉ះស្នេហ៍លើប្តីគេ អីចឹងមិនលោតឆត្រ ដើម្បីជាការស្រវាទ្រព្យដោយរហ័សនោះឡើយ។
ការបង្ហាញក្តីប៉ងប្រាថ្នាចង់ជិះឡាន Range Rover ថ្មីបំផុតរបស់នាងព្រះកាយ ច័ន្ទ នៅពេល នេះ គឺចំពេលដែលតារាស្រីវ័យក្មេងមួយចំនួន កំពុងប្រជែងគ្នាជិះរថយន្ត Lexus Lx 570 យ៉ាងព្រោងព្រាត ដែលធ្វើឱ្យមហាជនស្ញប់ស្ញែងខ្លាំង ព្រោះថា កន្លងមកគេចាត់ទុកថាអាជីពសិល្បៈ គឺបានតែមួយក្រពះ មិនអាចធ្វើមានបានទេ ព្រោះប្រមូលប្រាក់ល្អិត។ ប៉ុន្តែបើរកបានតែប្រាក់ល្អិតមែននោះ ហេតុអ្វីបានជាតារាស្រីស្អាតៗសាច់សខ្ចីវ័យក្មេងមួយចំនួននោះ មានរថយន្ត ទំនើបៗជិះ និងរស់នៅផ្ទះវីឡាស្កឹមស្កៃបាន? អ្នកខ្លះនៅតែដាក់ការសង្ស័យថា តារាស្រីស្អាតៗ ទាំងនោះមានគូស្នេហ៍ជួយឧបត្ថម្ភនៅក្រោយខ្នង បានជាមានទ្រព្យដោយរហ័ស និងមិនចាំបាច់ ប្រឹងប្រែង តែនៅពេលដែលសួរពួកគេគ្មានតារាណាម្នាក់ទទួលស្គាល់ដូចអ្វីដែលមានការលេចឮ នោះឡើយ។
ដោយឡែក នាងព្រះកាយ ច័ន្ទ វិញ ធ្លាប់លេចឮថា មានប្រុសអូស្ត្រាលី ចង់ចូលស្តីដណ្តឹង តាំងពីឆ្នាំ២០១៥ តែក្រោយមកឪពុកនាងព្រះកាយ ច័ន្ទ បានអះអាងថា បុរសនោះនៅមានប្រពន្ធកូន ទើបលោកមិនឱ្យកូនស្រីទាក់ទងឡើយ។ លោកចែម ចាន់ដារា ធ្លាប់ប្រាប់ដែរថា មានបុរសអ្នកមានម្នាក់នៅក្នុងស្រុកចង់ស្តីដណ្តឹងកូនស្រីលោកដែរ តែក្រោយមកក៏ដឹងថា មានប្រពន្ធកូនទៀត ទើបលោកឱ្យកូនស្រីដើរចៀសឱ្យឆ្ងាយ កុំចូលជិតឱ្យសោះរឿងប្តីគេ។ លោកថាកូនស្រីគាត់នាងព្រះកាយ ច័ន្ទ មិនចាំបាច់គាត់ប្រាប់ ក៏មិនចូលជិតដែរ ឱ្យតែដឹងថា អ្នកស្រលាញ់មាន ប្រពន្ធកូនហើយ គឺមិននិយាយរកដែរ យកលុយមកធ្វើអី បើប្តីគេហ្នឹង?
ព្រះកាយ ច័ន្ទ បង្ហើបថា នាងមានបុរសនៅក្រៅប្រទេសសុំស្នេហ៍ដែរ តែមិនទាន់ប្រាកដ ទេ ព្រោះថា បើនាងយកប្រុសអាណិកជនខ្មែរ ធ្វើជាប្តីនោះ ប្រាកដណាស់ថា ទាល់តែបុរសនោះ ចូលមករស់នៅក្នុងស្រុកខ្មែរតាមនាងដែរ ទើបអាចទៅរួចបើថាឱ្យនាងចេញទៅរស់នៅបរទេស តាមប្តី គឺនាងធ្វើមិនបានទេ ព្រោះតែជាទម្លាប់ គឺទៅណាមានឪពុកតាមជាប់ជានិច្ច តាំងតែពីតូចម៉្លេះ។
ព្រះកាយ ច័ន្ទ ជាតារាសម្តែងមានកុងត្រាជាមួយប៉ុស្តិ៍លេខ៥ ដោយទទួលបានប្រាក់ខែជាង ៥០០ដុល្លារ ក្នុង១ខែ តែនាងត្រូវថតរឿងភាគឱ្យតែប៉ុស្តិ៍លេខ៥ប៉ុណ្ណោះ តែរឿងដុំអាចថតឱ្យ ផលិតកម្មខាងក្រៅបាន។
គេចាំមើលថា នៅឆ្នាំ២០២០នេះ នាងព្រះកាយ ច័ន្ទ អាចសម្រេចក្តីស្រមៃទិញឡាន Range Rover 020 តម្លៃជាង២០ម៉ឺនដុល្លារ ជិះឱ្យផ្អើលមេឃបានដែរឬទេ? ខណៈពេលនេះ តារាដែលជិះ Range Rover មានដូចជា លោក ព្រាប សុវត្ថិ, យក់ ឋិតរដ្ឋា, សុខ ពិសី, ពេជ្រ សោភា, បេប៊ី, ឈិត សុវណ្ណបញ្ញា, ពេជ្រ សូលីកា, ឌុច សុភា, ជាដើម៕
