ផលិតកម្ម Wonder Film ដែលមានចាងហ្វាងលោកសែម វិសាល នោះ បានដាក់សម្ពោធវណ្ណកម្មដំបូងរបស់ខ្លួន រឿង ”ផ្ទះចិញ្ចឹមខ្មោច” កាលពីល្ងាចថ្ងៃទី០៧ ខែមីនា ឆ្នាំ២០១៨ នៅផ្សារទំនើបសូរិយា ដោយមានក្រុមផលិតករតារាសិល្បៈជាច្រើនចូលរួមអបអរសាទរ។ តែអ្វីដែលចម្លែកនោះ គឺតួឯកស្រីក្នុងរឿង ”ផ្ទះចិញ្ចឹមខ្មោច” គឺនាងដេនីក្វាន់ ដែលជាតារាលេងសម្រស់ដើមទ្រួងនោះ មិនបានចូលរួមក្នុងកម្មវិធីពិសេសនេះឡើយ ទើបធ្វើឲ្យតួឯកប្រុស លោក So Cool ចេញមុខតែម្នាក់ឯងយ៉ាងកណ្ដោចកណ្ដែង ព្រោះបាត់ដៃគូ។
អ្នកចាត់ការទូទៅផលិតកម្ម Wonder Film បានឲ្យដឹងថា “មូលហេតុដែលបាត់ខ្លួនតួឯកស្រី នាងដេនីក្វាន់ នៅថ្ងៃសម្ពោធនេះ ព្រោះតែតារារូបនេះមានដំណើរកម្សាន្ដផ្ទាល់ខ្លួនចេញទៅទីក្រុងហុងកុង ដោយវិលមកមិនទាន់ ហេតុនេះហើយខាងផលិតកម្មត្រូវតែដាក់សម្ពោធទៅតាមគម្រោង មិនអាចលើកពេលបានទេ”។
ចំណែកលោក So Cool ដែលជាតួឯកប្រុស បានឲ្យដឹងថា “លោកសប្បាយចិត្តខ្លាំងណាស់ដែលបានតំណែងជាតួធំក្នុងរឿងនេះ ហើយសង្ឃឹមថា បងប្អូននឹងជួយគាំទ្រភាពយន្ដខ្មែរទាំងអស់គ្នា”។
ក្រៅពីដេនីក្វាន់ និងលោក So Cool ជាតួឯកប្រុសស្រីនោះ រឿង ”ផ្ទះចិញ្ចឹមខ្មោច” ក៏មានការចូលរួមពីតារាល្បីៗជាច្រើនដួងទៀត ដូចជា នាយគ្រឿន, BIG និងតារាវ័យក្មេងជាច្រើនដួងទៀត។
នាយគ្រឺន បានឲ្យដឹងថា ”រឿង ”ផ្ទះចិញ្ចឹមខ្មោច” នេះជារឿងប្លែកជាងរឿងមុន ដែលខ្ញុំបានថត ព្រោះលងសាហាវណាស់។ និយាយទៅ លងសាហាវតែម្ដង ហើយបងប្អូនគិតទៅមើលថា ផ្ទះគេច្រើនតែចិញ្ចឹមកូនចៅ តែម៉េចបានជាផ្ទះនេះ ចិញ្ចឹមខ្មោចអីចឹង។ បើចង់ដឹងថា នាយគ្រឺន លេងរឿងនេះសាហាវម៉េច គឺមានតែទៅទស្សនាទាំងអស់គ្នាទេ បានដឹងណាបងប្អូន”។
ចំណែក លោក BIG តារាកំប្លែងមាឌយក្សរបស់ទូរទស្សន៍ CTN និងជាតារាចម្រៀងរបស់ផលិតកម្មថោន បាននិយាយដោយសំណើចថា “នេះគឺជាលើកទី១ហើយ សម្រាប់មួយជីវិតខ្ញុំ តាំងពីថតកុនមក ខ្ញុំមិនដែលចេញទៅថតរឿងណាដែលមានទីតាំងឆ្ងាយដូចប្លង់ក្នុងរឿង ”ផ្ទះចិញ្ចឹមខ្មោច” ហ្នឹងទេ គឺខ្ញុំទៅថតដល់ខេត្តកំពង់ចាមឯណោះ។ កាលថតកុនលើកមុនៗ ខ្ញុំទៅឆ្ងាយបំផុតត្រឹមតែទីតាំងនៅភ្នំប្រសិទ្ធិទេ។ ចំណែករឿងនេះទីតាំងដល់ខេត្តកំពង់ចាម អីចឹងច្បាស់ជាល្អមើលមិនខានទេ…”។
លោកសែម វិសាល ចាងហ្វាងផលិតកម្ម Wonder Film បានឲ្យដឹងថារឿង ”រឿង “ផ្ទះចិញ្ចឹមខ្មោច” នេះ ចំណាយទុនអស់ជាង៥ម៉ឺនដុល្លារ ហើយភាពយន្ដខ្នាតធំនេះនឹងដាក់បញ្ចាំងចាប់ពីថ្ងៃទី០៨ ខែមីនា ឆ្នាំ២០១៨នេះ តទៅ នៅតាមបណ្ដារោងកុនទំនើបៗទាំងអស់”។
លោកវិសាល ក៏បានឲ្យដឹងដែរថា “ការផលិតភាពយន្ដនេះ លោកនៅមានបទពិសោធន៍ក្មេងខ្ចី ហើយមូលហេតុដែលលោកធ្វើភាពយន្ដនេះបាន គឺដោយមើលគំរូចាងហ្វាងផលិតកម្មដទៃទៀត ជារៀមច្បង ដែលបង្ហាញបទពិសោធន៍ល្អៗជាច្រើនដល់រូបលោក”។
ទស្សនិកជនមានការភ្ញាក់ផ្អើលខ្លាំងនៅពេលនាងដេនី ក្វាន់ ដែលធ្លាប់ត្រូវបានក្រសួងព្រមានជាច្រើនលើកពីភាពសិចស៊ីបស់នាងជ្រុលហួសហេតុនេះ បែរជាពេលនេះតារាលេងសម្រស់ដើមទ្រូងទ្រលុកទ្រលន់រូបនេះ ស្ងាត់ៗបែរជាឆក់បានតំណែងជាតួឯកក្នុងភាពយន្ដខ្នាតធំ រឿង ”ផ្ទះចិញ្ចឹមខ្មោច” ធ្វើព្រងើយ ហើយថ្ងៃសម្ពោធរឿង ដេនីក្វាន់ បែរជាបណើ្ដរគូស្នេហ៍មាឌធំ ទៅផ្អែមល្ហែមស្នេហ៍នៅទីក្រុងហុងកុង ទៅវិញ៕
