ម្ចាស់បទ ”សុំទោស” សៅ ឧត្តម បានចាកចេញពីផលិតកម្ម LD Picture ទាំងចម្រូងចម្រាស បន្ទាប់ពីបទចម្រៀងមួយនេះបានល្បីខ្ទរខ្ទារពេញប្រទេសមក ដែលតាមព័ត៌មានថា សូម្បីតែរឿងភាគដែលឧត្តម បានថតឲ្យ LD នោះ ក៏ត្រូវលុបចោលទាំងអស់ដែរ។ ភាពចម្រូងចម្រាសរបស់សៅ ឧត្តម ដែលទើបច្រៀងបើកឆាកឲ្យ LD ភ្លាមល្បីភ្លែត ហើយក៏មានរឿងរ៉ាវចម្រូងចម្រាសនៅពេលតែមួយនេះដែរ ទើបធ្វើឲ្យបុរសសង្ហាទុកពុកមាត់ចង្កាឆ្មារៗ ធ្វើឲ្យក្រមុំៗក្នាញ់រូបនេះដើរចេញពី LD ចូលជ្រកនៅផលិតកម្ម 2B វិញ។
ក្នុងជំនួបផ្ទាល់អ្នកចម្រៀងសៅ ឧត្តម ដែលមកពីខេត្តស្វាយរៀង រូបនេះ បានឲ្យដឹងថា “រូបគេពិតជាមិនមែនជាអ្នកចម្រៀងរបស់ LD ទៀតទេ ព្រោះបានចេញជាង៤ខែទៅហើយ ដោយសារតែមិនមានគ្រប់គ្រាន់ ទើបសុខចិត្តផ្ដាច់ខ្លួនចេញពីកុងត្រា តែការរាប់អានជាមួយថៅកែ LD និងក្រុមការងារ គឺនៅតែបន្ដមានដដែល”។
សៅ ឧត្តម រៀបរាប់ថា ”ខ្ញុំចេញពី LD គឺដោយសារតែយើងគ្មានពេលវេលាគ្រប់គ្រាន់សម្រាប់គាត់ តែសម្រាប់រឿងភាគគាត់ ខ្ញុំនៅតែថតបទចម្រៀងឲ្យអមរឿងដូចមុនអីចឹង។ ខ្ញុំបានថតរឿង១ ឲ្យ LD ដែរ ហើយត្រូវលុបចោលវិញ ពេលដែលខ្ញុំចេញពីផលិតកម្មគាត់នេះ។ ខ្ញុំគ្រាន់តែចង់និយាយថា ដូចជាគ្មានបញ្ហាអីធំដុំទេ ហើយខ្ញុំនិងគាត់ គឺនៅរាប់អានគ្នាជាធម្មតាទេ។ ពេលនេះខ្ញុំបានចូលទៅច្រៀងនៅផលិតកម្ម 2B ដែលថៅកែផលិតកម្ម គាត់ស្គាល់ខ្ញុំដែរ ហើយចេញបានជាង១០បទហើយ”។
សៅ ឧត្តម ជាអតីតបេក្ខភាព “Cambodian Idol” រដូវកាលទី១ តែបានបរាជ័យក្នុងការលើកពាននៅវគ្គផ្ដាច់ព្រ័ត្រ ដូចម៉ៅ ហាជី ដែរ ដែលធ្វើឲ្យអ្នកកាន់ពាន គឺនី រតនា ។ សៅ ឧត្តម និងម៉ៅ ហាជី ដែលអន់ចិត្តជាមួយហង្សមាស ព្រោះមិនឲ្យពួកគេជាម្ចាស់ពាននោះ បានគេចចេញមិនព្រមច្រៀងឲ្យហង្សមាស ឡើយ ដោយហាជី ទៅចូលថោន ចំណែកឧត្តម ចូលផលិតកម្មដែលមិនសូវល្បីទៅវិញ។
ទោះជាយ៉ាងណា តាមព័ត៌មានថា សមត្ថភាព និងរូបរាងសៅ ឧត្តម បើចង់ចូលផលិតកម្មសាន់ដេ ឬថោន ប្រាកដជាផលិតកម្មធំទាំង២នេះស្វាគមន៍ជាមិនខាន។
តារាវ័យក្មេងសំឡេងក្រអួនក្រអៅរូបនេះ បានឲ្យដឹងទៀតថា ”និយាយទៅ យើងដើរផ្លូវខុសតាំងពីដើមមកហើយ អីចឹងខ្ញុំចង់ច្រៀងនៅខាងក្រៅច្រើនជាងចូលទៅកុងត្រាជាមួយផលិតកម្មផ្សេងៗ។ កាលប្រលងចប់ភ្លាមៗ ខ្ញុំមិនចូលហង្សមាស ទេ តែក្រោយមកខ្ញុំសូមចូលហង្សមាស វិញ គាត់ថាមិនយកយើង។ ពេលនេះខ្ញុំមានការងារធ្វើដែរ គេហៅច្រៀងជាហូរហែដែរហ្នឹង គ្រាន់តែថាកម្មវិធីខ្លះគេមិន Live គឺមិនខ្លាំងដូចហង្សមាស។ រហូតមកដល់ពេលនេះ ខ្ញុំនៅតែប្រកាន់ទស្សនៈផ្ទាល់ខ្លួនថា ខ្ញុំមិនច្រៀងបទ Copy ទេ គឺយើងច្រៀងបទ Original Songs អីចឹងធ្វើម៉េចបើយើងដើរផ្លូវហ្នឹងទៅហើយ។ ខ្ញុំឃើញបទថ្មីខ្ញុំ២បទមានការគាំទ្រគួរសមដែរ គឺបទ ”ប៉ុន្មានខែទៀត ទើបអូនរៀបការ?” និងបទ ”ខ្ញុំយកប្រពន្ធក្បត់ចិត្តសង្សារ”។
សៅ ឧត្តម ធ្លាប់ប្រាប់ថា រូបគេពេលនេះមានម្ចាស់ចិត្តទៅហើយ តែមិនទាន់គិតគូររឿងរៀបការឡើយ។ ដោយឡែកនៅអំឡុងខែមេសា ចូលឆ្នាំខ្មែរ នេះ ឧត្តម ក៏គ្រោងហោះទៅច្រៀងសម្ដែងរយៈពេលខ្លីជាលើកទី១ នៅប្រទេសអូស្រ្ដាលី និងញូវហ្សែឡែនដ៍ ផងដែរ ហើយឧត្តម សង្ឃឹមថា នឹងមានបងប្អូនគាំទ្រ ព្រោះតាមដឹង គឺមានអ្នកសំណូមពរឲ្យតារាដែលមិនបានកាន់ពាន Cambodian Idol រូបនេះចេញទៅច្រៀងនៅអូស្រ្ដាលី រយៈពេលយូរទៀតផង៕
