ភ្នំពេញ ៖ កម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol រដូវកាលទី៣ បាននិងកំពុងដំណើរការឈានឆ្ពោះទៅរកវគ្គផ្តាច់ព្រ័ត្រនៅប៉ុន្មានសប្តាហ៍ខាងមុខនេះហើយ ក្នុងនោះ បេក្ខជន-បេក្ខនារីដែលសុទ្ធសឹងតែមានសមត្ថភាព និងទេពកោសល្យប្រដមត្រសងគ្នា ត្រូវបានជម្រុះចេញជាបន្តបន្ទាប់ ដើម្បីស្វែងរកបេក្ខភាពដែលមានទេពកោសល្យ និងទឹកដមសំឡេងល្អលើសគេ មានសមត្ថភាពកាន់ពាន Cambodian Idol រដូវកាលទី៣ ក្នុងនោះ បេក្ខនារីគង់ កែវមរកត ត្រូវបានគេមើលឃើញថា អាចមានឱកាសលើកពានលំដាប់ថ្នាក់ពិភពលោកមួយនេះ។
នៅក្នុងកម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol រដូវកាលទី៣ សប្តាហ៍ទី៥ រាត្រីថ្ងៃទី០៩ ខែមីនា ឆ្នាំ២០១៧ បេក្ខនារីគង់ កែវមរកត បានលើកយកបទចម្រៀងដែលមានចំណងជើង “បងពីមុនបាត់ទៅណា“ មកបកស្រាយបង្ហាញសមត្ថភាព ព្រមទាំងបានបង្ហាញនូវការស្លៀកពាក់ឈុតរ៉ូបរាត្រីសមោសដ៏លេចធ្លោទៀតផង ធ្វើឱ្យមហាជន ពិសេសសូម្បីតែគណៈកម្មការទាំង៤រូប ព្រមទាំងពិធីករ ពិធីការិនី បាននាំគ្នាពោលសរសើរមិនដាច់ពីមាត់ ជុំវិញទឹកដមសំឡេង និងការតុបតែងខ្លួនដ៏គួរឱ្យទាក់ទាញនេះ។ ទីបំផុត មហាជនបានសម្រេចបោះឆ្នោតគាំទ្រ រហូតជំរុញឱ្យគង់ កែវមរកត អាចឈានទៅកាន់វគ្គ Live Show សប្តាហ៍ទី៦ ជាបន្តទៀត។
បន្ទាប់ពីមានឱកាសឈានជើងទៅកាន់វគ្គបន្ទាប់ តាមរយៈការគាំទ្រផ្ញើសារពីទស្សនិកជនរួចមក ស្រីតូចគង់ កែវមរកត បានបង្ហោះសារមួយនៅក្នុងគណនីហ្វេសប៊ុកផ្ទាល់ខ្លួនរបស់នាង កាលពីថ្ងៃទី១០ ខែមីនា ឆ្នាំ២០១៨ ថា “នាងខ្ញុំ គង់ កែវមរកត ពិតជារំភើបចិត្តខ្លាំងណាស់ សំរាប់រាត្រីយប់មិញនេះ ដែលបានឆ្លងផុត Live Show សប្តាហ៍ទី៥ ឈានចូលសប្តាហ៍ទី៦នេះ លទ្ធផលល្អដែលនាងខ្ញុំទទួលបានយប់មិញនេះ គឺទទួលបានពីសំណាក់ពុកម៉ែ បងប្អូន ព្រមទាំងមិត្តៗទាំងអស់ ដែលបានផ្ញើសារគាំទ្រដល់រូបនាងខ្ញុំ ឱ្យបានបន្តទៅវគ្គបន្ទាប់ទៀត នាងខ្ញុំពិតជាសូមអរគុណពុកម៉ែ បងប្អូន ព្រមទាំងមិត្តៗទាំងអស់ខ្លាំងណាស់ សម្រាប់សំឡេងសារយប់មិញនេះ សូមពុកម៉ែ បងប្អូនមេត្តាបន្តផ្ញើសារគាំទ្ររូបនាងខ្ញុំបន្តទៀត ដើម្បីឱ្យនាងខ្ញុំបានបន្តទៅកាន់វគ្គក្រោយៗទៀតបានផងចា៎ មរកត ពិតសូមអរគុណ អស់ពីចិត្តតែម្តងចា៎…”។
គួរបញ្ជាក់ថា បេក្ខនារីគង់ កែវមរកត មានស្រុកកំណើតនៅខេត្តកំពង់ចាម នាងមានឪពុកជាអ្នកម៉ៅការសំណង់ និងមានជីវភាពមិនសូវធូរធារនោះទេ ហេតុនេះទើបនាងត្រូវសម្រេចចិត្តចាកចេញពីស្រុកកំណើត មកបម្រើការផ្នែករត់តុនៅភ្នំពេញ។ ដោយសារតែទទួលបានបទពិសោធន៍ផ្នែកចម្រៀងពីជីដូនដែលជាអ្នកសិល្បៈជើងចាស់ ខាងផ្នែកយីកេ និងមានការលើកទឹកចិត្តពីឪពុកដែលជាអ្នកស្រឡាញ់ចូលចិត្តផ្នែកសិល្បៈចម្រៀងផងនោះ ទើបធ្វើឱ្យគង់ កែវមរកត មានក្តីស្រមៃចង់ក្លាយជាតារាចម្រៀងល្បីឈ្មោះ ពិសេសចង់លើកពាន Cambodian Idol រដូវកាលទី៣នេះតែម្តង។
យ៉ាងណា ត្បិតថាទឹកដមសំឡេង និងទេពកោសល្យរបស់គង់ កែវមរកត ពោរពេញទៅដោយភាពលេចធ្លោ ដែលអាចបកស្រាយបទចម្រៀងគ្រប់បែបបទសណ្ឋាន មិនថាបទសម័យ បទប្រពៃណី បទមនោសញ្ចោតនា ឬបទញ័រញាក់កន្ត្រាក់អារម្មណ៍ ប៉ុន្តែនាងត្រូវទទួលរ៉ាប់រងការងារធ្ងន់ និងឆ្លងកាត់ឧបសគ្គជាច្រើនទៀត ពិសេសត្រូវប្រឈមទៅនឹងការប្រកួតប្រជែង ដែលមិនអាចមើលរំលងបានជាមួយនឹងបេក្ខជន-បេក្ខនារីជាច្រើននាក់ទៀត ដែលសុទ្ធសឹងតែមានទេពកោសល្យ និងទឹកដមសំឡេង ព្រមទាំងសមត្ថភាពពិសេសមិនចាញ់នាងឡើយ ហេតុនេះពិតជាមិនអាចធ្វេសប្រហែសបានឡើង សូម្បីមួយវិនាទី៕
