ភ្នំពេញ ៖ កាលពីយប់ថ្ងៃទី១៣ ខែមីនា ឆ្នាំ២០១៨ កម្លាំងសមត្ថកិច្ចព្រហ្មទណ្ឌនៃស្នងការនគរបាលរាជធានីភ្នំពេញ បានចាប់ខ្លួនសន្តិសុខខណ្ឌដូនពេញ ចំនួន០២នាក់ ក្នុងហេតុការណ៍គ្រោះថ្នាក់ចរាចរណ៍ ព្រួតវាយទៅលើម្ចាស់រថយន្ត ដែលជាសាស្ត្រាចារ្យបង្រៀននៅសាកលវិទ្យាល័យកម្ពុជា គឺបណ្ឌិតស៊ុយ សារ៉េត នៅក្រោយពេទ្យលោកសង្ឃ កាលពីថ្ងៃទី១១ ខែមីនា កន្លងមកនេះ ។
ប្រភពព័ត៌មានពីមន្ត្រីប៉ូលិស បានឲ្យដឹងថា ឈ្មោះភាជ គឹមហាក់ ជាសន្តិសុខសណ្តាប់ធ្នាប់ខណ្ឌដូនពេញ និងម្នាក់ទៀតជាប្រជាការពារនៅសង្កាត់ស្រះចក ជាជនដៃដល់ដំបូងដែលបានប្រើអំពើហិង្សាទៅលើលោកសាស្ត្រាចារ្យ ស៊ុយ សារ៉េត ត្រូវបានសមត្ថកិច្ចចាប់ខ្លួនបានហើយ ។
សូមបញ្ជាក់ថា តាមរយៈលោកឈី សម្បត្តិ ជាមេធាវីតំណាងដោយអាណត្តិឱ្យឈ្មោះ ស៊ុយ សារ៉េតកាលពីរសៀលថ្ងៃទី១៣ ខែមីនា បានដាក់ពាក្យបណ្តឹងនៅស្នងការដ្ឋាននគរបាលរាជធានី ប្តឹងក្រុមជនបង្កមួយក្រុមដែលបានប្រព្រឹត្តអំពើប៉ុនប៉ងធ្វើមនុស្សឃាត អំពើហិង្សាមានស្ថានទម្ងន់ទោស អំពើលួច និងអំពើធ្វើឱ្យខូចខាតទ្រព្យសម្បត្តិដោយចេតនា ប្រព្រឹត្តកាលពីថ្ងៃទី១១ ខែមីនា ឆ្នាំ២០១៨ និងបានទាមទារសំណងជំងឺចិត្ត ១២០០លានរៀល៕