ឆន សុវណ្ណរាជ នៅតែអាចក្តាប់តំណែងជាគណៈកម្មការកម្មវិធី Cambodian Idol រដូវកាលទី3នេះ បានដដែល ទោះជាពេលនេះកេរ្តិ៍ឈ្មោះអ្នកចម្រៀងដែលឡើងកូដខ្លាំង កាលពីឆ្នាំ2007 រូបនេះ បានធ្លាក់ចុះ ព្រោះតែគ្មានបទល្បីៗដូចមុនទៀតក៏ដោយ។
អ្នកជំនាញសិល្បៈបានលើកឡើងថា ការដែលឆន សុវណ្ណរាជ នៅទ្រឹង និងប្រឈមការធ្លាក់ថែមទៀត នាពេលនេះ គឺដោយសារតែការមកដល់របស់ខេមរៈ សិរីមន្ត ដែលធ្វើឱ្យសុវណ្ណរាជ មិនអាចទប់ទល់បាន។
ទោះជាយ៉ាងណា ហង្សមាស នៅតែចាត់ទុកអតីតអ្នកចម្រៀង U2 រូបនេះជាផ្នែកសំខាន់របស់ខ្លួននៅឡើយ ព្រោះថាតំណែងគ្រូបង្វឹកកម្មវិធី Cambodian Idol នោះ នៅរក្សាបាននៅឡើយ បើទោះជាមុននេះ មានការសន្និដ្ឋានថា សិរីមន្ត គឺជាអ្នកដែលចូលទៅជំនួសក្តី។
ឆន សុវណ្ណរាជ ឆក់បានតំណែងជាតួឯកក្នុងភាពយន្ត ដែលទិញមកពីកូរ៉េ រឿង “សិសិររដូវក្នុងបេះដូង”។ ប៉ុន្តែអ្វីដែលចម្លែកនោះ ឆន សុវណ្ណរាជ ដែលធ្លាប់ប្រកាសស្មគ្រ័ស្មោះស្នេហ៍និស្សិតនៅអាមេរិក នាង “អរិយា” នោះ បែរជាស្ងាត់ដំណឹងសូន្យឈឹង ហើយតារាចម្រៀងដុះរោមទ្រូងច្រើននេះ ថែមទាំងមិនដែលរំលឹកនឹកនាដល់នាងអរិយា ដូចមុនទៀតផង។
ប្រភពបានឱ្យដឹងថា ឆន សុវណ្ណរាជ មានមន្តស្នេហ៍មិនធម្មតាឡើយ ព្រោះមានទាំងស្រីទាំងប្រុសតាមស្នេហ៍ ហើយបើទោះជាពេលនេះ អ្នកចម្រៀងផលិតកម្មហង្សមាស ឡើងគរជាន់ជើងគ្នាក្តី តែសុវណ្ណរាជ នៅតែមានឱកាសចេញច្រៀងតាម Concert ធំៗដូចមុននៅឡើយ បើទោះជាតម្លៃខ្លួនច្រៀង1កម្មវិធី ស៊ីថ្លៃត្រឹមពាក់កណ្តាលតារា Grade A ក៏ដោយ។
ទស្សនិកជនរង់ចាំមើលថា បទចម្រៀងឆន សុវណ្ណរាជ នៅឱកាសបុណ្យចូលឆ្នាំខ្មែរនេះ អាចទប់ទល់ជាមួយខេមរ៑ៈ សិរីមន្ត បានដែរឬទេ? ខណៈដែលកាលពីឆ្នាំ2017 សុវណ្ណរាជ ល្បីបទ “មីង²”៕
