ខេត្តបាត់ដំបង ៖ បុរសម្នាក់ កំពុងដាំដំឡូងនៅក្នុងចម្ការខាងក្រោយផ្ទះសុខៗ ស្រាប់តែមេឃចាប់ផ្តើមងងឹតរកកលចង់ភ្លៀង រួចក៏ស្រាប់តែមានរន្ទះបានបាញ់ប្រហារ បណ្តាលឱ្យស្លាប់នៅនឹងកន្លែងយ៉ាងអាណោចអាធ័ម កាលពីវេលាម៉ោង៦ព្រលប់ ថ្ងៃទី២០ ខែមីនា ឆ្នាំ២០១៨ នៅចំណុចចម្ការដំឡូងខាងក្រោយផ្ទះជនរងគ្រោះ ស្ថិតក្នុងភូមិរូង២ ឃុំព្រៃត្រឡាច ស្រុករុក្ខគិរី។
បុរសរងគ្រោះដែលត្រូវរន្ទះបាញ់ស្លាប់ មានឈ្មោះពៅ ហ៊ីម អាយុ៣២ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។
តាមប្រភពពីក្រុមគ្រួសារជនរងគ្រោះ បានឱ្យដឹងថា នៅមុនពេលកើតហេតុ ជនរងគ្រោះបានចេញទៅដាំដំឡូងនៅក្នុងចម្ការខាងក្រោយផ្ទះរបស់ខ្លួនតាំងពីថ្ងៃរសៀលម៉្លេះ លុះដល់វេលាម៉ោងកើតហេតុខាងលើ ជនរងគ្រោះមិនទាន់ឡើងមកផ្ទះវិញនៅឡើយ ព្រោះចង់បង្ហើយដៃបន្តិច ទៀតសិន ស្របជាមួយនោះ មេឃក៏ចាប់ផ្តើមងងឹត រកកលចង់ភ្លៀង ព្រមទាំងមានខ្យល់បោកបក់ លាយឡំដោយផ្គររន្ទះផងដែរ។ ស្រាប់តែភ្លាមនោះ រន្ទះក៏បានបាញ់ចំជនរងគ្រោះ បណ្តាលឱ្យដេកស្តូកស្តឹងនៅនឹងកន្លែង និងធ្វើឱ្យក្រុមគ្រួសារមានការផ្អើលឆោឡោ ស្ទុះចូលទៅជួយ ទើបដឹងថា ជនរងគ្រោះត្រូវរន្ទះបាញ់ស្លាប់បាត់ទៅហើយ រួចក៏រាយការណ៍ប្រាប់សមត្ថកិច្ចឱ្យចុះមកពិនិត្យតែម្តង។
ក្រោយកើតហេតុ សមត្ថកិច្ចជំនាញ បានចុះមកពិនិត្យ និងធ្វើកោសល្យវិច័យសព រួចបញ្ជាក់ថា ជនរងគ្រោះពិតជាត្រូវរន្ទះបាញ់ បណ្តាលឱ្យស្លាប់ប្រាកដមែន។
សាកសពបុរសរងគ្រោះ ត្រូវបានសមត្ថកិច្ចប្រគល់ទៅឱ្យគ្រួសារ ដើម្បីរៀបចំធ្វើបុណ្យតាមប្រពៃណី៕