កំពូលតារាចម្រៀងផលិតកម្មរស្មីហង្សមាស លោកព្រាប សុវត្ថិ បានបង្ហាញខ្លួននៅឆាកតន្រី្ដទូរទស្សន៍អាស៊ីអាគ្នេយ៍ ដោយកម្រ កាលពីថ្ងៃទី១៧ ខែមីនា ឆ្នាំ២០១៨ ដោយច្រៀងក្នុងកម្មវិធី ”តន្ដ្រីភេសជ្ជៈAD” ដោយមានអ្នកទៅទស្សនាផ្ទាល់ឡើងណែនពេញឆាកតន្រ្ដីព្រោះតារាល្បីបាន២១ឆ្នាំ (១៩៩៧-២០១៨) នេះ ក៏បានយកកូនប្រុសរូបសង្ហាទាំង២នាក់ ឡើងឆាកតន្ដ្រីរួមគ្នាដែរនោះ គឺសុវត្ថិ មុនីវណ្ណ និងសុវត្ថិ មុនីនាគ។
ព្រាប សុវត្ថិ បានឲ្យកូនប្រុសច្បងរបស់លោកសុវត្ថិ មុនីវណ្ណ ច្រៀងមុនតាមរយៈបទ ”ហេតុអ្វីចាកចោលបង”, “លួចស្រលាញ់” និងកូនប្រុសទី២ ច្រៀងបទ ”នឹករឿងខ្លះ” និងបទ ”ហត់នឿយ” ហើយពួកគេទាំង២ ក៏ច្រៀងបទរួមគ្នា ”កែវភ្នែក” ផងដែរ។ ទស្សនិកជនបានហ៊ោពេញឆាកប្រគំតន្រ្ដីរបស់ទូរទស្សន៍អាស៊ីអាគ្នេយ៍ ហើយពួកគេសរសើរថា កូនប្រុសទាំង២របស់ព្រាប សុវត្ថិ សង្ហាៗមិនចាញ់តួកុនឡើយ។
ដោយឡែក គ្រាន់តែសុវត្ថិ មុនីវណ្ណ និងសុវត្ថិ មុនីនាគ ចុះពីលើឆាកតន្ដ្រីនោះ ក៏មាននារីក្រមុំៗចោមរោមថតរូបដោយឱបថើបកំលោះសង្ហាទាំង២ មិនចង់ព្រលែងឡើយ។
ចំណែកព្រាប សុវត្ថិ ពេលកូនប្រុសទាំង២ច្រៀងចប់នោះ លោកក៏ឡើងច្រៀងនៅវគ្គចុងក្រោយ តាមរយៈបទ”ចិត្តព្រៃផ្សៃ” និងច្រៀង៣បទថែមទៀត ដោយមានកូនប្រុសទាំង២របស់លោករាំអមផងដែរ តាមរយៈបទ ”មាន់ស្រែបន្លែស្រស់”, ”រាំកូណាស់ចែ” និងបទ ”ផ្លាប់”។ សំឡេងហ៊ោកញ្ជ្រៀវកាន់តែលាន់ឮពេញឆាកតន្ដ្រី នៅពេលដែលព្រាប សុវត្ថិ និងកូនប្រុសទាំង២រាំអមលោក ដែលមានកាយវិការរស់រវើក និងទាក់ទាញខ្លាំងនោះ។
ព្រាប សុវត្ថិ និយាយថា ”ខ្ញុំមានការរំភើបរីករាយខ្លាំងណាស់ ដែលបងប្អូនអញ្ជើញមកទស្សនាច្រើន និងមានការគាំទ្រដល់ខ្ញុំ និងក្រុមគ្រួសារខ្ញុំកន្លងមក រហូតមកដល់ពេលនេះ។ សូមឲ្យឆ្នាំថ្មី បងប្អូនរកស៊ីមានបានទាំងអស់គ្នា”។
មជ្ឈដ្ឋានមហានបានលើកឡើងដូចគ្នាថា ព្រាប សុវត្ថិ នៅតែខ្លាំង និងមិនទាន់មានតារារូបណាអាចផ្ដួលបានឡើយ គិតត្រឹមឆ្នាំ២០១៨នេះគឺលោកល្បីល្បាញជាង២ទសវត្សន៍មកហើយ ដែលមិនមានអ្នកចម្រៀងណាអាចធ្វើបានដូចអ្នកចម្រៀងហង្សមាស រូបនេះ។ ចំណែកការយកកូនប្រុសទាំង២ឡើងច្រៀងនៅលើឆាកតន្ដ្រីតែមួយ និងរាំអមលោកនោះ គឺរឹតតែបញ្ជាក់ថា សម្រាប់តារាចម្រៀងដែលមានសមត្ថភាពពិតប្រាកដ ទោះជាមានប្រពន្ធកូន និងបង្ហាញជាសាធារណៈយ៉ាងណាក៏ដោយ ក៏តារារូបនោះនៅតែត្រូវបានទស្សនិកជនគាំទ្រដដែល ជាក់ស្ដែងដូចជា ព្រាប សុវត្ថិ នេះឯង ដែលពេលបញ្ចេញកូនច្រៀង និងរាំជាមួយនោះប្រជាប្រិយភាពលោកនៅតែខ្លាំង។ ការដែលព្រាប សុវត្ថិ បាននាំកូនកូនប្រុសឡើងច្រៀងរាំ និងបង្ហាញមុខភរិយា អ្នកស្រីឡុង ស្រីមុំ គ្រប់ពេលនោះ ត្រូវបានមហាជនលើកឡើងដែរថា កំពូលតារាចម្រៀងរូបនេះហាក់ដើរផ្លូវបញ្ច្រាសពីលោកខេមរៈ សិរីមន្ដ ទាំងស្រុង ព្រោះថា សិរីមន្ដ ធ្លាប់លេចឮថា មានប្រពន្ធនិងកូនប្រុស២នាក់ ជាយូរឆ្នាំមកហើយ ប៉ុន្តែរហូតមកដល់ពេលនេះ កុំថាឡើយសិរីមន្ដ ហ៊ានរៀបការជាចំហ សូម្បីតែបណ្ដើរប្រពន្ធនិងកូនជាសាធារណៈម្ដងណា ក៏អ្នកចម្រៀងរូបនេះមិនហ៊ានជាដាច់ខាត។ ការដែលសិរីមន្ដ ព្យាយាមលាក់រឿងប្រពន្ធកូនខុសពីព្រាប សុវត្ថិ នេះ ត្រូវបានអ្នកសិល្បៈដូចគ្នាបង្ហើបឲ្យដឹងថា សិរីមន្ដ ខ្លាចធ្លាក់កូដ តែកន្លងមកក្នុងជំនួបជាមួយអ្នកកាសែត សិរីមន្ដ នៅតែព្យាយាមលាក់បាំង និងប្រកែកថា ខ្លួនមិនមានប្រពន្ធនិងកូនដូចគេថាឡើយ បើទោះជាអ្នកសិល្បៈដែលស្និទ្ធនឹងសិរីមន្ដ អះអាងថា កូនប្រុសទាំង២របស់សិរីមន្ដ ដូចអ្នកចម្រៀងរូបនេះបេះបិទ ហើយពេលសិរីមន្ដ លេងម៉ូដសក់អី កូនទាំង២ ត្រូវតែកាត់តាមភ្លាមក៏ដោយ។
ព្រាប សុវត្ថិ បាននាំកូនប្រុសទាំង៣ រួមមាន សុវត្ថិ មុនីវណ្ណ , សុវត្ថិ មុនីនាគ និងសុវត្ថិ សិរីវុឌ្ឍចូលផលិតកម្មរស្មីហង្សមាស តាមរយៈការធ្វើសន្និសីទកាសែត កាលពីថ្ងៃទី០៨ ខែមករា ឆ្នាំ២០១៨នៅសណ្ឋាគាសូហ្វីតែល ភ្នំពេញ ភោគីត្រា។
អ្នកជំនាញសិល្បៈបានលើកឡើងថា ក្នុងចំណោមកូនប្រុសទាំង៣របស់លោកព្រាប សុវត្ថិ នោះ អ្នកដែលមានសមត្ថភាពខ្លាំងជាងគេ នឹងអាចឈានទៅស្នងតំណែងព្រាប សុវត្ថិ បាន គឺកូនប្រុសទី២ ឈ្មោះសុវត្ថិ មុនីនាគ ដែលកំលោះសង្ហានេះមានសំឡេង កាយវិការ និងចរិតនៃការច្រៀងសម្ដែងដូចទៅនឹងព្រាប សុវត្ថិ ច្រើនជាងកូនទី១ និងទី៣៕
