តារាចម្រៀងសុគន្ធ និសា តាំងពីរៀបការប្តីលោកពៅ សម្បត្តិ កាលពីថ្ងៃទី០១ ខែធ្នូ ឆ្នាំ២០១៧ មក អាជីពចម្រៀងនាងហាក់ស្ងប់ស្ងាត់នៅទ្រឹង មិនទាន់មានបទចម្រៀងថ្មីៗចេញមកផ្ទុះទៀតឡើយ ទើបធ្វើឱ្យតារាចម្រៀងល្បីឈ្មោះរូបនេះ មានការព្រួយបារម្ភថា តើសុគន្ធ និសា អាចប្រឈមនឹងការធ្លាក់ចុះដូចតារាចម្រៀងមួយចំនួន ដែលការប្តីហើយ បាត់ទីផ្សារដែរទេ?
សុគន្ធ និសា អាចធ្លាក់ចុះដូចតារាចម្រៀងល្បីមុនៗដែរទេ? នេះជាចម្ងល់របស់មហាជនបានលើកឡើង ក្រោយពេលដែលសុគន្ធ និសា ដែលជាអ្នកចម្រៀងស្រីល្បីជួរមុខគេម្នាក់ដែរនោះ ហ៊ានដឹកដៃគូស្នេហ៍ថ្មីចូលរោងការ កាលពីថ្ងៃទី០១ ខែធ្នូ ឆ្នាំ ២០១៧ ដោយមិនភ័យពីទីផ្សារចម្រៀងនាងដាំក្បាលចុះឡើយ បន្ទាប់ពីពួកគេបានពិសោធស្នេហ៍ជាង៦ឆ្នាំមក។
យ៉ាងណា តាមការសង្កេតរបស់ទស្សនិកជន បានឱ្យដឹងថា គិតត្រឹមរយៈពេល៣ខែ ក្រោយរៀបការនេះ សុគន្ធ និសា ហាក់នៅទ្រឹងមិនមានសន្ទុះទៅមុខទៀត ផ្នែកបទចម្រៀងឡើយ ព្រោះគ្មានបទថ្មីៗចេញមកផ្ទុះទេ ហេតុនេះហើយអ្នកចម្រៀងស្រគត់ស្រគំរូបនេះ ពិតជាអាចប្រឈមការធ្លាក់ចុះមែន ប្រសិនបើគ្មានការទប់ស្កាត់ តាមរយៈការចេញបទថ្មីៗលើទីផ្សារឱ្យបានដិតដល់នោះ។ ប៉ុន្តែ បើអំឡុងពេលបុណ្យចូលឆ្នាំខ្មែរនេះ សុគន្ធ និសា មានបទចម្រៀងប្រពៃណីខ្មែរ ដែលចេញមកមានការនិយមចាក់តាមវត្តអារាម និងរាំវង់លេងកម្សាន្តនោះ បញ្ជាក់ថា ទីផ្សាររបស់និសា មិនប៉ះពាល់ខ្លាំងប៉ុន្មាននោះទេ។
ដោយឡែកក្រោយរៀបការហើយនេះ សុគន្ធ និសា ក៏សម្រុកទៅលើការថតភាពយន្តច្រើនដែរ ដែលហាក់ព្រលែង ឬបន្ធូរដៃទៅលើអាជីពចម្រៀង អ៊ីចឹងហើយបានជាធ្វើឱ្យនាងស្ងប់ស្ងាត់ជាងមុន។
អ្នកដឹកនាំកម្មវិធីប្រគំតន្ត្រីរបស់ប៉ុស្តិ៍ CTN ម្នាក់ និយាយដោយសុំមិនបញ្ចោញឈ្មោះថា ពិបាកដែរនៅស្រុកខ្មែរ តារាស្រីល្បីៗច្រើនតែរៀបការហើយធ្លាក់ចុះកេរ្តិ៍ឈ្មោះខ្លាំង មានច្រើននាក់ហើយ តែអ្នកខ្លះគេមានសមត្ថភាពខ្លាំងដែរ គឺនៅតែមានគេហៅច្រៀងអ៊ីចឹង។ អ្នកផលិតកម្មវិធីទូរទស្សន៍ផ្នែកកម្សាន្តរូបនោះ បានបន្ថែមថា “យើងមិនអាចនិយាយជាទូទៅបានទេថា ឱ្យតែតារារៀបការហើយ ធ្លាក់កូដនោះ ព្រោះថា អ្នកខ្លះក៏គេនៅតែល្បីដដែលក៏មាន។ ចំណែកសុគន្ធ និសា វិញ គាត់ជាកំពូលតារាចម្រៀងម្នាក់ដែរ អ៊ីចឹងនៅលើហង្សមាស ទេ បើគេនៅតែលើក នៅតែធ្វើបទឱ្យច្រៀងនោះ គឺនៅតែមានឈ្មោះអ៊ីចឹង ព្រោះខ្ញុំឃើញហង្សមាស ក៏មិនមែនទម្លាក់សុគន្ធ និសា ដែរ គេឱ្យថតកុន និងច្រៀងតាមកម្មវិធី Concert ធំៗ ជាហូរហែដែរហ្នឹង”។
សុគន្ធ និសា ធ្លាប់ល្បីល្បាញខ្លាំងកាលពីឆ្នាំ២០០៨ នៅពេលដែលគូស្នេហ៍នាង លោកសុខ ជំនោរ ឈរជើងនៅទ្រនំនោះ តែការដើរចេញពីហង្សមាស ទៅចូលថោន កាលពីឆ្នាំ២០១១ នោះ ធ្វើឱ្យនិសា ចុះខ្សោយបន្តិចម្តងៗ រហូតធ្វើឱ្យនាងវិលត្រឡប់មកចូលហង្សមាស វិញ កាលពីឆ្នាំ២០១៥ នោះ ក៏នៅតែមិនអាចប្រជែងទីផ្សារជាមួយឱក សុគន្ធកញ្ញា និង ពេជ្រ សោភា បានទេ។
ប្រភពបានឱ្យដឹងថា សុគន្ធ និសា ហាក់អស់ជំនឿក្នុងការប្រជែងយកទីផ្សារជាមួយសុគន្ធកញ្ញា និងពេជ្រ សោភា ទើបនាងងាកទៅថតភាពយន្តជាប់ៗគ្នា នៅរយៈពេលចុងក្រោយនេះ ដោយមិនសូវអើពើជាមួយអាជីពចម្រៀងឡើយ។
ក្រៅពីសុគន្ធ និសា តារាល្បីៗដែលរៀបការហើយចុះខ្សោយ មានដូចជា យក់ ថិតរដ្ឋា, សុខ ស្រីនាង, សារ៉ាយ សក្ខណា ជាដើម។ ដោយឡែកសម្រាប់អ្នកមេម៉ាយពេជ្រ សោភា និងសុខ សោម៉ាវត្តី បែរជាមានសន្ទុះខ្លាំងជាងក្រមុំទៅវិញ ពេលរៀបការ និងលែងប្តី…៕
