ព្រាប សុវត្ថិ ធ្វើឲ្យប៉ាច គីមមួយ ព្រឺសម្បុរខ្ញាក ដោយសារពុកមាត់

បទ ”មាន់ស្រែ បន្លែស្រស់” របស់កំពូលតារាចម្រៀងព្រាប សុវត្ថិ ដែលចេញជា Full MV កាលពីម្សិលមិញនោះ ទទួលបានការចាប់អារម្មណ៍ច្រើនពីមហាជន ពិសេសអ្នកលេងបណ្ដាញសង្គម Facebook ព្រោះតែអ្នកចម្រៀងផលិតកម្មរស្មីហង្សមាស រូបនេះ បានតែងខ្លួនជាសេដ្ឋី និងបានលេងពុកមាត់ មើលទៅគួរឲ្យចង់សើច។ លោកព្រាប សុវត្ថិ ដែលចង់ញាំមាន់ស្រែ បន្លែស្រស់ នោះ បានយកពុកមាត់របស់លោកទៅញល់ៗស្រីស្អាតសាច់សខ្ចី នាងប៉ាច​គីមមួយ ដែលធ្វើឲ្យអ្នកចម្រៀងកូនកាត់ចិនរូបនេះ ព្រឺសម្បុរបះរោមឡើងខ្ញាកៗតែម្ដង។ ក្រៅពីព្រាប សុវត្ថិ ដែលលេងពុកមាត់ឡើងក្រាស់ឃ្មឹកនោះ បទ ”មាន់ស្រែ បន្លែស្រស់” ក៏មានការចូលរួមសម្ដែងដោយនាយក្រឹម ដែលពាក់ពុកមាត់តាមព្រាប សុវត្ថិ និងប្រពន្ធសសៃខ្ចី នាងព្រលិត , យាយអឿង និងតារាកិត្តិយសមួយចំនួនទៀត។

អ្នកទស្សនាបទចម្រៀងព្រាប សុវត្ថិ “មាន់ស្រែ បន្លែស្រស់” នេះបានលើកឡើងថា បទចម្រៀងមួយនេះអាចនឹងត្រូវបានគេនិយមចាក់រាំនៅតាមបណ្ដាវត្តអារាមផ្សេងៗ ក្នុងអំឡុងបុណ្យចូលឆ្នាំខ្មែរ ជាមិនខាន។ ប៉ុន្ដែបទចម្រៀងព្រាប សុវត្ថិ នេះ គឺបុកគ្នាទៅនឹងបទចម្រៀងរបស់តារាចម្រៀងផលិតកម្មថោនស្រីស្អាតវ័យក្មេង នាងរ៉ាប៊ី “មាន់ស្រែ” ដែលកំពុងតែផ្ទុះខ្លាំងទាំងក្នុងនិងក្រៅប្រទេសនោះដែរ ហេតុនេះហើយបានជាគេពិបាកក្នុងការសន្និដ្ឋានថា តើបទ ”មាន់ស្រែ បន្លែស្រស់” របស់ព្រាប សុវត្ថិ ឬក៏បទ ”មាន់ស្រែ” របស់តារាចម្រៀងរ៉ាប៊ី ដែលមានសន្ទុះខ្លាំងជាងគេនៅថ្ងៃចូលឆ្នាំខ្មែរនោះ ព្រោះថាតាមរយៈការថតជា MV នោះ ហង្សមាស ហាក់ដូចជាធ្វើឲ្យមានការទាក់ទាញជាងថោន។

ព្រាប សុវត្ថិ នៅតែអាចធ្វើព្យុះភ្លៀងបានដដែលនៅពេលនេះ បើទោះជាបច្ចុប្បន្ន ហង្សមាស មានតារាកាន់តែច្រើនក្ដី តែផលិតកម្មធំជាងគេក្នុងស្រុកមួយនេះ នៅតែចាត់ទុកថា ព្រាប សុវត្ថិ ជាតារាសំខាង់ជាងគេរបស់ខ្លួនដដែល។

គួរកត់សម្គាល់ដែរថា បទ ”មាន់ស្រែ បន្លែស្រស់” នេះ ត្រូវបានលោកព្រាប សុវត្ថិ យកឡើងច្រៀងតាមឆាកតន្ដ្រីធំនារយៈពេលចុងក្រោយនេះ ជាញឹកញាប់ ហើយតារាល្បីជាង២ទសវត្សរ៍រូបនេះ ក៏បានយកកូនប្រុសរូបសង្ហាទាំង២ គឺសុវត្ថិ មុនីនាថ និងសុវត្ថិ មុនីនាគ ឡើងរាំអមផងដែរ ដែលធ្វើឲ្យអ្នកទស្សនាកាន់តែចាប់អារម្មណ៍។

ដោយឡែក ការដែលព្រាប សុវត្ថិ ចាប់ដៃគូសម្ដែងជាមួយស្រីស្អាតសាច់សខ្ចីរបស់ផលិតកម្ម We Production នាងប៉ាច គីមមួយ នាពេលនេះ កាន់តែធ្វើឲ្យស្រីស្រស់រូបនេះឡើងកូដបានមួយក្រឺតទៀត ពី ”មាន់ស្រែ បន្លែស្រស់” នេះជាមិនខាន ព្រោះថា នាងគីមមួយ ដែលចងក្បិននោះ រាំលើកជើងមិនធម្មតាឡើយ៕