តារាសម្ដែងប៊ី រីយ៉ា ដែលហាក់ស្ងប់ស្ងាត់អាជីពសម្ដែងបន្ដិច ក្រោយពេលរៀបអាពាហ៍ពិពាហ៍នោះ បានធ្វើខួបកំណើតឲ្យកូនស្រីដ៏ស្រស់ស្អាតរបស់នាង កាលពីរាត្រីថ្ងៃទី៣០ ខែមីនា ឆ្នាំ២០១៧ នៅហាងប៉ាក់របស់នាង នៅក្បែរផ្សារបឹងកេងកង រាជធានីភ្នំពេញ។ គេឃើញមានតែតារាជិតដិតប៉ុណ្ណោះដែលចូលរួមអបអរខួបកំណើតកូនស្រី ប៊ី រីយ៉ា ឈ្មោះថា Labina គម្រប់អាយុ៣ឆ្នាំនោះ មានដូចជា អ្នកនាងកែវ ស្រីនាង , គៀត សុវណ្ណាឡាង , ហ៊ុយ ច័ន្ទរាជនី, លោកគង់ ចំរ៉ុង , អែន ឌី ជាដើម។
ប៊ី រីយ៉ា ថ្លែងនៅលើ Facebook របស់នាងថា ”រីករាយថ្ងៃខួបកំណើតណាកូនសម្លាញ់ ម៉ាក់ជូនពរឲ្យកូនមានជោគវាសនាខ្ពស់ ជីវិតរីករាយណាកូន”។
តារាដែលទៅចូលរួមខួបកំណើតកូនស្រីប៊ី រីយ៉ា បានសរសើរគ្រប់គ្នាថា កូនស្រីតារារូបនេះពិតជាស្រស់ស្អាតខ្លាំងណាស់ ដែលមើលទៅសឹងតែមិនជឿថា ជាកូនខ្មែរឡើយ។ ការសរសើរនោះ ធ្វើឲ្យរីយ៉ា និងស្វាមី មានការសប្បាយចិត្តរីករាយជាខ្លាំង តែនាងបានសូមទោសចំពោះការមិនបានធ្វើខួបធំដូចកូនៗតារាផ្សេងៗទៀត។
ប៊ី រីយ៉ា ជាកូនកាត់ឥណ្ឌា អតីត Freshie Girl បានរៀបការកាលពីឆ្នាំមុន ជាមួយបុរសសង្ហាម្នាក់ដែលជាមន្ដ្រីរាជការដែលទទួលបានចំណងដៃកូនស្រីម្នាក់ ហើយរីយ៉ា បានបើកហាងហូល ប៉ាក់ នៅម្ដុំបឹងកេងកង ដោយបានដំណើរការដោយរលូន។ រីយ៉ា នៅតែត្រូវបានស្វាមីនាងអនុញ្ញាតឲ្យបន្ដប្រឡូកសិល្បៈដដែល ហើយគេឃើញនាងលេចមុខតាមរយៈការថតភាពយន្ដឲ្យផលិតកម្ម LD ជាញឹកញាប់។ ប៉ុន្ដែមិនខុសពីតារាសម្ដែងស្រីដទៃទៀត ដែលមានស្វាមីនិងកូនហើយនោះទេ គឺរីយ៉ា ហាក់ចុះខ្សោយទីផ្សារសិល្បៈជាងមុន ព្រោះថាពេលនេះមានតារាវ័យក្មេងៗមកច្រើន ដែលធ្វើឲ្យនាងពិបាកក្នុងការរក្សាទីផ្សារសិល្បៈ។ យ៉ាងណា ស្វាមីប៊ី រីយ៉ា មិនចង់ឲ្យនាងផ្ដោតលើការប្រឡូកសិល្បៈពេញទំហឹងដូចមុនច្រើនឡើយ គឺចង់ឲ្យតារារូបនេះងាកទៅពង្រឹងហាងប៉ាក់ និងលក់ដំណាប់អំពិល ជាងសិល្បៈ ចំណែកការយកកូននោះមានត្រឹមកូនស្រីម្នាក់ គឺមិនគ្រប់គ្រាន់ឡើយ ហេតុនេះហើយពួកគេនឹងយកកូនទៅតាមធម្មជាតិ ដែលអាចនឹងបានកូនប្រុសម្នាក់ទៀត ក្នុងពេលឆាប់ៗនេះ៕
