ស៊ីន យូប៊ីន ដែលកាន់ពានជាតារាសម្តែងឆ្នើមប្រចាំឆ្នាំ២០១៧ នោះ ពេលនេះប្រែប្រួលទាំងកេរ្តិ៍ឈ្មោះ និងរូបសម្រស់ព្រមគ្នាតែម្តង ដែលរយៈពេលចុងក្រោយនេះ ស្រីក្មេងកាន់តែមានស្បែកសាច់សខ្ចីរលើបរលោងម៉ដ្ឋខៃ ដើមទ្រូងទ្រលុកទ្រលន់ ហើយលេចមុខនៅទីណា ធ្វើឱ្យប្រុសៗជ្រួលជ្រើមគ្រប់គ្នា។ ប៉ុន្តែគួរឱ្យស្តាយ ព្រោះប្រុសៗទាំងនោះមិនអាចសាសងសុំស្នេហ៍ស្រីស្អាតរូបនេះបានឡើយ ដោយសារនាងមានអង្គរក្សតាមការពារបេះដូងតាមជាប់ស្អិតជានិច្ចនោះ គឺប្រុសសង្ហាខាត់ វ៉ៃហាំង ដែលជាទូទៅ ពួកគេបណ្តើរគ្នាដូចប្តីប្រពន្ធអ៊ីចឹង។ ទស្សនិកជនជាច្រើនបានសង្ស័យថា ស្រីស្រស់ប្រុសសង្ហានេះ គឺជាគូស្នេហ៍ទាំងក្នុងភាពយន្ត និងក្រៅឆាក ហើយពួកគាត់តែងចាត់ទុកថា អ្នកទាំង២ស័ក្តិសមគ្នាខ្លាំង ដូចគូស្នេហ៍នាងគង់ ច័ន្ទស្រីមុំ និងគឹម សីហា ទៀតផង ទើបមានអ្នកខ្លះចេះតែជម្រុញឱ្យតារាទាំង២នេះ ប្រញាប់សារភាពស្នេហ៍ និងចូលរោងការឆាប់ៗតែម្តងទៅ ដែលការនិយាយបែបនេះធ្វើឱ្យនាងយូប៊ីន និងលោកវ៉ៃហាំង រកពាក្យនិយាយមិនចេញឡើយ។
ស៊ីន យូប៊ីន បានឱ្យដឹងថា មូលហេតុដែលនាងដើរជាមួយលោកវ៉ៃហាំង ព្រោះថា ធ្លាប់ស្គាល់គ្នាយូរឆ្នាំមកហើយ ព្រមទាំងមានការសម្តែងភាពយន្តជាមួយគ្នាជាច្រើនរឿងទៀតផង ទើបចេះតែទៅណាជាមួយគ្នាបែបនេះ។
ស្រីស្រស់សម្រស់ឆើតឆាយ វាចាថា “ខ្ញុំនិងលោកវ៉ៃហាំង ធ្លាប់ថតភាពយន្តជាមួយគ្នាបានជាង១០រឿងមកហើយ និងពេលនេះកំពុងតែថតរឿង “ខ្នោះបេះដូង” ឱ្យផលិតកម្ម Z នឹងដាក់បញ្ចាំងនៅលើទូរទស្សន៍ CTN នាពេលខាងមុខនេះហើយ”។
ស៊ីន យូប៊ីន អតីត Freshie Girl លេខ១ ឆ្នាំ២០១៣ បានប្រឡូកអាជីពសម្តែងរយៈពេលជាង៤ឆ្នាំនេះ ក្រសោបបានតំណែងជាតួឯក១៣រឿងមកហើយ ទើបធ្វើឱ្យតារាវ័យក្មេងរូបនេះ ឡើងកូដយ៉ាងលឿន សឹងតែមិនគួរឱ្យជឿនាពេលនេះ។ តារាសាច់សខ្ចី យូប៊ីន មិនត្រឹមតែមានរូបសម្រស់គួរឱ្យទាក់ទាញខ្លាំងនោះទេ តែនាងក៏មានចំណេះដឹងមិនធម្មតាដែរ ដោយអាចនិយាយបានដល់ទៅ៤ភាសាឯណោះ គឺអង់គ្លេស ថៃ ឡាវ និងវៀតណាម ហើយការចេះភាសាបរទេសនេះ គឺនាងយូប៊ីន មិនដែលចូលសាលារៀនឡើយ គឺប្រឹងរៀនដោយខ្លួនឯង តែតាមរយៈសៀវភៅទេ តែយូប៊ីន ឬស្រីដែន បានឱ្យដឹងថា នាងគ្មានបំណងចង់ធ្វើជាពិធីការិនី ក្នុងការប្រើប្រាស់ភាសាទាំង៤ នៅតាមបណ្តាកម្មវិធីផ្សេងៗទេ គឺពេលនេះប្រឹងផ្តោតតែលើអាជីពសម្តែងតែមួយមុខឱ្យបោះពួយទៅមុខបានល្អជាងនេះថែមទៀត។
ស៊ីន យូប៊ីន ដែលត្រូវគេថា នាងមានភាពល្អូកល្អិនជាមួយលោកវ៉ៃហាំង ដូចប្តីប្រពន្ធនោះ ត្រូវបានប្រភពដែលស្និទ្ធតារាទាំង២បានបង្ហើបឱ្យដឹងថា នោះគ្រាន់តែជាល្ខោនស្នេហ៍បំបាំងភ្នែកទស្សនិកជនទេ ការពិត នាងយូប៊ីន មានម្ចាស់ចិត្តយូរហើយ ដែលមិនមែនជាតារាសម្តែងឡើយ តែគឺជាកូនលោកឧកញ៉ាមហាសេដ្ឋី និងជាអ្នកជំនួញផ្នែកសណ្ឋាគារ និងលក់សាំងដ៏ល្បីឈ្មោះម្នាក់។ ប្រភពបានឱ្យដឹងទៀតថា យូប៊ីន ត្រូវបានបុរសអ្នកជំនួញនោះ ស្រលាញ់ខ្លាំងណាស់ បន្ទាប់ពីបុរសដែលចាយលុយដូចក្រដាសនោះ បានចែកផ្លូវជាមួយតារាចម្រៀងល្បីឈ្មោះម្នាក់ ហេតុនេះហើយបានជាធ្វើឱ្យតារាសិល្បៈរួមជំនាន់ជាច្រើន ពេលឃើញនាងយូប៊ីន ពួកគេបានខ្សឹបខ្សៀវគ្នាថា ស្រីក្មេងរូបនេះអាចនឹងក្លាយទៅជាជំទាវជាមិនខាន ប្រសិនបើនាងព្រមភ្ជាប់ស្នេហ៍បុរសសេដ្ឋីវ័យ៤០ប្លាយនោះ។
យ៉ាងណា ក្នុងជំនួបជាមួយអ្នកកាសែតនាពេលកន្លងមក នាងស៊ីន យូប៊ីន តែងតែនិយាយថា នាងនៅក្មេង ចង់ផ្តោតតែលើការសិក្សា និងអាជីពសម្តែងឱ្យបានល្អប៉ុណ្ណោះ មិនចង់គិតរឿងស្នេហានៅពេលនេះទេ តែរឿងមានអ្នកតាមស្រលាញ់ គឺនាងមិនអាចហាមឃាត់បានឡើយ។ ស៊ីន យូប៊ីន ដែលមានសម្រស់លេចធ្លោក្នុងចំណោមតារាវ័យក្មេងនោះ នាងមិនទាន់បង្ហាញភាពហ៊ឺហា តាមរយៈការលេងម៉ូដរថយន្តទំនើបៗ និងវីឡា ដូចតារាមួយចំនួនទៀតឡើយ។ ជាធម្មតា ស្រីក្មេងយូប៊ីន ឬស្រីដែន ជិះរថយន្ត Camry Hybrid តម្លៃជាង២ម៉ឺនដុល្លារ ហើយនាងច្រើនតែទៅណាម្នាក់ៗឯង និងមានពេលខ្លះដើរតែ ជាមួយលោកវ៉ៃហាំង មិនដែល ឃើញនារីដែលមានសម្រស់ស្រដៀងនឹងតារាថៃនេះ បណ្តើរគូស្នេហ៍ពិត ដែលគេល្បីថា ជាកូនលោកឧកញ៉ាមហាសេដ្ឋីនៅស្រុកខ្មែរនោះឡើយ៕