ភ្នំពេញ ៖ គ្រី ថៃពៅ ក្លាយជាម្ចាស់ពាន Cambodian Idol រដូវកាលទី៣ សម្រេចដូចក្តីស្រមៃ ក្រោយពិធីករ លោកជា វិបុល បានប្រកាសថា បេក្ខភាពដែលធ្វើដំណើរមកពីខេត្តកំពង់ចាម នេះ បានយកឈ្នះបេក្ខភាព សៀក ញញឹម មកពីខេត្តកណ្តាល ក្នុងការប្រកួតវគ្គផ្តាច់ព្រ័ត្រ កាលពីរាត្រីថ្ងៃទី០៨ ខែមេសា ឆ្នាំ២០១៨។
គ្រី ថៃពៅ រំភើបត្រេកអរយ៉ាងខ្លាំង រហូតរលេងរលោងទឹកភ្នែក នៅពេលដែលរូបគេត្រូវបានលោកស្រី ឧបនាយករដ្ឋមន្ត្រីម៉ែន សំអន ប្រគល់ពានរង្វាន់ Cambodian Idol អមដំណើរដោយលោកខៀវ កាញារីទ្ធ រដ្ឋមន្ត្រីក្រសួងព័ត៌មាន ហើយម្ចាស់ពាននេះបានទទួលរង្វាន់ជាទឹកប្រាក់ ចំនួន១៥០លានរៀល និងក្លាយទៅជាតារាចម្រៀងផលិតកម្មរស្មីហង្សមាស កុងត្រារយៈពេល៥ឆ្នាំ។
គ្រី ថៃពៅ បាននិយាយថា “ខ្ញុំមានអារម្មណ៍រំភើបសប្បាយរីករាយខ្លាំងណាស់ ដែលនេះជាក្តីសុបិនរបស់ខ្ញុំ ដែលចង់ក្លាយទៅជាតារាចម្រៀងផលិតកម្មរស្មីហង្សមាស នោះ ពេលនេះបានក្លាយជាការពិតហើយ។ ខ្ញុំសូមអរគុណបងប្អូនទាំងអស់គ្នា ដែលបោះឆ្នោតជូនខ្ញុំ ឱ្យក្លាយទៅជាម្ចាស់ពាន និងបានច្រៀងនៅហង្សមាស ដូចបំណងនេះ”។
ក្នុងកម្មវិធីនេះ ក៏មានតារាចម្រៀង២ដួង របស់ផលិតកម្មរស្មីហង្សមាស ដែលជាម្ចាស់ពាននៃកម្មវិធី Cambodian Idol រដូវកាលទី១ លោកនី រតនា និងកញ្ញាឈិន ម៉ានិច្ច ម្ចាស់ពានរដូវកាលទី២ នោះ បានឡើងបកស្រាយបទចម្រៀងរួមគ្នា បទ “នារីក្នុងបេះដូងបង ជាអ្នកណា?” ឆ្លងឆ្លើយគ្នាផងដែរ។
គួរបញ្ជាក់ថា នៅវគ្គផ្តាច់ព្រ័ត្រកម្មវិធីប្រលងចម្រៀង Cambodian Idol រដូវកាលទី៣ ដែលក្រុមហ៊ុនហង្សមាស ទិញសិទ្ធិ (License) ពីអាមេរិកនេះ មានបេក្ខភាព៤រូប គឺកញ្ញាឈាង សុវណ្ណាវី មកពីខេត្តបន្ទាយមានជ័យ, កញ្ញាចែម ស្រីលក្ខណ៍ មកពីខេត្តតាកែវ, លោកសៀក ញញឹម មកពីខេត្តកណ្តាល និងគ្រី ថៃពៅ មកពីខេត្តកំពង់ចាម។ បន្ទាប់ពីបេក្ខភាពនីមួយៗ បានបកស្រាយម្នាក់ ៣បទរួចហើយ នៅពាក់កណ្តាលកម្មវិធី អ្នកគ្រប់គ្រងតម្រូវឱ្យជម្រុះបេក្ខជន២រូប ចេញពីកម្មវិធី ដើម្បីយកតែ២រូបប៉ុណ្ណោះ ទៅវគ្គផ្តាច់ព្រ័ត្រ ហើយជាលទ្ធផល ហង្សមាស បានប្រកាសថា សៀក ញញឹម និងគ្រី ថៃពៅ ជាប់ទៅវគ្គផ្តាច់ព្រ័ត្រ ព្រោះមានសំឡេងឆ្នោតគាំទ្រច្រើន ចំណែកបេក្ខនារីឈាង សុវណ្ណាវី និងចែម ស្រីល័ក្ខ ត្រូវធ្លាក់ចេញដោយស្វ័យប្រវត្តិ។
អ្នកទស្សនាផ្ទាល់ និងតាមគេហដ្ឋាន មានការខកចិត្តយ៉ាងខ្លាំង ព្រោះថា បេក្ខនារី សុវណ្ណាវី និងស្រីល័ក្ខ សុទ្ធតែមានសមត្ថភាពច្រៀងបានល្អ និងគ្មានការភ្លាត់ស្នៀតនូវចំណុចណាមួយឡើយ បែរជាមិនអាចឈានទៅវគ្គដែលត្រូវលើកពានបានទៅវិញ ចំណែកអ្នកដែលបានឈានទៅវគ្គទី២ ផ្តាច់ព្រ័ត្រ សុទ្ធតែជាបេក្ខជនដែលមានសំឡេងធម្មតា ហើយច្រៀងភ្លាត់ច្រើន និងភ្លេចប៉ារ៉ូលចម្រៀងជាញយៗ ជាពិសេសនោះ គឺជាបេក្ខជនដែលត្រូវមហាជនបោះឆ្នោតជម្រុះទៅហើយ តែត្រូវបានគណៈកម្មការជួយសង្គ្រោះ (Save) មកវិញ។
ទស្សនិកជនមួយចំនួន បានបញ្ចោញយោបល់ (Comments) ជាចម្ងល់ថា កម្មវិធីប្រឡងចម្រៀង Cambodian Idol នេះ ជ្រើសយកសំឡេង ឬជ្រើសយកអ្វីបានជាបេក្ខនារីដែលមានសំឡេងល្អ បែរជាត្រូវបានជម្រុះចោលអស់ទៅវិញ ? ហេស ! ហេ ! នេះហើយ Cambodian Idol ?
ទោះជាយ៉ាងណា នៅវគ្គផ្តាច់ព្រ័ត្រ ម្ចាស់ពាន Cambodian Idol រដូវកាលទី៣ លោកគ្រី ថៃពៅ ក៏ធ្វើបានល្អដែរ ពិសេសការច្រៀងឆ្លងឆ្លើយជាមួយលោកព្រាប សុវត្ថិ បទ “ស្នាមទឹកភ្នែកកាត់អក្សរស្នេហ៍” នោះបានទទួលការគាំទ្រច្រើន តាមរយៈការហ៊ោកញ្ជ្រៀវពេញ Studio ហង្សមាស នៅផ្សារទំនើបអ៊ីអន ជាន់ទី៤។ ដោយឡែក បទចម្រៀងផ្សេងទៀត ដែលគ្រី ថៃពៅ បានយកច្រៀងនៅវគ្គផ្តាច់ព្រ័ត្រ ឈ្នះគូប្រជែង រហូតបានលើកពាននេះ មានដូចជាបទ “ដួងខែរនោច”, “មានសង្សារ ដូចអត់សង្សារ” និងបទ “ត្រូវម៉ក់”។
អ្នករៀបចំកម្មវិធី បានឱ្យដឹងថា កម្មវិធី Cambodian Idol រដូវកាលទី៣នេះ មានការរៀបចំរយៈពេលជិត៧ខែ ទើបឈានមកដល់វគ្គផ្តាច់ព្រ័ត្រ នៅរាត្រីថ្ងៃទី០៨ ខែមេសា ឆ្នាំ២០១៨ ដោយជ្រើសបានគ្រី ថៃពៅ ជាម្ចាស់ពាននេះ ហើយកម្មវិធីនេះសុក្រឹតណាស់ ព្រោះថា មហាជនជាអ្នកបោះឆ្នោតជ្រើសរើសឱ្យបេក្ខជនដែលមានសមត្ថភាពពិតប្រាកដ ក្លាយជាម្ចាស់ពាន…។
ហេស ! ហេ ! ម្ចាស់ពាន Cambodian Idol ច្រៀងភ្លេចប៉ារ៉ូល អាចលើកពានបានដែរ!…៕