ពេជ្រ សូលីកា ដែលមិនខ្វល់ខ្វាយរឿងច្រៀងរាំដូចមុន ដោយសម្ងំធ្វើថៅកែស្រីលក់បាយនោះ មានព័ត៌មានថា នាងមានសង្សារថ្មីជាប្រុសក្មេងកូនអ្នកធំនៅក្រោយខ្នង ដែលហួងហែងមិនឱ្យលេងសិល្បៈទៀតឡើយ។ យ៉ាងណា មានការភ្ញាក់ផ្អើលចេញពីចង្កោមតារាចម្រៀងដែលស្និទ្ធនឹងសូលីកា បានបង្ហើបឱ្យដឹងថា ស្រីស្អាតរូបនេះបានវិលទៅរកការផ្សះផ្សាស្នេហាជាមួយលោកធំផ្កាយ2នោះ សាជាថ្មីហើយ ដែលការជួបគ្នាលើកទី2នេះ ធ្វើឱ្យសូលីកា រឹតតែអស់សិទ្ធិក្នុងការធ្វើជាតារាចម្រៀង…។
ពេជ្រ សូលីកា នៅតែមានរូបសម្រស់ស្រស់ស្អាតដដែល ថ្វីត្បិតតែពេលនេះ នាងរាងធាត់បន្តិចក្តី តែថៅកែស្រីវ័យក្មេងហាងបាយ “អូនអ៊ូក” នេះ កាន់តែមានមន្តស្នេហ៍ខ្លាំងជាងមុនថែមទៀត ព្រោះថា ធ្វើឱ្យលោកធំផ្កាយ2ម្នាក់ ដែលជាប្អូនលោកផ្កាយ4នោះ សុខចិត្តដាក់ខ្លួនវិលមករកការជួបជុំជាមួយអតីតតារាចម្រៀងរបស់ផលិតកម្មរស្មីហង្សមាស រូបនេះ សាជាថ្មីវិញ។
តាមតារាដែលស្និទ្ធស្នាលនឹងពេជ្រ សូលីកា បានខ្សឹបប្រាប់ថា លោកធំដែលមុននេះ មានព័ត៌មានក្រោយបែកបាក់ពីសូលីកា ទៅភ្ជាប់ស្នេហ៍ជាមួយអតីត Freshie Girl លេខ1ម្នាក់នោះ នាពេលនេះ បានវិលរកការជួបជុំគ្នាជាមួយសូលីកា សាជាថ្មីឡើងវិញ។ ប៉ុន្តែ យ៉ាងណា ប្រភពនោះបានបង្ហើបឱ្យដឹងថា មិនមែនលោកធំនោះ ចង់ជួបពេលណា ក៏បានតាមតែចិត្តឡើយ ព្រោះថា រយៈពេលដែលនាងសូលីកា ផ្តាច់ស្នេហ៍ពីលោកនោះ នាងក៏មិនមែនទុកបេះដូងឱ្យនៅទំនេរដែរ គឺបានភ្ជាប់ស្នេហ៍ជាមួយកូនអ្នកធំម្នាក់ ដែលស្អាតនិងសង្ហាជាងលោកផ្កាយ2នោះថែមទៀតផង។ ចំណែកប្រភពពីតារាចម្រៀងដែលធ្លាប់ដើរលេងកម្សាន្តជាមួយនាងសូលីកា នោះ បានបង្ហើបឱ្យដឹងថា ពេលនេះ សូលីកា ត្រូវគ្នាជាមួយលោកផ្កាយ2នោះហើយ…។
សំណួរដែលមហាជនចង់ដឹងនោះថា តើពេជ្រ សូលីកា នឹងត្រូវប្រជែងស្នេហ៍ជាមួយអតីត Freshie Girl ម្នាក់នោះ ដោយច្បាំងគ្នាដណ្តើមលោកផ្កាយ2 ឬមួយក៏ស្រីស្អាតទាំង2 សុខចិត្តធ្វើជាកំណាន់ចិត្តលោកធំនោះ ក្នុងពេលតែមួយ?
ពេជ្រ សូលីកា ធ្លាប់ជាអតីតតារាចម្រៀង ផលិតកម្ម M ដែលកំពុងតែល្បីឈ្មោះ ក៏ត្រូវលោកធំផ្កាយ2 ដែលមានរថយន្តជិះជិត20គ្រឿងនោះ ដាក់អន្ទាក់ស្នេហ៍ តាមរយៈការទិញវីឡាដ៏ប្រណីត1ខ្នង នៅខាងក្រោយវិទ្យាល័យឥន្ទ្រទេវី និងជូនកាដូរថយន្តទំនើប Lexus LS460 តម្លៃ11ម៉ឺនដុល្លារ តែលោកធំនោះមិនអនុញ្ញតឱ្យនាងច្រៀងរាំសម្តែងសិល្បៈទៀតឡើយ ព្រោះមិនចង់ឱ្យតារាប្រុសៗប៉ះប្រាណស្រីស្អាត។ ប្រភពបានឱ្យដឹងថា ដោយសារតែលោកផ្កាយ2 រូបនេះ មានស្រីកំណាន់ចិត្តដល់ទៅ6នាក់ ហើយសូលីកា បានត្រឹមតែជាមនុស្សសំខាន់លេខរៀងទី2នោះ ទើបធ្វើឱ្យមានជម្លោះជាមួយនាងទី1 ហើយចុងក្រោយ នាងបានសុំផ្តាច់ស្នេហ៍ពីលោកផ្កាយ2នោះតែម្តង ព្រោះចង់រស់នៅដោយមានសេរីភាពពេញលេញ មិនចង់រស់នៅក្រោមការឃុំគ្រងរបស់គេរហូត ទើបសូលីកា ត្រូវប្អូនប្រុសលោកផ្កាយ4នោះ ដកហូតរថយន្តទំនើប និងផ្ទះវីឡាអស់ ដោយដើរចេញតែខ្លួនទទេ ដែលធ្វើឱ្យអ្នកសិល្ប³ជាច្រើនបានថ្កោលទោសលោកធំនោះថា ចិត្តអាក្រក់ ព្រោះនៅជាមួយគ្នាជាច្រើនឆ្នាំ តែពេលបែកគ្នា ស្រាប់តែដកហូតទ្រព្យគ្មានសល់។
យ៉ាងណា នាងសូលីកា ដែលនៅតែមានសម្រស់គួរឱ្យទាក់ទាញខ្លាំងនោះ គ្រាន់តែបែកពីលោកធំផ្កាយ2 មិនបានប៉ុន្មានថ្ងៃផង នាងទិញផ្ទះល្វែងបើកហាងបាយ “អូនអ៊ូក” និងជិះរថយន្តទំនើប Range Rover 016 តម្លៃជិត20ម៉ឺនដុល្លារ ស្រាប់តែលេចឭថាអតីតគូស្នេហ៍មកសុំត្រូវរ៉ូវគ្នាទៅវិញ។
តារាសិល្បៈជាច្រើន បាននិយាយថា ការវិលទៅជួបស្នេហ៍ចាស់វិញ របស់ពេជ្រ សូលីកា នៅពេលនេះ គឺនឹងធ្វើឱ្យអតីតតារាចម្រៀងផលិតកម្ម Rock, ហង្សមាស និងថោន រូបនេះ នឹងអាចឈានទៅបញ្ចប់អាជីពចម្រៀងស្ទើរតែទាំងស្រុង ដោយគ្មានថ្ងៃត្រឡប់ក្រោយ អាចស្តារបានជាថ្មីឡើយ ព្រោះថា លោកធំនោះហួងហែងស្រីស្អាតរូបនេះខ្លាំងណាស់ គឺកន្លងមក សូម្បីតែពេលនាងទៅច្រៀង ក៏ដាក់អង្គរក្សជិត10នាក់ តាមការពារជាប់ដែរ រហូតដល់ចុងក្រោយ បញ្ឈប់លែងឱ្យច្រៀងតែម្តង។
យ៉ាងណា សូលីកា ក៏អាចនឹងសម្ងំធ្វើជាជំទាវតូច រស់នៅហ៊ឺហាលើគំនរទ្រព្យ ចាយលុយមិនចេះអស់នោះដែរ បើទោះជានាងត្រូវជាប់ទ្រុងស្នេហ៍សាជាថ្មី ដែលពិបាកនឹងរើខ្លួនឱ្យរួចក៏ដោយ។
ប្រភពបានឱ្យដឹងថា ទោះជានាងសូលីកា ជួបរឿងស្នេហាជាបន្តបន្ទាប់ជាប់គ្នារហូតក្តី តែនៅមានផលិតកម្ម2 ដែលចាប់អារម្មណ៍ និងចង់ឱ្យនាងចូលជាសមាជិករបស់ខ្លួននោះ គឺហង្សមាស សាន់ដេ និង ថោន តែគេជឿថា គូស្នេហ៍នាងមិនព្រមឱ្យនាងកាន់ក្បាលមីក្រូឡើងឆាកជាថ្មីវិញឡើយ។
ទោះជាយ៉ាងណា ជុំវិញព័ត៌មានលេចឮខាងលើ នេះ មិនអាចទាក់ទងសុំការបំភ្លឺពីតារាស្រីរូបស្រស់ ពេជ្រ សូលីកា បានទេ កាលពីពេលថ្មីៗនេះ៕