ស្ងាត់ៗ ខេមរៈ សិរីមន្ដ ហ៊ានសារភាពថា រូបគេមានប្រពន្ធនិងកូនដល់ទៅ៣នាក់ទៅហើយ ព្រោះថាលោកនិងភរិយា បានរៀបការតាំងពីឆ្នាំ២០០៩ម្លេះ។ ការព្រមទទួលស្គាល់រឿងមានប្រពន្ធកូនរបស់អ្នកចម្រៀងល្បីឈ្មោះរូបនេះ នៅតែបង្កការសង្ស័យច្រើនសម្រាប់មហាជន ខណៈដែលរូបភាពសិរីមន្ដ និងភរិយា ដែលរៀបការនោះនៅតែជាការសំណូមពររបស់មហាជនដែលពួកគាត់ចង់ឃើញ ប៉ុន្តែ សិរីមន្ដ មិនព្រមបញ្ចេញនោះទេ ទើបធ្វើឲ្យអ្នកខ្លះនៅតែមិនអស់ចិត្ត ហើយសង្ស័យថា តារាចម្រៀងរូបនេះរួមរស់ជាមួយប្រពន្ធអត់ខាន់ស្លា តែមានកូន៣នាក់ ខ្លាចគេរិះគន់ ទើបថារៀបការហើយកាលពីឆ្នាំ២០០៩ នោះ។ ប៉ុន្ដែយ៉ាងណា រហូតមកដល់ពេលនេះ ខេមរៈ សិរីមន្ដ មិនបានបកស្រាយលម្អិតរឿងដែលលោកព្យាយាមលាក់ប្រពន្ធកូនដល់ទៅ៩ឆ្នាំហើយ ទើបហ៊ានសារភាពនៅពេលនេះទេ ស្របពេលដែលមានអ្នកខ្លះសង្ស័យថា ហង្សមាស ឲ្យយោបល់តារាចម្រៀងរូបនេះឲ្យព្រមសារភាពរឿងមានប្រពន្ធកូន ឈប់លាក់តទៅទៀត ក្រោយបែកធ្លាយរឿងនេះ ទើបសិរីមន្ដ បានយល់ព្រម និយាយត្រង់ថា រូបគេមិនមែននៅកំលោះនោះទេ គឺមានប្រពន្ធនិងកូន៣នាក់ទៅហើយ។
អ្នកយកព័ត៌មានយើងបានសាកសួរអ្នកដឹកនាំសម្ដែងល្បីឈ្មោះនៅផលិតកម្មហង្សមាស ២នាក់ ជុំវិញរឿងគេថា ហង្សមាស ជំរុញឲ្យខេមរៈ សិរីមន្ដ ព្រមទទួលស្គាល់រឿងប្រពន្ធកូននោះ តែត្រូវអ្នកស្និទ្ធសិរីមន្ដ នោះ ប្រឆាំងដូចគ្នានឹងការលើកឡើងនោះ។
អ្នកដឹកនាំការសម្ដែង MV និងរឿងភាគហង្សមាស ទាំង២នាក់រូបនោះ និយាយស្រដៀងគ្នា តែសុំមិនឲ្យលាក់ឈ្មោះថា ”តាមខ្ញុំដឹង ហង្សមាស ជាក្រុមហ៊ុនមួយដែលមិនលូកដៃចូលរឿងឯកជនរបស់តារាចម្រៀងទេ គឺជាយូរមកហើយ។ គេរកស៊ីរវល់ណាស់ មានពេលឯណាទៅឲ្យយោបល់សិរីមន្ដ ឲ្យព្រមទទួលស្គាល់ថា មានប្រពន្ធនិងកូនមែននោះ? ខ្ញុំគិតថា រហូតមកដល់ពេលនេះ ហង្សមាស ក៏មិនបានទៅសួរនាំសិរីមន្ដ រឿងហ្នឹងដែរ។ នោះជារឿងឯកជនរបស់តារាចម្រៀង ហើយមិនមែនតែសិរីមន្ដ ម្នាក់ទេ តារាចម្រៀងផ្សេងៗទៀតទាំងអស់របស់ហង្សមាស គឺហង្សមាស មិនជ្រៀតជ្រែកចូលជីវិតឯកជនពួកគេទេ គាត់គិតតែពីរឿងធ្វើការទេ “។
ខេមរៈ សិរីមន្ដ បានរើបង្វេចចេញពីសាន់ដេ ចូលទៅផលិតកម្មហង្សមាស យ៉ាងភ្ញាក់ផ្អើល ដែលការចូលទ្រនំធំនេះ ត្រូវបានអតីតតារាចម្រៀងផលិតកម្មរស្មីហង្សមាស លោកនូ សុិប ចាត់ទុកថា គឺជារឿង ”នយោបាយ” ហើយលោកយល់ថាពេលនេះ សិរីមន្ដ នៅមិនទាន់ល្បីដូចកាលនៅសាន់ដេ ទេ គឺទៅគ្រាន់តែជំនួសតំណែងតារាណាម្នាក់ប៉ុណ្ណោះ។
មហាជនរង់ចាំមើលថា ពេលដែលខេមរៈ សិរីមន្ដ សារភាពថា ខ្លួនមានប្រពន្ធនិងកូន៣នាក់បែបនេះហើយ តើលោកប៊ុនថៃ នឹងនៅតែរក្សាកេរ្ដិ៍ឈ្មោះល្បីល្បាញដូចពេលនេះតទៅទៀត ឬក៏ចុះខ្សោយជាងមុន ព្រោះថាពេលនេះ សិរីមន្ដ មិនទាន់អាចប្រជែងទីផ្សារព្រាប សុវត្ថិ បានឡើយ តាំងពីចូលទៅហង្សមាស ជាងកន្លះឆ្នាំនេះ៕
