កាលពីថ្ងៃព្រហស្បតិ៍ ទី២៤ ឧសភា ២០១៨ គណៈកម្មាធិការក្រុមប្រឹក្សាសន្តិសុខ អង្គការសហប្រជាជាតិ បានយល់ព្រមគ្នាជាឯកច្ឆន្ទ ដកបម្រាមធ្វើដំណើររបស់មន្ត្រីកូរ៉េខាងជើង ដើម្បីមានឱកាសធ្វើដំណើរមកប្រទេសសិង្ហបុរី សម្រាប់ជំនួបប្រជុំកំពូលប្រវត្តិសាស្ត្ររវាងប្រធានាធិបតីអាមេរិក លោក ដូណាល់ ត្រាំ និង មេដឹកនាំករ៉េខាងជើង លោកគីម ជុងអ៊ុន ដែលគ្រោងនឹងធ្វើឡើងនៅថ្ងៃទី ១២ មិថុនា ២០១៨ខាងមុខនេះ។ នេះបើយោងតាមប្រភពព័ត៌មានAFP ចេញផ្សាយកាលពីថ្ងៃព្រហស្បតិ៍ ទី២៤ឧសភា ។
កាលពីសប្តាហ៍មុន ប្រទេសសិង្ហបុរី បានស្នើសុំឲ្យគណៈកម្មាធិការទណ្ឌកម្មអង្គការសហប្រជាជាតិ ដកបម្រាមធ្វើដំណើររបស់គណៈប្រតិភូកូរ៉េខាងជើង ដើម្បីអាចចូលរួមប្រជុំបាន។
កាលពីមុនមកអង្គការសហប្រជាជាតិបានដាក់ទណ្ឌកម្មមន្ត្រីកូរ៉េខាងត្បូងចំនួន ៨០នាក់ និងអង្គភាពចំនួន៧៥ ។
ទោះជាយ៉ាងណាក្តី រហូតមកដល់ពេលនេះគេនៅមិនទាន់ច្បាស់ពីជំនួបប្រជុំនេះនៅឡើយទេ ខណៈសង្គ្រាមពាក្យសំដីរបស់មេដឹកនាំទាំងពីរ កាន់តែក្តៅទៅៗ។
ដោយឡែកព័ត៌មានចុងក្រោយ ប្រធានាធិបតីអាមេរិក បានប្រកាសកាលពីល្ងាចថ្ងៃព្រហស្បតិ៍ថា លោក នឹងប្រកាសឲ្យដឹងពីជំនួបនេះនៅសប្តាហ៍ក្រោយ៕