ស្រីក្មេងសាច់សខ្ចីដូចបណ្តូលចេក នាងរ៉េត ស៊ូហ្សាណា ដែលត្រូវថៅកែផលិតកម្មរស្មីហង្សមាស ពេញចិត្តនិងលើកតម្កើងជាងគេនោះ ស្ថិតក្នុងក្រសែភ្នែកនៃបុរសមានអំណាច និងសម្បូរទ្រព្យទាំងឡាយ ចង់រាយអន្ទាក់ស្នេហ៍គ្រប់ពេល ទើបថ្មីៗនេះ គេឃើញឪពុករបស់ហ្សាណា បានតាមការពារស្រីស្អាតរូបនេះជាប់ជានិច្ច ដើម្បីទប់ស្កាត់កូនស្រីកុំឱ្យប៉ះរឿងអាស្រូវស្នេហ៍…។
រ៉េត ស៊ូហ្សាណា ដែលលេចមុខតាមឆាកតន្ត្រីតាមផ្សារទំនើបៗ និងបណ្តាខេត្តមួយចំនួននោះ ត្រូវបានគេបង្ហើបថា អ្នកចម្រៀងសម្រស់ដាច់គេនៅហង្សមាសរូបនេះ ត្រូវបានឪពុកនាងតាមជាប់ស្អិត គ្រប់ពេលទាំងអស់ ដើម្បីកុំឱ្យមានការថ្លោះធ្លោយពីក្រញាំដៃប្រុសព្រាន ដែលតែងតែចង់តាមឆ្មក់ស្នេហ៍។
ប្រភពបានឱ្យដឹងថា នាងស៊ូហ្សាណា សឹងតែគ្រប់ពេលទាំងអស់ ដែលនាងច្រៀងសម្តែងថតភាពយន្ត ជាដើមនោះ គឺត្រូវបានឪពុកម្តាយនាងតាមជាប់ជានិច្ច ហើយសូម្បីតែទូរស័ព្ទនាងហ្សាណា វិញ ក៏ម្តាយនាងនិយាយជំនួសដែរ។ ការប្រយ័ត្នប្រយែងបែបនេះ មិនមែនមានតែស៊ូហ្សាណា ម្នាក់ទេ ដែលត្រូវឪពុកម្តាយតាមឃ្វាលជាប់ជានិច្ច គឺមានតារាស្រីស្អាតជាច្រើននាក់មកហើយ ដែលចូលសិល្បៈ ហើយធ្វើបែបនេះ តែចុងក្រោយ គេកត់សម្គាល់ឃើញថា តារាស្រីស្អាតៗមួយចំនួន នៅតែមិនអាចគេចផុតពីអន្ទាក់ស្នេហ៍បានទេ ហើយចុងក្រោយមានអ្នកខ្លះបានបាត់ខ្លួន ដោយអាថ៌កំបាំង និងពេលវិលត្រឡប់មកវិញ ស្រាប់តែមានកូន ដោយគ្មានប្តីទៀតផង។
មហាជនបានរង់ចាំមើលថា តើនាងរ៉េត ស៊ូហ្សាណា ដែលមិនធ្លាប់មានរឿងអាស្រូវស្នេហានោះ នឹងគេចពីការតាមស្នេហ៍របស់ប្រុសៗ អ្នកមានអំណាច និងទឹកលុយបានដែរឬទេ ព្រោះពេលនេះ សូម្បីតែនាងទៅច្រៀងនៅផ្សារទំនើបអ៊ីអនម៉ល កាលពីខែមុន មួយភ្លែតនោះ ស្រាប់តែមានឯកឧត្តមម្នាក់ បានលង់និងសម្រស់នាងទៅហើយ ដោយថែមទាំងឡើងប្រកាសថា “តារាចម្រៀងស្រីនេះ ពិតជាស្អាត ហើយច្រៀងបានពីរោះ កម្របានជួបមែន”។ ការសរសើរចំៗ ចំពោះនាងរ៉េត ស៊ូហ្សាណា នោះ ធ្វើឱ្យអ្នកចម្រៀងរូបនេះ ញញឹមបិទមាត់មិនជិតឡើយ តែមិនជារំភើបខ្លាំងនោះទេ ព្រោះថា នេះមិនមែន ជាលើកទី១ឡើយ ដែលនាងត្រូវអ្នក FAN សរសើរចំពោះមុខនោះ គឺឱ្យតែទៅដល់ទីណា ក៏អ្នកចម្រៀងធ្មេញច្រពើសរូបនេះ ត្រូវបានគេសរសើរថា ជាស្រីស្អាតដែរ។ ដោយឡែក លោកឪពុករបស់រ៉េត ស៊ូហ្សាណា មិនមានប្រតិកម្មឡើយ នៅពេលដែលត្រូវលោកធំសរសើរថា កូនស្រីលោកស្អាត ហើយច្រៀងពីរោះស្តាប់ មិនចេះជិនណាយនោះ។
រ៉េត ស៊ូហ្សាណា បានធ្វើឱ្យតារាចម្រៀងជ្រកកោនក្រោមដំបូលតែមួយ មានការភ្ញាក់ផ្អើលខ្លាំង ដោយសារហង្សមាស បានលើកតម្កើងនាងជាងគេទាំងបទចម្រៀងស្ពត និងការថតភាពយន្ត ព្រោះថា អ្នកចម្រៀងរូបនេះមានសម្រស់ស្អាត និងលេងស្ទីលយុវវ័យ ព្រមទាំងធ្វើការគោរពពេលវេលាទៀតផង។ តែយ៉ាងណា អ្នកជំនាញសិល្បៈបានលើកឡើងថា ទោះជាហង្សមាស លើកហ្សាណា យ៉ាងណាក៏តារាដែលមានសំឡេងមធ្យមនេះ មិនអាចធ្វើព្យុះភ្លៀងដូចនាងឱក សុគន្ធកញ្ញា ឬពេជ្រ សោភា បានដែរ ព្រោះថា សមត្ថភាពហ្សាណា នៅមានកម្រិតនៅឡើយ។
រ៉េត ស៊ូហ្សាណា ដែលចូលសិល្បៈទើបជិត២ឆ្នាំនេះ មានតម្លៃខ្លួនច្រៀង១កម្ម វិធីស៊ីថ្លៃជាង១ពាន់ដុល្លារ ហើយនាងក៏ត្រូវ បានទូរស័ព្ទ Oppo ជ្រើសឱ្យធ្វើជាទូតសុឆន្ទៈ (BA) ដូចពេជ្រ សោភា និងលោក Step ផងដែរ៕