ខេត្តព្រះសីហនុ ៖ ក្រោយពីជួបគ្រោះថ្នាក់តចរណ៍ដ៏រន្ធត់ នំ្តាលឲ្យរងរបួសសម្តេចនរោត្តម រណឬទ្ធិ និងអ្នកម្នាងអ៊ុក ផល្លា ពេលនោះស្ថានភាពរបស់សម្តេចក្រុមព្រះ បានធូរស្រាលបន្តិចហើយ ខណៈអ្នកនាងម្នាង ផល្លា នៅមានសភាពធ្ងន់ធ្ងរនៅឡើយ ហើយសម្តេចនិងអ្នកម្នាង នឹងត្រូវយាងតាមឧទ្ធម្ភាគចក្រ មកព្យាបាលបន្តនៅភ្នំពេញ។
តាមការឲ្យដឹងពីមន្ត្រីអ្នកនាំពាក្យគណបក្សហ្វ៊ុន ស៊ុនបិុច ថា នៅវេលាម៉ោង២នេះ សម្តេចក្រុមព្រះ និងអ្នកម្នាងផល្លា នឹងយាងតាមឧទ្ធម្ភាគចក្រមកព្យាបាលនៅភ្នំពេញ ដើម្បីឲ្យក្រុមគ្រូពេទ្យតាមដានព្រះរាជសុខភាព ខណៈស្ថានភាពរបស់សម្រេចក្រុមព្រះបានធូរស្បើយបន្តិចហើយ ចំណែកអ្នកម្នាងផល្លា នៅមានសភាពធ្ងន់ធ្ងរ។
គួរបញ្ជាក់ថា កាលពីវេលាម៉ោង១០ព្រឹក ថ្ងៃទី១៧ ខែមិថុនា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយ បានកើតឡើងនៅចំណុចផ្លូវជាតិលេខ៤ នៅភូមិអូរតាសេក ឃុំអួរចំណារ ស្រុកព្រៃនប់ បណ្តាលឲ្យសម្តេចនរោត្តម រណឬទ្ធិ និងអ្នកម្នាង អ៊ុក ផល្លា រួមនឹងមន្ត្រីមួយចំនួនរងរបួស។
តាមសេចក្តីរាយការណ៍បានឲ្យដឹងថា ក្បួនរថយន្តសម្តេចក្រុមព្រះ នរត្តម រណឬទ្ធិ បានយាងចេញទីសួរសុខទុក្ខសំណេះសំណាលជាមួយប្រជាពលរដ្ឋ នៅក្នុងខេត្តព្រះសីហនុ ខណៈនោះមានរថយន្តតាក់សុីមួយគ្រឿង ម៉ាក Highlander ពាក់ស្លាកលេខ 2L-9667 ធ្វើដំណើរពីខេត្តព្រះសីហនុ ទៅភ្នំពេញ បានបុករថយន្តម៉ាក BMW X3 ពាក់ស្លាកលេខ រដ្ឋសភា 2-090 របស់សម្រេចក្រុមព្រះ បណ្តាលឲ្យសម្តេចក្រុមព្រះ រងរបួសធ្ងន់ និងអ្នកម្នាងផល្លា ក៏រងរបួសធ្ងន់ដូចគ្នា ចំណែកខាងរថយន្តបង្ក បានរងរបួសធ្ងន់ស្រាលចំនួន៥នាក់ផងដែរ។
ក្រោយកើតហេតុភ្លាមៗ សមត្ថកិច្ច និងប្រជាពលរដ្ឋ បានជួយសង្គ្រោះសម្តេចក្រុមព្រះ និងអ្នកមា្នងផល្លា យកទៅមន្ទីរពេទ្យផងដែរ ហើយពេលនេះក្រុមគ្រូពេទ្យកំពុងយកចិត្តទុកដាក់ជួយសង្គ្រោះ៕
