អ្នកមេម៉ាយកូន1 អ្នកនាងឌុច សុភា ដែលបាត់មុខក្នុងអាជីពសម្តែងជិត10ឆ្នាំ ទើបតែលេចមុខមកវិញ ក្នុងនាមជាតួម្តាយឱ្យទូរទស្សន៍ហង្សមាស តាមរយៈរឿង “ផ្កាថ្ម” នោះ មានព័ត៌មានថា សុភា ចង់ស្តារមុខមាត់ឡើងវិញ តាមរយៈសម្ងំថតរឿងភាគទី2 ឱ្យហង្សមាស នៅរដូវខែធ្លាក់ភ្លៀងនេះ។
ប្រភពបានឱ្យដឹងថា អ្នកដឹកនាំសម្តែងរឿងភាគរបស់ទូរទស្សន៍ហង្សមាស ទាំង3ក្រុមផ្សេងគ្នានោះ គឺសុទ្ធតែមានការពេញចិត្ត និងដណ្តើមគ្នាចង់បាននាងឌុច សុភា ទៅថតសម្តែងរឿងភាគឱ្យពួកគេ ដោយសំអាងថា អ្នកមេម៉ាយរូបស្រស់នេះ នៅតែមានទេពកោសល្យសិល្បៈល្អ មិនចាញ់កាលពីមុនឡើយ តែពួកគេបានបង្ហើបឱ្យដឹងស្របគ្នាថា សុភា មានវ័យប្រែប្រួលចាស់ជាងមុនទៅហើយ ហេតុនេះមិនអាចនៅរក្សាតំណែងជាតួឯកបានទៀតនោះទេ គឺធ្វើបានតែតួម្តាយប៉ុណ្ណោះ។
លោកកៅ សីហា អ្នកដឹកនាំសម្តែងរបស់ផលិតកម្មរស្មីហង្សមាស និយាយដោយលាក់លៀមថា រឿងទី2 ដែលឌុច សុភា សម្តែងឱ្យហង្សមាស នោះ មិនមែនជាការដឹកនាំសម្តែងដោយលោកនោះទេ តែជាក្រុមការងារផ្សេងទៀត។
អតីតចាងហ្វាងទស្សនាវដ្តី “អាថ៌កំបាំង” ក្លាយទៅជាអ្នកដឹកនាំសម្តែងខារ៉ាអូខេ និងភាពយន្តឱ្យក្រុមហ៊ុនហង្សមាស រូបនេះ ថ្លែងថា “អូ! ខ្ញុំឮថា អាភា ថតរឿងទី2ហ្នឹងមែន ឱ្យហង្សមាស ក្រោយគាត់ថតចប់រឿង “ផ្កាថ្ម” នោះ។ តែរឿងថ្មីដែលគាត់ថតហ្នុង មិនមែនខ្ញុំអ្នកដឹកនាំទេ គឺក្រុមការងារផ្សេងទៀត របស់ហង្សមាស។ ខ្ញុំមិនទាន់បានហៅអាភា ឱ្យលេងរឿងរបស់ខ្ញុំទេ គ្រាន់តែមុនហ្នឹងបានជួបគាត់ដែរ”។
ការវិលត្រឡប់អាជីពចាស់របស់អ្នកមេម៉ាយ ឌុច សុភា ក្នុងឋានៈជាតួម្តាយនេះ ត្រូវបានអ្នកខ្លះនាំគ្នាខ្សឹបខ្សៀវគ្នាថា អតីតភរិយាមន្ត្រីប៉ូលិសច្រកព្រំដែនបាវិត លោកពៅ សីហា នេះ ហាក់ធ្លាក់ខ្លួនជាងមុន បានជាវិលមករកប្រាក់ល្អិត តែអ្នកនិយាយទាំងនោះ ប្រហែលជាភ្លេចគិតថា សុភា មិនមែនជិះម៉ូតូឌុបទៅថតកុនឡើយ គឺនាងជិះរថយន្តទំនើបម៉ាក Range Rover ស៊េរីឆ្នាំ2012 ពណ៌ស តម្លៃជាង10ម៉ឺនដុល្លារឯណោះ ទៅថតកុន។ តែតាមប្រភពថា ពេលនេះ សុភា ត្រូវបានលោកធំផ្កាយ2ម្នាក់ ដែលជាកំណាន់ចិត្តរបស់នាងនោះ បនាដោះលែងអ្នកមេម៉ាយរូបនេះឱ្យមានសេរីភាពឡើងវិញហើយ បន្ទាប់ពីក្រុងស្នេហ៍ជាង5ឆ្នាំមក៕
