សាកសពឌីជេ អាលិយ៉ា ត្រូវបានភ្លើងរលាយរូបកាយទៅហើយ នៅវេលាម៉ោង៣និង៣នាទី ថ្ងៃទី២៨ ខែមិថុនា ឆ្នាំ២០១៨ នៅវត្តទួលអស់លោក ក្រោយព្យាយាមជំនះនូវស្ថានភាពជំងឺអសើរយៈពេលជាច្រើនថ្ងៃ។
នៅក្នុងពិធីបូជាសាកសពឌីជេ អាលិយ៉ា នោះដែរ គេឃើញវត្តមានអ្នកសិល្បៈដូចជា អ្នកនាងចន ច័ន្ទលក្ខិណា ឌួង ហ្សូរីដា លោកខេម លោកម៉ាដូនណា លោកគន់ រៀមរតនៈ លោកងិន ម៉ារីយ៉ា ចូលរួមទាំងទឹកមុខក្រៀមក្រំក្រៃលែង។
បើតាមអ្នកស្និទ្ធនឹងឌីជេ អាលិយ៉ា បានបង្ហើបថា មូលហេតុដែលអាលិយ៉ា មិនមានសាច់ញាតិបងប្អូន ព្រោះតែនាងជាក្មេងកំព្រាតាំងពីកើតមកម្លេះ គឺនាងកើតនៅមន្ទីរពេទ្យកាល់ម៉ែត្រ ម្តាយនាងបានបង្កើតនាងហើយទុកចោល រួចបានអ្នកស្រីឡាំង សាត យកមកចិញ្ចឹមបីបាច់ថែទាំរហូតដល់ពេញវ័យ។
គួរបញ្ជាក់ថា ឌីជេ អាលិយ៉ា បានទទួលមរណៈភាពនៅវេលាម៉ោង៦ព្រឹកមិញនេះ នៅមន្ទីរពេទ្យកាល់ម៉ែត្រ ហើយសាកសពរបស់នាងបានយកទៅតម្កល់នៅវត្តទួលអស់លោក៕
